Лариса Николаевна Орехова вордӥськиз 1979-тӥ арын 27-тӥ пӧсьтолэзе Алнаш ёросысь Шадрасак-Кибья гуртын. Варзи-Ятчиысь шор ёзо школаез йылпумъяса, Удмурт кун университетысь журналистикая факультетэ пыриз дышетскыны.

1999-тӥ арысен Лариса Орехова «Инвожо» журналын корреспондент, реклама утчась, мерлыко кусыпъёсты тупатӥсь менеджер, компьютере текстъёсты пыртӥсь но верстать карись оператор луыса ужаз, та дыре ик егитъёсын кусыпъёсты юнматыса, «Инвожолэсь» литературной кружоксэ нуиз, нош 2003-тӥ арысен – журналэз электрон нуллӥсе типографилы дасянъя (допечатной подготовка – верстка но дизайн) тӧролэн кивоштӥсез луиз. Та арын ик «Инвожо» издательство но кылдӥз. Журналын сяна, со вань кужымзэ но быгатонлыксэ поныса книгапоттоннилэн кивалтӥсез луыса ужаны кутскиз.

2005-тӥ арысен Лариса Орехова Удмурт ПЕН-клублэн директорез луиз. Ужрадъёсты ортчытъян сяна, со альманахъёсты люкан-радъян бордын тырше.

Творческой быгатонлыкъёсыз начальной школаын дышетскыкуз ик адӟиськизы ини: сизьым арес дыръяз ньыль чуръем кылбур гожтӥз. Пӧртэм литературной ӵошатсконъёсы пыриськылӥз. Школаысь, собере «Инвожо» журналлэн редакциысь литературной кружокъёсы ветлӥз.

Нырысетӥ кылбур бичетэз Эстониын потӥз 2007-тӥ арын Ӵыжы-выжы луись калыкъёслэн Программазыя (финн-угор калыкъёслы юрттон программа), нимаське со «Ярдуртэм нюлэс = Ääretu laas = Безбрежный лес = The boundless woods». Кылбуръёс сётэмын эстон, удмурт, ӟуч, англи кылъёсын.

Лариса Орехова удмурт кылбурет удысын – оло нош быдэс финн-угор егит поэзиын – висъяське классика ӧръёсы кабъяськем поэзиез выльдыны быгатэменыз, кызьы форма ласянь, озьы ик пуштросэзъя но. Со бадӟым дуннеез бугыртэ, куд-ог дыръя поэзилэн азьпал улонэз понна кышкаса – античной мифологиысен туала улонысь ненег сюлэм шуккетъёсмы дорозь. Солэн образъёсыз кышкасьтэмесь но сыӵе-ӵемо импрессионизм амалоесь: соин сэрен сак лыдӟисьлы куд-ог дыръя аслыз ик герӟано луэ солэсь шӧдтэк шорысь вошъяськылӥсь малпанъёссэ но амалъёссэ одӥг шӧдонэ огазеян понна. Ӵемысь солэн экспериментъёсыз но малпан сюресъёсыз вордӥськыло туж но туж огшоры улон суредъёсысь, но та вакытэ ик со быгатэ дырлэн но пространстволэн борддоръёсыз сьӧры кыдёке-кыдёке лобӟыны [7].

Та авторлэн кылбуран дуннеез аспӧртэм, нокинэн сурантэм луэ. Со дуннеын буёлъёсыз но мукетэсь, туж яркытэсь. Адямиос но адямиос ӧвӧл кадь. Соос кесясько куаратэк но бӧрдо синкылитэк [1].

Петр Захаров одӥгаз эссеяз Ореховалэсь поэзизэ ӝужыт борддоро лабиринтэн ӵошатэ, отын тём пеймытын лыдӟисьлэн вань луонлыкез зэмлыклы сюрес шедьтыны, яке йыромыны, тодмотэмлык улэ выйыны [1]. Аслэсьтыз дуннеез валамзэ утчаса, Лариса Орехова графикалы вазиське, мылысь-кыдысь уже кутэ фонетической символикаез, синтаксической конструкциосты, пунктуационной луонлыкъёслэн техниказэс [4].

2009-тӥ арын потӥз «Ярдуртэм нюлэс = Безбрежный лес» ӟуч но удмурт кылъёсын книга.

Лариса Орехова удмурт лулчеберетэз но литератураез Европаын азинтон бордын ужа. Со но Алексей Арзамазов асьсэлэсь творчествозэс Франциын возьматӥзы ини: Удмурт ПЕН-клублэн ёзчиосыз 2008-тӥ арын Сорбоннаын кӧня ке творческой пумиськон ортчытӥзы [6]. Кылбуръёссэс лыдӟизы Сорбонна университетын (Париж), Поэзилэн Юртаз, француз ПЕН-центрын. 2009-тӥ арын Лариса Орехова, Алексей Арзамазов но Пётр Захаров Стокгольме ӧтемын вал туала литераторъёслэн пумиськоназы. 2010-тӥ арын Финн-угор гожъяськисьёслэн Калыккуспо конгрессазы пыриськизы (Финляндия).

Лариса Ореховалэн кылбуръёсыз дуннеысь пӧртэм кылъёсы берыктэмын: эстон, венгер, карел, пор, коми, финн, англи но ӟуч. Гожъямъёсыз пыртэмын «Азвесь лодка = Hõbepaat» (2005; эстон кылын), «Kuum ӧӧ» (2006; эстон кылын), «Neiu ja karu» (2006; эстон кылын) книгаосы, быдэс дуннеысь нылкышно поэзилэн антологияз (Лондон), со сяна, «Porche» (Франция) литературной журналын печатламын.

Лариса Орехова мылысь-кыдысь тырше дунне литератураез удмурт кылэ берыктон удысын. Со берыктӥз троссэ тодмо гожъясьёсты – Эмили Дикинсонэз, Габриэлла Мистралез, Федерико Гарсия Лоркаез, Кристийна Эхинэз, Эжен Ионесколэсь «Пилеш кырӟась» пьесазэ, Гарольд Пинтерлэсь «Пейзаж» пьесазэ, Жан-Мари Гюстав Леклезиолэсь «Инбамын улӥсьёс» новеллазэ, пичи нылпиослы выжыкылъёсты. Лариса Орехова туж дӥсьтыса гожъяське. Вань кылбурчиос пӧлын аспӧртэм ӧрын визыла. Вань солэн импрессионизм амалэз но, античной образъёсыз но. Соин тазэ авторез валась ӧжытгес. Нош ачиз кылбурчи верамъя, кылбур – со лабиринт кадь, отчы пыриськод но – потыны уг луы. Кылбурчи туж тунсыкъяське кунгожсьӧр гожъясьёсын, вашкала грек но рим философиен, соин кылбуръёсыз пыӵамын отысь малпанъёсын, шӧдонъёсын [5].

Сӥё-дано нимъёсыз но пусъёсыз

2002 – Финн-угор прессалэн Огъя Росси фестиваляз «Лучший журналист года» диплом
2005 – Удмурт егитъёслэн «Шунды» Огазеяськонзылэн Данъян грамотаез
2006 – Удмурт Элькунысь егитъёслэн ужъёссыя Кун комитетлэн Данъян грамотаез
2008 – Удмурт Элькунысь лулчеберетъя, печатья но иворъёсъя Министерстволэн Данъян грамотаез
2010 – Удмурт Элькунысь лулчеберет удысысь сӥё-дано ужась

Уже кутэм литература

1. Арзамазов А. Другая среди своих // Известия Удмуртской Республики. – 2007. – 26 сент. – С. 8. 
2. Арзамазов А. Перформанс о перформансах // Инвожо. – 2008. – № 7/8. – С. 87.
3. Арзамазов А. Paris Paris // Инвожо. – 2008. – № 11/12. – С. 42–47.
4. Бусыгина Л. Традиции и новаторство в творчестве поэтов начала XXI века // Италмас. – 2011. – № 1. – С. 34–36.
5. Ионина А. Виноградлы кулэ пыкъет? // Удмурт дунне. – 2009. – 18 февр. – С. 6.
6. Сорокина И. Стихи без границ // Удмуртская правда. – 2009. – 17 февр. – С. 1.
7. Valton A. [Послесловие] // Ярдуртэм нюлэс = Ääretu laas = Безбрежный лес = The boundless woods / Л. Орехова – Tallinn, 2007. – С. 93.