Зинаида Кирилловна Рябинина вордӥськиз 1971-тӥ арын 26-тӥ тулыспалэ Селта ёросысь Кейлуд-Зюнья гуртын. Семьяязы вить нылпи вал. Дышетскиз Зинаида Кейлуд-Зюньяысь начальной школаын, собере Селта ёросысь ик Югдон гуртысь шор ёзо школаын. Яратоно предметъёсыз вал удмурт кыл но литература, ӟуч литература. Сочинениосыз котьку сямен кузесь валӥллям – тямыс-дас бамлэсь тросгес. Соос али ке но дышетӥсьёслэн архивазы кыллё. Зина эшъёсыныз ӵош бордгазетъёсты потталляз, концертъёсты дасялляз, арлыдо адямиослы юрттылӥз. Со сяна, дружина кенешлэн но комсомол комитетлэн ёзчиез вал.

1986–1988-тӥ аръёсы Удмурт телевидение быдэс элькунысь школаослы «Юан-веран, тодон-валан» конкурс ортчытӥз. Зина командаеныз кивалтэ вал. Со уно выступлениослы сценарий гожтӥз, девизъёсты, конкурслы юанъёс, калык опросникъёс лэсьтӥз. Солэн командаез бадӟымзэ призэз вормиз – Москвае но Твере путёвка [4].

Школаез йылпумъяса, Зинаида Рябинина Удмурт кун университетысь удмурт кылосбуръя факультетэ пыриз.1992-тӥ арын дышетскон вакытаз ик «Ӟечбур!» газетлэн редакцияз ужаны кутскиз [6]. Туж шумпотыса уже ветлӥз… «Нош куке сётӥзы «Яратэ, уг яраты» бамез дасяны, шудэлэн пумыз ӧй вал. Сюлэмме ик поныса гожъяськылӥ та темая. Кӧня муртэн мон соку гожтэт пыр кусып возьылӥ!..» – вера З. Рябинина [3]. 1998-тӥ арын сое ӧтизы «Удмурт дунне» газетэ. Татын со нырысь быдэсъяз корреспондентлэсь ужзэ, бӧрысь иворъёсъя отделлы редакторе юнматӥзы. «Алексей Петрович ноку уг юа вал, быгатод-а, пӧрмытод-а шуыса. Косэ но тӥни. Яке сокем оске-а вылэм? Нош мон косэм-оскем ужез быдэстыны дышемын, - мылкыдзэ усьтэ Зинаида. – Пионер но комсомол огазеяськонъёс сыӵе сям пыӵатӥзы» [3].

2003-тӥ арын Зинаида Вахрушевалы оскизы валтӥсь редакторлэн воштӥсез луыны. Та дыр ӵоже егит нылкышно ассэ шедьтӥз кивалтон удысын, улонэ пыӵатӥз выль малпанъёсты. Кылсярысь, газетысь «Удмурт кизилиос» рубрика улсын печатласькись тужгес устоосыз материалъёс 2007-тӥ арлэн пумаз потӥзы нимаз книгаен.

2010-тӥ арысен «Удмурт дунне» газетлэн валтӥсь редакторез луиз. Ватсано созэ но – «Удмурт дуннелэн» 95 аръем сюресаз 25 пол ини вошъяськизы валтӥсь редакторъёс, Зинаида Вахрушева - нырысетӥез нылкышно редактор! Егит кивалтӥсьлэн улоназ валтӥсь малпанэз таӵе: нылкышно кадь шӧдыны мед быгатод, воргорон кадь малпаськыны мед пӧрмытод [2].

Зинаида Рябинина мукет нылкышно кылбурчиос пӧлысь шӧдскымон висъяське: тросэз соос пӧлысь романтизм пала берытско, нош Зинаида Рябинина – зэмос реалист. Драматизмен тыр яратон сярысь, адями кусыпъёс сярысь кылбуръёс гожъя, характеръёсты но сюжетъёсты кылдытыку, тодмо стереотипъёсты кышкатэк тӥя. «Гужем» нимо нырысетӥ кылбурзэ сизьыметӥ классын дышетскыкуз гожтӥз, сое «Дась лу!» газетын поттӥзы. Университетэз йылпумъякуз, Зинаида «Лулсэр» нимо творческой диплом гожтӥз. Отчы студенткалэн 48 кылбурез но А. Ахматовалэсь но М. Лермонтовлэсь берыктэм ужъёсыз пыризы. 1990-тӥ аръёслэн шоразы автор кепыратэк пыриз егит кылбуретэ «сэрегъёсты» гажась лирической героиняеныз. Зинаида Рябинина висъяське ӧч карыса, чепылляны турттыса гожъяськон манереныз. Лирической героинязэ со чеберъятэк возьматэ [5].

Зинаида Рябининалэн кылбуран дуннеяз нырысетӥ интые пото яратонэн герӟаськем кылбуръёс, кытын валтӥсь инты басьтэ ӝожмыт мылкыд. Лирической героинялэн улоназ яратон вае ке но шумпотон, соин ӵош ик солэсь сюлэмзэ куректонэн, бӧрдонэн тырмытэ, чебер осконэз ӵуше. Яратон темаез усьтыкуз, та кылбурчи нылкышно но пиосмурт кусыпъёслэсь лушкем палъёссэс кепыратэк усьтэ. Солэн лирической героиняез – кепырасьтэм, сьӧлыко, мукетъёсызлэсь висъяськись адями [5].

Яратон темаен артэ та авторлэн кылбуръёсаз озьы ик ӝутӥсько нравственной («Мыным ӧз кылды армие келяськыны», «Егит нылаш ӵуше синпумъёссэ»), философской («Шузи чорыгъёс», «Малы мон вордскытозь кылдытӥллям синучконэз?») темаос, соос усьтӥсько семья кусыпъёсын герӟаськем ужпумъёс но выль югдуръёс пыр («Сына выль кен йырсиоссэ…», «Милям куноосмы ай вань…»). Татын нимаз висъяське анай но анайлык удыс [5].

Авторлэн кылбур жанр бордын утчанъёсыз котьма ласянь паськытэсь. Нырысь ик, тематика ласянь. Со сярысь кылбуръёслэн нимъёссы, сӥзёнъёссы но умой верало: «В. Романовлы», «Шузи чорыгъёс», «Кыкетӥзэ корка ӝутэ атай», «Пиме вордон уе» но мукетъёсыз. Но котькудзэ соосты огазея лирической героиня, кудӥз та кылсуредъёс но тусъёс пыр аслэсьтыз сюлэмшуго пушдуннезэ возьматэ [8].

Зинаида Рябининалэн кыкетӥ кылбур сборникез Эстониын поттэмын вал 2008-тӥ арын ӵыжы-выжы луись калыкъёслэн Программазыя, со нимаське «Kaksteist pilti = 12 суред = 12 картинок = Twelve pictures». Кылбуръёс сётэмын эстон, удмурт, ӟуч (авторлэн берыктэмез), англи кылъёсын.

Гожъяськисьлэн кылбуръёсыз, веросъёсыз, фельетонъёсыз печатласько «Ӟечбур!», «Удмурт дунне», «Известия Удмуртской Республики», «Инвожо», «Кенеш» газет-журналъёсын. Куд-ог кылбуръёсыз пыризы «Дась лу!», «Ӟечбур, «Дась лу!» (1990) газетъёслэн юнкоръёссылэн сборниказы, «Азвесь лодка = Hõbepaat» (2005, эстон кылын), «Kuum ӧӧ» (2006, эстон кылын) бичетъёсы, Любовь Федоровалэн «Удмурт нылкышно кылбуретлэн тулкымъёсыз» книгаяз (2007).

Сӥё-дано нимъёсыз но пусъёсыз

2004 – Удмурт Элькунысь Правительстволэн Данъян грамотаез
2009 – Удмурт Элькунысь дано журналист

Уже кутэм литература

1. Айтуганова Л. Кылбуръёсаз – «чепыллясь» зэмлык // Кенеш. – 2006. – № 7. – С. 100–103.
2. Гожтоз, кивалтоз, бурдъялоз... // Удмурт дунне. – 2010. – 9 апр. – С. 1.
3. Ермолина А. «Шудо, шедьтӥськод ке астэ» // Ӟечбур! – 2010. – 3 июнь. – С. 5–6.
4. Рябинина А. Гордость нашей деревни // Октябрь. – Селты, 2010. – 8 дек. – С. 2.
5. Фёдорова Л. Зинаида Рябинина (1971) : «Мон – термометр» // Удмурт нылкышно кылбуретлэн тулкымъёсыз / Л. Фёдорова. – Ижевск, 2007. – С. 322, 328–332.
6. Хайдаров Р. Зинаида Рябинина (1971) // Писатели и литературоведы Удмуртии. – Ижевск, 2006. – С. 172.
7. Чернова Т. «Уд воляты трос сэрего изэз» // Удмурт дунне. – 2006. – 29 марта. – С. 6.
8. Шибанов В. «Малы мон вордскытозь кылдытӥллям синучконэз?..» // Синмаськем тӧлъёс / З. Рябинина. – Ижевск, 2006. – С. 74–76.