Вениамин Никонорович Ившин вордӥськиз 1947-тӥ арын 30-тӥ коньывуонэ Кез ёросысь Ванялуд гуртын. Семьяязы куать нылпи вал. Будӥз Вениамин Ившин крестьян семьяын нокыӵе секыт, сьӧд ужлэсь пыкиськытэк. Тӥр но, кусо но, сюрло но ки улаз бергазы. Но агайёсыз уй но нунал секыт ужын тыршизы, трактористъёс, индылӥзы: «Нош тон дышетскы, дышетскы…». Веня тыршиз... Секыт вакытэ быдэстӥз Мария Алексеевна нылпиоссэ. Озьы ке но, со быгатӥз пиналъёсызлы кырӟась-верась, капчи мылкыдзэ сётыны, укта ик пичиезлы, Веня пиезлы. Пияш юн эшъяське вал инкуазен, соин ик йыраз малпан кылдӥз: нюлэсчи луоно. Отчы дышето вал Йошкар-Олаын. Кыдёкын шуыса, анаез ӧз лэзьы. Озьы дышетскемезъя со педагог луэ, нош сюлмыныз – инкуазез кырӟась, улэпсэ данъясь, куасьмыны кутскемзэ улӟытӥсь [2].

Школазэ йылпумъяса, пияш пыриз дышетскыны Удмурт пединститутысь филологияя факльтетлэн удмурт ёзэтаз, йылпумъяз сое 1971-тӥ арын. Вениамин Ившинлэн вал бадӟым дышетӥсьёсыз. Ӟуч литератураез со Кез черкогуртысь школаын дышетскыкуз, литобъединение ветлыса, Олег Поскрёбышев дорын дышетӥз, удмуртсэ университетын – Даниил Яшин дорын, нош кылбурет удысын нырысь вамышъёссэ солэсь чакласа возиз Флор Васильев [9].

1971-тӥ арын Вениамин Ившинэз «Дась лу!» газетэ ужаны ӧтизы. Ньыль толэзь гинэ ужаса вуттӥз но, сое армие басьтӥзы. Кык арзэ Германиын служить кариз. Озьы со вакытэ Вениамин Ившинлы шуд усиз кунгож сьӧры вуылыны. 1979–1983-тӥ аръёсы со газетын ик литсотрудник, редактор вал. 1972–1979, 1983–1986-тӥ аръёсы «Советской Удмуртия» газетын ёзэтэн кивалтӥз, собере валтӥсь редакторлэн воштӥсез вал. 1975-тӥ арын егит писательёслэн Москваын ортчем кенешазы пыриськиз. Егит автор азьын выль инвисъёс усьтӥськизы [4]. 1986-тӥ арын, партилэн Удмурт обкомезлэн куремезъя, Вениамин Ившин пиналъёслы «Кизили» журнал кылдытон бордын ужаз [6]. 1990–1994-тӥ аръёсы туж секыт вакытэ «Кенеш» журналлэн валтӥсь редакторез вал [6]. 1994-тӥ арысен нош «Удмуртия» книгапоттониын валтӥсь редактор луыса ужаз [5]. 2001-тӥ арын «Удмуртская Республика» энциклопедия кылдытон бордын ужамез понна Вениамин Ившинлы Кун премия сётэмын.

Веня сизьыметӥ классын дышетскыкуз, удмурт кылъя но литературая дышетӥсьсы Раиса Степановна Щепина косӥз ас школазы сярысь сочинение гожтыны. Пияш гожтӥз «витьлы», солэн гожтэм сочинениез кылбурлы пӧрмиз. Со бордысен ик луиз поэзия борды «ӝабырсконэз» [2]. 

Со вакытэ «Кизили» ёрос газет бордын егит кылбурчиослэн но журналистъёслэн кружоксы ужаз. Соин кибашлы ӟуч кылбурчи но дано дышетӥсь Олег Поскрёбышев кивалтӥз. Со дорын дышетскемез кутскись кылбурчи понна зэмос школа луиз: кылэз шӧдон-валан ласянь но, кылтӥрлык ласянь но, лыдӟыны дышетскон ласянь но. Кружоке ветлӥсьёс печатласькизы ёрос газетазы. Собере дышетӥсез ик, куд-ог кылбуръёссэ бырйыса, келяз «Молот» журналэ. Собере сое печатлазы «Советской Удмуртия» газетын. Пумен Вениамин Ившинлэн поэтической куараез юнма, творчествоезлы дунъет сёто Флор Васильев, Даниил Яшин, Петр Поздеев, Герман Ходырев, Людмила Кутянова. 1976-тӥ арын потӥз «Мар дуно» нырысетӥ кылбурет бичетэз. Азькылаз писатель но редактор Николай Васильев гожтэ: «Умой мылкыд кельто Вениамин Ившинлэн кылбуръёсыз. Соосты лыдӟыса валаськод: поэт кырӟаны тырше ас куараеныз…». Собере печатласькизы «Инбаммы одӥг» (1980), «Выжъёс» (1983), «Котыртӥ-котыртӥ» (1993) но мукетъёсыз ужъёсыз. «Узел голосов» (2001) бичетэз тужгес но умой пӧрмем. Сое ӟуч кылэ Владимир Емельянов берыктӥз. Татын туала адямилэн ӟырдыт мылкыдыз, глобализация вакытэ калык йылолъёсты, кылэз, удмурт этносэз утьыны тыршон шӧдӥське. Книгаысь книгае авторлэн тыршемез, будэмез шӧдӥське. Удмурт поэзиын революция лэсьтыны со уг тыршы. Постмодернизмлэн тулкымъёсаз но, этнофутуризмлэн кожъёсаз но уг шонскылы. Кылбурчи ичи кылтӥрлыкен бадӟым образъёс суреданы тырше. Огшоры инкуазь суред вылын лыдӟисез философия малпанэ вуттыны тырше [4].

Чеберлыко гожтэм ужлэн кужымез ӵапак со бордын: лыдӟисен валамон, оскымон, визьмо кылын вераськыны быгатоно. Автор шӧдыны мед быгатоз калыклэсь сюлэм висёнъёссэ но, адӟыны мед пӧрмытоз синмысьтыз югырак чилектӥсь шумпотон тылсиоссэ но [7].

Вениамин Ившин, улонлэн куашетӥсь ӧраз вамышъяса но, ноку ӧз тыршы ӵашетыса, куаразэ будэтыса вераськыны, солэн поэзиез «чалмыт» шуыны луоз, визыласа ӧръёсын жильыртыса бызе. Мылкыдзэ мултэс пальккатэк, кылбурчи малпаське со сярысь, мар тужгес но дуно сюлэмызлы: улонлэн ӟеч палъёсыз – чылкыт мылкыдъёс, шумпоттӥсь ужъёс [1].

Куараосты шӧдонэз, жингрес рифмаосын «шудыны» быгатэмез Вениамин Ившинэз нылпиослы матэ каризы, соос понна ужаны мылкыдыз ӝутскиз. Чур бӧрсьы чур, пичильтыкъёслы сӥзем кылбуръёс люкаськизы, куриськизы нимысьтыз книгае. Озьы потӥзы Вениамин Ившинлэн «Шур сьӧрысь бӧдёно» (1990), «Шуланэ дас вить» (1995), «Ворпо гуждор» (1997), «Паймытӥсь дуннеын» (2002) книгаосыз. Со дыре ик кылбурчи пыриськиз кыкетӥ но витетӥ классъёслы лыдӟон книгаос дасянэ. Та ужъёсаз автор чеберлыко литературалэсь валтӥсь тодметсэ пыӵатыны умой быгатэм – образъёс вылын сюлмо, ӟеч луыны дышетон [4]. «Нылпи литератураез лыдӟыса гинэ пинальъёслэсь сямъёссэс уд тоды. Та ласянь улон ачиз узыр сандыксэ усьтэ.

ылкыдыд, чакласькыны быгатонлыкед гинэ мед луозы. Школае, нылпи садэ-а вуисько, бускель пиналъёслэсь шудэмзэс-а адӟисько – аслым уно тунсыкозэ синйылтӥсько, ӵапак отысь темаосы, малпанъёсы кылдо», – вера Вениамин Никонорович [7].

Вениамин Ившинлэн гожъямъёсыз пыртэмын «Между Волгой и Уралом» (1978), «Чипчирган» (М., 1985), «Радиовещание Удмуртии: страницы истории и современности» (1997), «Как молния в ночи» (1998), «Уна рӧма сикӧтш» (Сыктывкар, 2002, коми кылын), «Современная литература народов России» (М., 2003) книгаосы, Зоя Богомоловалэн «Голоса эпохи» (2003), Александр Шкляевлэн «Эшъёс-юлтошъёс» (2004) книгаосазы, «Азвесь лодка = Hõbepaat» (Таллин, 2005, эстон кылын), «На переломе эпох» (2006) но мукет книгаосы; «Аврора», «Волга», «Урал», «Казан утлары» («Казанские огни») но мукет журналъёсын потылӥзы.

Кылбурлэн кыӵе куара, крезьгур сётэмезъя но вераны луэ автор сярысь. Вениамин Ившинлэн чуръёсыз кырӟанэ курисько. Тросэз кылбуръёсыз кырӟанъёс луизы. Кылсярысь, Герман Корепанов-Камский гинэ ог дас витезлы крезьгур гожтӥз: «Льӧль кырӟан», «Тэтэ», «Ӵӧжпиос» но мукетсэ [2].

Вениамин Ившин пӧртэм удмурт кылбурчиослы кылбур бичетъёссэс поттонлы дасяз: Михаил Ильинлэсь «Чильтыро ӟольгыри» (1992), Григорий Верещагинлэсь «Куазие, куазие…» (2001), Аркадий Клабуковлэсь «Лудкече, кузь пеле» (2010), Тимофей Шмаковлэсь «Маруся ӟезьы усья» (2010) но мукет книгаосты; «Удмурт литература» (1990, М. Горбушинэн, В. Ившинаен ӵош; 2008, Л. Федороваен ӵош), «Анай кыл» (2005, А. Журавлеваен, Л. Федороваен ӵош) но мукет учебникъёсты. Озьы ик семьяен лыдӟон книгаосты дасяз: «Зарни дэремен шунды» (2006), «Азвесь кышетэн толэзь» (2007); «Кык гондыр» (2010), «Камсьӧр батыр но Инсьӧр нылаш» (2011) литературной выжыкылъёсын бичетъёсты, «Трофим Борисов: штрихи биографии» (2011) но мукет книгаосты.

Вениамин Ившин трос ужа кылысь кылэ берыктон уж бордын. Удмурт кылэ берыктӥз ӟуч классикъёслэсь куд-ог произведениоссэс (Александр Пушкинлэсь, Михаил Лермонтовлэсь, Николай Некрасовлэсь). А. С. Пушкинлэн вордскем дырысеныз 200 ар тырмонэзлы, поэт берыктӥз «Поп сярысь но солэн визьтэм ляльчиез сярысь выжыкыл» произведенизэ. Та ужлы бадӟым дунъет сётӥз С. В. Михалков. Москваысь Правительствоен ялэм ӵошатсконаз «Лучшие переводы русской классики» номинациын та книга кык премия басьтӥз [1].

Сӥё-дано нимъёсыз но пусъёсыз

1994 – Удмурт Элькунысь лулчеберет удысысь сӥё-дано ужась
1996 – Огъя Россиысь «Искусство книги» конкурслэн II степенё дипломез
1998 – Россиысь лулчеберет удысысь сӥё-дано ужась
1999 – ӟуч нылпи классикаез поттӥсьёс вискын Калыккуспо ӵошатсколэн дипломез, А. С. Пушкинлы 200 ар тырмонэзлы сӥзем Огъя Росси книжной ярмаркаын Муско Кивалтэтлэн премиез
2001 – Удмурт Элькунысь Кун премия
2007 – Удмурт Элькунлэн Данъян грамотаез
2008 – Эшъяськон орден

Уже кутэм литература

1. Богомолова З. Вениамин Ившин (1947) // Писатели и литературоведы Удмуртии. – Ижевск, 2006. – С. 55–56.
2. Богомолова З. «Кырӟанэ–марӟанэ, Чупчи йыл ӟардонэ…» // Удмурт дунне. – 1997. – 1 нояб. – С. 3.
3. Зуева-Измайлова А. Диалог со временем // Удмуртская правда. – 2007. –31 окт. – С. 4.
4. Зуева А. Кылбурчилэн паймытӥсь дуннеез : Вениамин Ившинлы – 60 // Кенеш. – 2007. – № 9. – С. 86–91.
5. Ившин Вениамин Никонорович (1947) // Вордскем кыл. - 2011. – № 3. – С. 35.
6. Ившин Вениамин Никонорович // Удмуртская Республика. – Ижевск, 2008. – С. 338–339.
7. Ившин В. Сюлэм но йырвизь куремъя улӥсько / записал В. Занчаров // Ӟечбур! – 2007. – 25 окт. – С. 4–5.
8. Никифоров Н. Кисьман вакыт : Вениамин Ившинлэн гожъямъёсыз сярысь // Кенеш. – 2003. – № 2. – С. 98–101.
9. Шкляев А. Кылбурчилэн выжъёсыз–метафораосыз // Вапумысь вапуме / А. Шкляев. – Ижевск, 2000. – С. 116-120.