Владимир Емельянович Владыкин вордӥськиз 1943-тӥ арын 20-тӥ южтолэзе Удмуртиысь Можга карын. Атаез, Емельян Аркадьевич финской но Быдӟым Отечественной ожъёс пыр ортчиз, берло Кезысь банкын кивалтӥсь луыса ужаз. Емельян Аркадьевич улонысь кошкемез бере, уката но секыт аръёсы Володяез куинь агай-вынъёсыныз пыд йылэ султытон уж анаезлэн пельпум вылаз усиз. Анаызй, Анастасия Алексеевна – удмурт нылкышноос пӧлын технической образованиен нырысетӥосыз пӧлысь вал. Со 1930-тӥ аръёсы Ржев карын дышетскиз [10].

Владимир Владыкин Кезысь сизьым классъем школаын дышетскиз. 1957-тӥ арын Можгаысь педучилищее пыриз, удмурт «Царскосельской лицее» (кызьы берлогес нимаз сое Владимир Владыкин). Нырысь-валысь педучилище но, дышетскон но солы ӧз кельше. 14 аресъем пияш, нырысьсэ дорысьтыз кыдёке кошкем маке, туж мӧзмыса улӥз. Тужгес но курадӟиз суредаськонъя но чебер гожъяськонъя урокъёсын. «Ми соин куинь ар ӵоже «нажим – волосок» карыса вырим», – шуэ али Владимир Владыкин [5].

Татын пияш общественной уже но пыриськиз, художественной самодеятельносте но ветлӥз – туж чебер куараен кырӟаз. Училищелэн библиотекаысь вань чеберлыко книгаосты лыдӟыса быдтэм бераз, городысь лыдӟиськонниосы шонтӥз. Бератаз но эшъёссэ, коллегаоссэ тодонлыкъёсыныз ӵемысь паймытъяз. Володя физкультураен но эшъяськиз: ӝог бызьылӥз, волейболэн шудӥз. Гожъяськыны но татын йӧндырыны кутскиз. Нош котьма ке но, самой трос дырзэ но кужымзэ Володя дышетсконлы сётӥз [9].

Педучилищеез Володя 1961-тӥ арын горд дипломен йылпумъяз. Малпа вал Удмурт пединститутэ пырыны. Нош дышетӥсьёсыз воксё шуэрскизы – только Мосвае, пе, тыныд сюрес. Володя малпаськиз-малпаськиз но МГУ-е мыноно кариськиз. Нош отчы вуиз но абдраз: одӥг интые 18 адями!.. Экзаменъёссэ «витьлы» сётӥз… Но студент луон понна одӥг ар ке но стаж кулэ вылэм. Заочно ёзэтэ выжыса, Володя вуиз Кезаз. Ужаны пыриз школа-интернатэ, дышетӥсь, воспитатель, вожатой луыса ужаз. Татын но моганъёстэк ӧз ортчы. Ӟеч дышетӥсез ыштэмзы потымтэен, ӵош ужась эшъёсыз сессие ӧтён бумагаосты «адресат выбыл» шуыса, берен Москвае келяллям. Соин ик студентлы гужем сессие Москвае мыныса, тол экзаменъёсты но сётоно луиз. Одӥг толэзь куспын 12 экзамен но 16 зачёт сётӥз – ваньзэ «витьлы». Собере сое очной ёзэ выжтӥзы [5].

Общежитие ГДР-ысь лыктэм студентэн ӵош интыязы. Соин эшъяськыса, студент Володя Емельянов немец кылын ӝог вераськыны дышиз. Со сяна, университетлэн программаезъя англи кылэз но дышетӥз. Москваын сти-пендиен гинэ улыны шуг. Ленин нимо стипендия ке но басьтылӥз, ужаса но уксё поттылоно луиз на: кулэяськисьёслы ӟуч но англи кылъёсын урокъёс сётылӥз. Чебер кырӟаны быгатэмез но юрттӥз. Сцена вылэ потэм понна 14 манет тырылӥзы [9].

1966-тӥ арын университетэз Владимир Владыкин горд дипломен йылпумъяз. Университет бере ни — аспирантура. Отын гожтӥз диссертация удмуртъёслэн кызетӥ даурлэсь азьвыл улэм-вылэмзы сярысь. Кафедраысь кивалтӥсьёслэн туж уг поты вал та темаез юнматэмзы. Солы ӵектӥзы Африкая ужаны, кафедралы угось африканист туж кулэ вылэм. Пияш дӥсьтӥз аслэсьтыз малпанзэ вераны: Африкая ужась монтэк но, пе, шедёз, нош кин выроз мынам удмуртъёсыным, мон ке ӧй? Вылаз ик, удмурт этнограф одӥг но ӧй вал на. Ӝыны ар пала нюръяськиз но, темазэ юнматӥзы. Ӝоген, 1969-тӥ арын, (дыраз, куинь ар ортчыса) луиз история наукаосъя кандидат. Нош 1991-тӥ арын – доктор [5].

1969–1972-тӥ аръёсы Владимир Владыкин Удмурт научно-исследовательской институтын старший научный сотрудник луыса ужаз. 1972-тӥ арысен – Удмурт кун университетын. 1974–1975-тӥ аръёсы Берлинысь Гумбольдт нимо университетын стажировка ортчиз, кылысь кылэ берыктӥсь кадь Индие, Афганистанэ ветлӥз. Бертэмез бере экспедициосын котыръяз удмурт улосэз. Кытын гинэ асьме калык уг улы – Киров, Пермь, Свердловск областьёсын, Татар, Башкир, Мари республикаосын, Сибирьын – ваньмаз вуылӥз [9].

Владимир Емельянович Владыкинлэн 200-лэсь трос научной публикациосыз. Тросэз соос берыктэмын но поттэмын немец, англи, финн, венгер, эстон, коми но пор кылъёсын. Солэн ужъёсыз вань Бадӟым Советской но Исторической энциклопедиосын, «Вопросы истории», «Народы России», «Народы и религии мира», «Советская этнография» но трос мукет изданиосын [6]. Та бадӟым адямилэсь лэсьтэм ужъёссэ шуг вераса быдтыны. Но мар гинэ уг лэсьты улоназ Владимир Емельянович – ваньмыз со удмурт калыкез понна лэсьтэмын но лэсьтӥське.

Владимир Владыкин «Урал», «Кизили», «Финно-угроведение» (Йошкар-Ола), «Арт» (Сыктывкар) журналъёслэн редколлегиязы быръемын вал, Удмурт Элькунысь йӧскалык политикая Министерстволэн экспертно-консультационной Кенешезлэн председателе. Со сяна, со Удмуртилэн Азьмуртэз дорысь йӧскалык ужпумъёсъя экспертной кенешлэн ёзчиез луэ, Элькунысь декоративно-прикладной искусствоя но киужъёсъя Центрлэн экспертно-художественной кенешлэн председателез, Удмурт Элькунысь Кун Кенешлэн термино-орфограцической комиссиезлэн ёзчиез.

Гожъяськыны Володя Владыкин кутскиз Можга педучилищеын дышетскыкуз. Куд-ог ужъёссэ ёрос газетын но печатлазы. Огпол веросъёссэ но кылбуръёссэ пырак аслыз С. Я. Маршаклы келяз. Пумитаз туж шуныт гожтэт басьтӥз. Со пияшез уката бурдъяз [9]. Соос ай Можгаысен тодматскизы вал. Бӧрысьгес, В. Владыкин Москваын улыкуз ини, Самуил Яковлевич удмурт пияшез тодматӥз аслаз эшъёсыныз но – Твардовскиен, Свиридовен [6].

1980-тӥ арын «Марлы кырӟа тюрагай = Отчего поет тюрагай» нырысетӥ удмурт но ӟуч кылъёсын кылбур бичетэз потӥз. Берло нош потӥзы «Калыкын верало = В народе говорят» (1998), «Ajaloo nägu» (Таллин, 2009), «В народе говорят» (2011) бичетъёсыз.

Кылбуръёсыз Владимир Владыкинлэн философской пуштросъемесь луо. Поэтиказы ласянь но аспӧртэмесь. Кылбуръёсыз гожтэмын верлибрен [8].

Владимир Владыкинлы поэзиын ужанэзлэсь туж дуно луэмзэ тырмыт валаны дыраз но быгатыса юрттӥз Флор Васильев. Владимир, тодмо кылбурчи сямен ик, быгатыса улӟытэ фольклорысь традиционной жанръёсы пыӵам буёлъёсты. Калыкын кылдэм образъёс вӧзы со султытэ выльёссэ, соослы выль кужым но улон сётэ, соосты уката мургес но чебергес каре. Калыкысь тодмо легендая озьы кылдытэмын «Вашкала книга» кылбур [2].

1992-тӥ арын Владимир Владыкин поттӥз удмурт но ӟуч кылын «Йыбырскон» нимо книга-эссе, кудӥз удмурт литератураын луиз нырысетӥез сыӵе уж. Со сӥземын вал асьме удмурт классикъёсмылы – Кузебай Гердлы, Ашальчи Окилы, Кедра Митрейлы, Г. Красильниковлы, Ф. Васильевлы но мукетъёсызлы [1].

Владимир Владыкинлэн гожъямъёсыз «Горизонт» (1980), «Горизонт-84» (1984), «Йыр вадьсын инбам» (1984), «Время измеряем Октябрем» (1987), «Песни солнечного леса» (М., 1989), «Вордскем музъем-аныкае = Родная мать-земля» (1990), «Арлэн нылпиосыз» (1991), Николай Кузнецовлэн «Из мрака…» (1994), «Как молния в ночи... : К. Герд. Жизнь. Творчество. Эпоха» (1998), «Удмурт литературая антология» (2001), «Опаленный подвиг батыра : жизнь и творчество Кедра Митрея» (2003), «Современная литература народов России» (М., 2003), «Удмурт литература» (2004), «Родной земли просторы» (2004), Александр Шкляевлэн «Эшъёс-юлтошъёс» (2004), «Удмурты» (М., 2005), «Азвесь лодка = Hõbepaat» (Таллин, 2005, эстон кылын), «Kuum ӧӧ» (Таллин, 2006, эстон кылын), «На переломе эпох» (2006), «Кык гондыръёс» (2010) книгаосы пыртэмын.

Сӥё-дано нимъёсыз но пусъёсыз

1981 – Удмурт Элькунысь Вылӥ Кенешлэн Президиумезлэн Данъян грамотаез
1985 – Венгер тодосъя академилэн Этнографияя огазеяськонэзлэн кунгож сьӧрысь дано ёзчиез
1989 – Удмурт Элькунысь тодос удысысь сӥё-дано ужась
1991 – Финляндиысь Финн-угор огазеяськонлэн кунгож сьӧрысь дано ёзчиез
1992 – Финляндиысь Литературной огазеяськонлэн кунгож сьӧрысь дано ёзчиез
1993 – Удмурт Элькунысь Вылӥ Кенешлэн Президиумезлэн Данъян грамотаез
1995 – Удмурт Элькунысь Кун премия
1998 – Россиысь вылӥ школаысь сӥё-дано ужась
2000–2003 – РАН-лэн тодосъя государственной стипендия
2002 – Кузебай Герд нимо Огъя удмурт йӧскалык премилэн лауреатэз (Удмуртия)
2003 – Удмурт Элькунысь дано гражданин

Уже кутэм литература

1. Богомолова З. Владимир Владыкин (1943) // Писатели и литературоведы Удмуртии. – Ижевск, 2006. – С. 32–33.
2. Богомолова З. «Нош кин ке вераз вал мыным…» // Молот. – 1981. – № 11. – С. 54.
3. Владыкин В. Автобиография // Мон. О себе и других, о народах и Человеках, и… / В. Владыкин. – Ижевск, 2003. – С. 5–6.
4. Владыкин Владимир Емельянович // Удмуртская Республика. – Ижевск, 2008. – С. 237.
5. Коряков Г. И Африка мне не нужна // Удмурт кизилиос : очерки, зарисовки, интервью (2001-2007). – Ижевск, 2007. – С. 54-55.
6. Коряков Г. Лэсьты ваньзэ, марлы кужымед тырме // Мон. О себе и других, о народах и Человеках, и… / В. Владыкин. – Ижевск, 2003. – С. 384–397.
7. Пантелеева Т. В. Владыкин – родоначальник жанра эссе в удмуртской литературе // Время и слово : голоса современных филологов Удмуртии. – Ижевск, 2010. – С. 388–392.
8. Поздеев П. «Молотын» - выль ним // Молот. – 1978. – № 2. – С. 45.
9. Христолюбова Л. «Ас калыкелы ужано…» // Вордскем кыл. – 1993. – № 2. – С. 45–48.
10. Шепталин А. Профессор В. Е. Владыкин: очевидный и невероятный // Этнос. Культура. Человек. – Ижевск, 2003. – С. 8–17.
11. Шкляев А. Сердцем и мыслью // Марлы кырӟа тюрагай = Отчего поет тюрагай / В. Владыкин. – Ижевск, 1980. – С. 5–9.