Надежда Пчеловодова вордӥськиз 1976-тӥ арын 11-тӥ шуркынмонэ Алнаш ёросысь Кадик гуртын [7]. Семьяын бадӟымез нылпи, али ке но сюлмаське выныз сярысь. Пичи дырысеныз Нади туж шаплы но шумприч будӥз. Школае но эшъёсызлэсь вазь мынӥз, шуркынмон толэзе гинэ 7 арес тырмиз ай. Дышетӥсез, Галина Сергеевна Печникова, адӟем но куалектэм: осто, талэн портфелез аслэсьтыз бадӟым ук! Нылаш соку ик рос-прос дышетскыны кутскиз, урокын шаянтыны но вуэ вал. Вӧзаз пукись Алёша пияшен ӵашетыса пуконъязы, дышетӥсьлэсь доразы вуэмзэ ӧз но шӧдэ. Куке Людмила Ивановна Посадова, ӟуч кыллы но литературалы дышетӥсьсы, пичияк пельзэс чепыльтӥз, соку гинэ чусак кариськизы. Вӧсь ӧй вал, туж возьыт потӥз. Со дырысен Нади тодаз вайыса улӥз: урок мыныку дышетӥсез кылзоно [4].

1993-тӥ арын Надежда Пчеловодова пыре дышетскыны Удмурт кун университетлэн удмурт филологияя факультетаз. Дышетскон куспаз азьло сямен ик нылаш мукет ужен но вырыны дыр шедьтылӥз. Удалтӥз Финляндиез но Венгриез адӟыны. Финн кылэз дышетыны ветлӥз Саранске, гужем лагере. «Шунды» огазеяськонлэн ужаз пыриськись эшъёсыныз ӵош вуылӥз Сыктывкаре но. Но шулдыр студент аръёс туж ӝог ортчо. 1998-тӥ арын тулыс пал, дышетсконзэ йылпумъямезлэсь азьвыл ик, вуиз ужаны Элькунысьтымы Йӧскалык библиотекае. Дипломзэ утиз ужысьтыз куриськыса. Шаертодонъя но финн-угор литературая ёзэтын вить ар ужаз [4]. Отысен ик тодматскиз шаерысьтымы тросэныз тодмо адямиосын: П. К. Поздеевен, П. Н. Кубашевен, В. В. Котковен, В. М. Соловьёвен, П. Н. Кузнецовен, В. Л. Белыхен, В. Е. Владыкинэн, В. М. Ванюшевен, эстон гожъяськисен Арво Валтонэн… Таиз пумиськон воштӥз Надялэсь улонзэ.

2003-тӥ арын Надежда Пчеловодова кошкиз Эстон шаере Таллинысь университетын эстон кыллы но кылысь кылэ берыктон ужлы дышетскыны. Но нылаш дышетскыса гинэ ӧз улы, ачиз но пӧртэм кунъёсысь вуэм студентъёсты дышетӥз нырысь ӟуч кыллы, собере удмуртэзлы [4]. 2009-тӥ арын отысь магистратураез йылпумъяса, пыриз докторантурае [6].

Надежда Пчеловодова дышетскиз венгер (2008), коми-пермяк (2011) кылъёсъя курсъёсын, озьы ик туристъёслы улосвылэз возьматӥсь-верасьлы (2006) но лулчеберет тодонъя курсъёсын (2009). Пӧртэм проектъёсты радъялляз: «Эстонские писатели в Удмуртии» (Юрген Роостэ, Маарья Кангро, Хассо Крулль но мукетъёс), «Финно-угорские издатели (писатели, переводчики) в Эстонии» (Петр Захаров, Юрий Кузнецов, Юрий Лобанов, Елена Родионова но мукетъёс). Интернетын удмурт но эстон кылъёслы но литератураослы сӥзем блогъёсты нуэ.

Надя школаын дышетскон аръёсаз ик кылбуръёс гожъяны кутскиз. Но нырысетӥ кылбурез печатламын вал «Вуберган» газетын 1995-тӥ арын гинэ. Собере кылбуръёсыз-веросъёсыз печатласькизы удмурт газет-журналъёсын: «Удмурт дунне», «Инвожо», «Вордскем кыл». «Вордскем кыл» журналын 2001-тӥ арын потӥз нылпиослы «Му-гур» пичильтык книжкаез. Нош 2003-тӥ арын пичигес ик ке но, «Осконэ мынам» нимо кылбуръёсын бичет дасямын но поттэмын вал. Пӧртэм кылбуръёсыз пыризы солэн та сборниказ. Нош книгазэ усьто яратоно алнаш палъёсызлы сӥземъёсыз. Огезлы соос пӧлысь Алнашысь крезьгурчи Сергей Кириллов кырӟан гур гожтӥз [5].

Муш Нади туж аспӧртэмлыко, тунсыко, огшоры луисьтэм кылбурчи. Солэн аслаз гожъяськон манерез, аслаз кылыз но кыл инвисъёсыз. Со ӝог синмаськись, дарто яратӥсь но… шаян. Со быгатэ улон шоры серемпыр учкыны, улонэз ӵемгес шумпотон-эзылан пыр вала. Солэн кылбуретэзлэн огъя мылкыдыз, «температураез» нылпи литературалы матын [1].

Удмуртъёс понна висён, удмуртъёс сярысь сюлмаськон – Надежда Пчеловодовалэн кылбуръёсаз валтӥсь малпанъёсыз пӧлысь одӥгез [1].

Берлогес гожъямъёсыз печатласькизы «Удмурт дунне», «Вордскем кыл», «Инвожо», «Кенеш» газет-журналъёсын, «Инвожо» журналлэн удмурт ПЕН-клубезлэн альманахаз. Кылбуръёсыз пыризы «Вуюись» (2003) литературной студилэн бичетаз, озьы ик «Азвесь лодка = Hõbepaat» (Таллин, 2005, эстон но удмурт кылъёсын), Kuumӧӧ (Таллин, 2006, эстон кылын), Любовь Федоровалэн «Удмурт нылкышно кылбуретлэн тулкымъёсыз» (2007) книгаяз, «Льӧм ю = Льӧмпуаюок = Ломбоэн’ер = Zelnicemeggyespatakoska = Льӧмпушур = Toomingajȏgi = Tuomijoki = Tom’jogi» (Сыктывкар, 2008, коми но пор кылъёсын) книгаосы.

Надежда Пчеловодовалэн кылбуръёсын ньыль сборникез потӥз: «Осконэ мынам» (2003), «Эрике мынам» (2005), «Куттэм пыд = Paljajalu = Barefoot = Босиком» (Таллин, 2006, эстон, удмурт,>уч, англи кылъёсын), «Куттэмпыд = Barfuß = Piedsnus = Meztélláb» (Венгрия, 2009, удмурт, венгер, француз, немец кылъёсын).

Надежда Пчеловодова удмурт кылэ берыктэ ӟуч, коми, финн, эстон кылъёсысь гожъямъёсты. Солэн чакламезъя Эстониын пӧртэм берыктон уж ортче. 2005-тӥ арын потӥз удмурт кылбуръёсын «Азвесь лодка» антология. Со печатламын удмурт но эстон кылъёсын. Татчы пыремын ог 150 пала авторъёслэн кылбуръёссы. Антологиез люкан бордын ужазы Александр Шкляев, Виктор Шибанов. Тросэз текстъёс утчамын удмурт газетъёсысь но журналъёсысь. Но тужгес секыт ныпъетэз усиз Надежда Пчеловодова вылэ. Кылбуръёсты удмурт текстысь эстон кылэ берыктыны но со бадӟым юрттэт сётӥз [2].

«Большая литература малых народов» сузьетын потӥзы Ашальчи Окилэн, Кузебай Гердлэн, Вячеслав Ар-Сергилэн, Петр Захаровлэн, Сергей Матвеевлэн но мукет гожъяськисьёслэн кылбур бичетъёссы. «Классики финно-угорской поэзии» сузьетын – «Kuumöö» (Таллин, 2006), «Suvepаev» (Таллин, 2004) книгаос. Финн-угор нылкышно кылбурет сузьетын – «Neliudmurditari = Ньыль тылскем» (Таллин, 2002) книга. «Современная финно-угорская поэзия» сузьетын – Алексей Арзамазовлэн, Люза Бадретдиновалэн, Лариса Мардановалэн, Лариса Ореховалэн, аслаз Надежда Пчеловодовалэн, Зинаида Рябининалэн бичетъёссы, кылбуръёс отын ньыль кылын сётэмын (удмурт, ӟуч, эстон но англи). Эстон литератураез финн-угор кылъёсы берыктон программая Надежда Пчеловодова эстон классикъёслэсь книгаоссэс поттӥз: Арво Валтонлэсь «Тынад нимыд вошъяськылэ = Имя твое меняется» (2003), Карл Ристикивилэсь «Адямилэн улон сюресэз» = «Inimeseteekond» (2004), Бетти Алверлэсь «Инвис усьтӥськон вакыт» = «Tahetund» (2005) но мукет. Майре Ироен но Лайни Лиепаен ӵош эстон кылэ берыктӥз «Узы-боры» удмурт киноез (2011).

Сӥё-дано нимъёсыз но пусъёсыз

2007 – Таллинысь университетлэн литературной премиез (Эстония), «Eesti Kultuurkapital» Фондлэн «Traducta» премиез (Эстония), Эстониысь ӵыжы-выжы луись калыкъёслэн Программалэн литературной премиез

Уже кутэм литература

1. Арзамазов А. Куинь "пичи" азькыл // Этюды / А. Арзамазов. – Ижевск, 2006. – С. 154–158.
2. Ванюшев В. Гогыямтэ выжыкылчи // Кенеш. – 2003. – № 3. – С. 76–79.
3. Иванов И. О сокровенном – без прикрас // Алнашский колхозник. – 2005. – 15 июля. – С. 3.
4. Пчеловодова Н. Шунды кадь пиштӥсь, муш кадь тыршись / записал Р. Хайдар // Удмурт дунне. – 2006. – 30 июнь. – С. 6, 11. – (Удмурт кизилиос).
5. Сурчакова Л. Шунды доры кадь кыстӥсько бордаз // Алнаш куара. – 2005. – 8 июля. – С. 6.
6. Фёдорова Е. Эстониын дышето удмурт кылэз! // Удмурт дунне. – 2010. – 9 февр. – С. 6.
7. Хайдаров Р. Надежда Пчеловодова (1976) // Писатели и литературоведы Удмуртии : биобиблиогр. справ. / cост. А. Н. Уваров. – Ижевск, 2006. – С. 171.