Вячеслав Сергеев вордӥськиз 1962-тӥ арын 5-тӥ оштолэзе Дэри ёросысь Выль Каӟмас гуртын. Атаез Виталий Степанович колхозын электрик луыса ужаз, анаез Афанасья Федоровна – огшоры колхозын ужась. Семьяязы ньыль нылпи вал, Вячеслав – пичиез. Пичи дырысеныз зарезьчи луэмез потэ вал. Та малпанэ вуиз атаезлэсь Тихий океанын служить каремез сярысь верамъёссэ кылзыса. Укмысэтӥ классысен синмыныз проблемаос кыре потӥзы, соин ик та малпанлэсь куштӥськоно луиз [1].

Каӟмас школаез йылпумъяса, Вячеслав Ар-Серги пыре дышетскыны Удмурт кун университетлэн кылосбуръя факультетаз. Татын со ӟеч дышетскемез сяна, научно-практической конференциосы пыриське, мургес тодматске удмурт фольклорен. Ньылетӥ курсысен одӥг семестр пор кылэз дышетон вылысь дышетске Йошкар-Олаын [1].

Студент дыръяз удмурт кылбурчилэн но тодосчилэн Даниил Яшинлэн литературной кружоказ ветлӥз. Владимир Романов, Михаил Федотов но Виктор Шибанов удмурт кылбурчиосын эшъяськыны кутскиз.

Университет бере Вячеслав Сергеевез армие басьто. Служить карыны сюре Туркестанэ, 357/61 дивизилэн «За Родину!» газетаз корреспондент луыса, кудаз ас дыраз вал мукет удмурт гожъяськись – Михаил Лямин. Та вакытэ ик солэн вордске нылыз но потэ нырысетӥ веросъёсын книгаез. 1986-тӥ арын армиысь бертыса журналист луыса ужа «Советской Удмуртия» газетын [2].

1986–1988-тӥ аръёсы Удмурт радиоын редактор луыса тырше, отын иворъёсын но крезьгуръёсын «Визыл» нимо программа кылдытэ. 1990-тӥ арын «Кизили» нылпи журналлэн валтӥсь редакторез интые пуктэмын.

1991-тӥ арын Вячеслав Ар-Серги Мускоысь А. М. Горький нимо литературной институтын Вылӥ литературной курсъёсын тодо-валан басьтӥз. 1992–1997-тӥ аръёсы тодмо драматурглэн Виктор Розовлэн курсаз дышетскыку, «Кайрос» (Ролан Быковлэн фондэз) киностудияын художественной но документальной фильмъёслы сценарийёс гожъяз. «Алангасарлэн вужерез» (1994) нырысетӥ удмурт чеберлыко фильмлы но сценарий со гожтӥз.

Та вакытэ Вячеслав Ар-Серги – профессиональной писатель. Улон сюресъёс сое пӧртэм интыосы вутто, тодмато трос ӟеч калыкъёсын: Сибире но Дагестанэ, Белорусие, Чехие, Черногорие но мукет азе вуылэ. Умой тодэ англи, пор но бигер кылъёсты.

Вячеслав Ар-Серги пӧртэм жанръёсын гожъяське: очеркъёс, романъёс, повестьёс, веросъёс, новеллаос, кылбуръёс, пьесаос. Но та ласянь автор вера: «Мон ноку но ӧй люкылы гожъямме жанръёсъя. Мыным вань произведениосы, аслам вордэмъёсы, дуноесь пото. Зэм, куд-огез, оло, конгылёгес но, дыго-могогес ке но» [8].

Гожъяськисьлэсь творчествозэ Зоя Богомолова, Василий Ванюшев, Анатолий Демьянов, Фома Ермаков, Алексей Ермолаев, Татьяна Зайцева, Семен Самсонов, Александр Шкляев но мукет литературоведъёс эскеризы.

Вячеслав Сергеев дас куинь арескысен гожъяськыны кутскиз. Веросъёсыз ёросысь но элькунысь газетъёсын, «Молот» журналын печатласькизы; «Кудӥз сюрес шудо меда?» нимо нырысетӥ веросэз «Советской Удмуртия» газетын потӥз 1977-тӥ арын. «Ӝыт куараос» (1986) нырысетӥ бичетэз потэмез бере ини тодмо луиз, удмурт литературае аспӧртэмлыко дунне шоры учконэн суредась вуиз шуыса, нимысьтыз стилистика манерен, нодбуро ужпумъёсты пыр-поч эскерись. Удмурт кылбурчи Владимир Романов гожтӥз, психологической анализ, сач-сач удмурт кыл, аспӧртэмлыко авторской верангур – тӥни со гожъяськисьлэн куинь пыкъетэз, кудъёссэ удмурт прозаик золгес но золгес киултэ [11]. Веросъёслэн валтӥсь тодметсы – пӧртэм лэчыт ужпумъёс, ваче вуонъёс пыр адямилэсь сямзэ возьматыны тыршон [5].

Берло дыръёсы потӥзы «Лыдъя, лыдъя кикые» (1988), «Тулкымъёс вылын пыжед» (1993), «И плакало небо…» – «Лемлет гондыръёс» (2000, Анатолий Демьяновлэн но Валерий Болтышевлэн берыктэмзы), «Ноктюрн» (2003) но мукет веросъёсын, повестьёсын, романъёсын книгаосыз; кылбур бичетъёсыз: «Таяз ярдурын» (1997), «Сквозь очищающий огонь» (1998, Владимир Емельяновлэн берыктэмез), «Облаков застывшие следы = Пилем синвуаське сяськаосын» (2001, Владимир Емельяновлэн берыктэмез), «Rendez-vous. Условленная встреча = Rendez-vous. Чаклам пумиськон» (2004), «Засечки на тамге» (2006), «Дубрава на луне» (2007) но мукет.

Вячеслав Ар-Серги ас кылбуръёсаз быгатыса герӟа дуннеысь туала гожъяськон ӧръёсыз но удмурт калык кырӟан-веран эсэпъёсыз. Солэн гуръёсаз кылӥсько гожъясьлэн но лыдӟисьлэн ваче синмын, артэ пуксьыса вераськон-кенешемъёссы. Ортчись улонмы, яратон-эшъяськон, толло нуналэз югыт мӧзмонэн буре ваён сярысь но ӵуказелы оскон – Адямилы но инкуазьлы но. Со оскон куддыръя аслыз авторлы осконтэмгес ик ке но потэ, та сярысь сюлмаськемзэ со тырше валась адями доры вуттыны. Шер, дыр, шедё сыӵе валась адямиос. Сыӵе ини улон йылолэз кылбурчилэн - ӵемтыны но усьыны, султыны но вамыштыны, серекъяны синву пыр. Та автор трос печатлаське кунгож сьӧрын но [2].

Туннэ Вячеслав Ар-Серги пӧртэм удысъёсын кышкатэк ужа: пичиос но бадӟымъёс понна романъёс, повестьёс, веросъёс, новеллаос, кылбуръёс. Гожъяське удмурт но ӟуч кылын. Озьы ик кылбурчи, драматург но сценарист луэменыз тодмо на. Литература сярысь солэн малпанъёсыз вылесь, тунсыкоесь, куддыръя паймымонэсь но [5].

Прозаической но поэтической гожъямъёсыз сяна, со драматической произведениосты гожъя на, куд-огъёсыз пыртэмын Удмурт Элькунысь Йӧскалык театрлэн репертуараз: «Тонэ кожай вал юг дыдык» (1989), «Лӧпшопи но Чагыр Дыдык» (1996), «Сельсовет Маня» (1998) но мукет; Удмурт кун филармониын «Ёк-макарёк» (1999) моноспектакльзэ пуктӥзы [2]. Сценариосызъя но режиссёр ужъёсызъя кӧня ке видеофильм лэсьтэмын, кудъёс тодмо гожъяськисьёслэн но литературоведъёслэн улонзылы но творчествозылы сӥземын: Михаил Федотов, Кузебай Герд, Фома Ермаков но мукетъёс сярысь.

Вячеслав Ар-Серги ныльдонлэсь трос кылбур но проза книгаосты поттӥз Удмуртиын, Россиын но куд-ог кунгож сьӧрысь кунъёсын (Словакиын, Эстониын, Финляндиын но мукет кунъёсын). Нимысьтыз изданиен потэмын «Lepkelelkek» = «Уй вадьсын – бубылиос» (Венгрия, 2005, роман), «OO niit» (Эстония, 2006, кылбуръёс), «Kopneni mornar» (Черногория, 2010, кылбуръёс) но мукет книгаосыз. Венгер кылэ берыктэм гожъямъёсыз «Komatál» (Будапешт, 2006), «Льӧм ю = Льӧмпуа юок  = Ломбо эн’ер = Zelnicemeggyes patakoska = Льӧмпу шур = Toomingajõgi = Tuomijoki = Tom’jogi» (Сыктывкар, 2008) книгаосы пыртэмын, эстон кылэ берыктэмъёсыз – «Азвесь лодка = Hõbepaat» (Таллин, 2005), «Kuum ӧӧ» (Таллин, 2006) книгаосы, чуваш кылэ берыктэмъёсыз – «Удмурт калавĕсем» (Шупашкар, 2002) книгае. Со сяна гожъямъёсыз берыктэмын англи, швед, француз, украин, белорус, бигер, пор но мукет кылъёсы.

Вячеслав Ар-Серги трос выре кылысь кылэ берыктон ужен. Берыктылэ ӟуч, бигер, пор, венгер, чуваш, азербайджан, англи кылъёсын гожъясь авторъёслэсь произведениоссэс. Соос пӧлысь тужгес но тодмоосыз – Г. Низамилэн «Лейли но Меджнун» (2001), «Вуюисьлэн бигер буёлъёсыз» (2005), «Пригов выжыысь Сандырпи Митрейлэн кылбуръёсыз» (2007), Юрий Вэллалэн «Тӧдьы куараос» (2008) но мукетъёс. «Дунай тулкымъёс – Кам ярдурын» (1997) венгер кылбуретлэн антологиезлэн составительёс пӧлысь одӥгез [8].

Вячеслав Ар-Сергилэн гожъямъёсыз «Йыр вадьсын инбам» (1984), «Голубые дали» (Саранск, 1990), «Катанчи усьтӥське» (1992), «Быльырам синкыли» (1997), «Современная литература народов России (М., 2003), «Эринтур» (Екатеринбург, 2004), «Удмурты» (М, 2005), «На переломе эпох» (2006), «Наше время» (Нижний Новгород, 2009, 2010) но мукет книгаосы пыртэмын. Нылпиос понна «Душеспи» (1992) веросъёсын сборникез потӥз, «Пичи пи но Полкан» (2005) повесть, пьесаосыз, сценкаосыз «Кизили» журналын печатласько. Произведениосыз школаослэн дышетон программаосы пыртэмын: Александра Вахрушевалэн но Аркадий Кузнецовлэн «Лыдӟон книгаязы» (1994), «Удмурт литературая антологие» (2001), «Удмурт литературе» (2008) но мукетъёсы; «Покчи эше» (2006), «Азвесь кышетэн толэзь» (2007) но мукет пичиослы хрестоматиосы но внеклассной лыдӟон книгаосы.

Сӥё-дано нимъёсыз но пусъёсыз

1990 – Флор Васильев нимо Литературной премилэн лауреатэз (Удмуртия)
1998 – Удмурт Элькунысь лулчеберет удысысь сӥё-дано ужась
2003 – Удмурт Элькунысь калык писатель
2007 – «Литературная Финно-Угрия» конкурслэн лауреатэз
2007 – «В память 1000-летия Казани» медаль
2009 – «Признание республики» премилэн лауреатэз (Удмуртия)
2009 – А. П. Чехов нимо Огъя Россиысь литературной премилэн лауреатэз

Уже кутэм литература

1. Ар-Серги В. О себе : строки к автобиографии // Rendez-vous. Условленная встреча = Rendez-vous. Чаклам пумиськон / В. Ар-Серги. – Ижевск, 2004. – С. 5–16.
2. Ар-Серги Вячеслав // Удмуртская Республика. – Ижевск, 2008. – С. 184–185.
3. Богданова Л. Лирика Ар-Серги // На переломе эпох. – Ижевск, 2006. – С. 178–181.
4. Ванюшев В. Точка роста : (о рассказах и коротких повестях Вячеслава Сергеева) // Малые жанры прозы в литературах народов Поволжья и Приуралья. – Ижевск, 1989. – С. 106–120.
5. Зайцева Т. Гожъямезъя будэ : Вячеслав Ар-Сергилэн адямилэсь пушдуннезэ эскерон амалъёсыз // Кенеш. – 2007. – № 4. – С. 94–97.
6. Зайцева Т. Принципы изображения героя и своеобразие психологизма в малых эпических жанрах (В. Сергеев, В. Котков) // Удмуртская проза второй половины XX – начала XXI века : национальный мир и человек / Т. Зайцева. – Ижевск, 2009. – С.125–152.
7. Зайцева Т. Психологизм прозы Вячеслава Ар-Серги // Современная удмуртская проза (1980–2000-е гг.) / Т. Зайцева. – Ижевск, 2006. – С. 77–94.
8. Иванова Г. Тӧдьы кагазлы лул сётӥсь // Удмурт кизилиос : очерки, зарисовки, интервью (2001-2007). – Ижевск, 2007. – С. 134–135.
9. Марданова Л. Вячеслав Ар-Серги (1962) // Писатели и литературоведы Удмуртии. – Ижевск, 2006. – С. 9.
10. Пантелеева Т. Рассказы Вячеслава Сергеева // Время и Слово. – Ижевск, 2009. – С. 425–429.
11. Романов В. Знакомьтесь: Вячеслав Сергеев // Комсомолец Удмуртии. – 1986. – 18 сент.
12. Шибанов В. Стихи прозаика В. Ар-Серги // Движение эпохи – движение литературы. – Ижевск, 2002. – С. 202–206.
13.  Шкляев А. От прозы к поэзии // Сквозь очищающий огонь / В. Ар-Серги. – Ижевск, 1998. – С. 105–108.