Русский | Удмурт

Ульфат Шайхутдинович Бадретдинов вордӥськиз 1957-тӥ арын 21-тӥ толшоре Башкортостанысь Бурай ёросысь Алтау гуртын. Семьяын кык пиос будӥзы [1].

Школаын дышетскем сяна, пияш пӧртэм ужъёсы пыриськиз, эшъёсыныз ӵош «Особый патруль» отряд кылдытӥз.  Алтауысь Егит нюлэсчиослэн ужзы быдэс кунысьтымы нылпиослы тодмо луиз.

Тямыс классъем школаез йылпумъяса,  Ульфат Бадретди­нов Можгаысь педучилищеын дышетсконзэ азьланьтӥз. Отысен со мылысь-кыдысь пыриськиз литературая кружоклэн ужаз. Кружокен со вакытэ кивалтӥзы прозаик Григорий Данилов но поэт Николай Байтеряков [6]. Дышетсконзэ йылпумъяса, Ульфат Бадретдинов ар ӵоже Башкириысь Калтасы ёросысь  Качак школаын дышетӥсь луыса ужаз. Кык ар Атыкай музъеммес утиз. Армиысь бертыса, Удмурт кун университетысь кылосбуръя факультетын визьнод люказ.

1982-тӥ арын кутске ужаны «Советской Удмуртия» газетлэн редакцияз. 1990–1992-тӥ аръёсы «Инвожо» журналын валтӥсь редакторлэн воштӥсез интыын тырше. 1992-тӥ арлэн куарусён толэзьысеныз – «Кизили» журналын валтӥсь редакторлэн воштӥсез. 1995-тӥ арлэн шорысеныз та журналлэн валтӥсь редакторез луэ [6].

Ульфат Бадретдинов мылысь-кыдысь пыриське мерлыко уже. Солэн Камсьӧр удмуртъёслэн улэм-вылэмзы но сюлэмшугъяськонъёссы сярысь гожъямъёсыз шаерысьтымы газет-журналъёсын печатласько.

Гожъяськисьлэн литература дуннее сюресэз «Дась лу!» газетысен кутскиз, шуыны луоз. 1969-тӥ арын татын солэн нырысетӥ выжыкылэз печатласькиз. Со дырысен кылбурчи газетэн кусыпъёссэ ӧз ышты ни [3]. Ульфат Бадретдиновлэн гожъяськемез туала удмурт литератураез туж узырмытэ. Солэн «ӵектэмезъя» кылдо выль ӧръёс но жанръёс [4].  Ачиз со пӧртэм арлыдо пиналъёслы гожъя. Уноез учыръёс, суредъёс, тодметъёс, геройёсыз но, аслаз улонысьтыз – пинал дыр вакытысьтыз басьтэмын. Инкуазез яратон но сое утён, эшъяськон, синмаськон, ог-огед азьын кыл кутон, серемес учыръёсы шедён, улон сюрес быръён, анай-атай юрт, выжы-кумыос, тодмоос сярысь-а вераськон мынэ – ваньмыз герӟаськемын ас палъёсыныз, дореныз, Алтау улосэн [5]. Гожъямъёсаз Ульфат Бадретдинов возьматэ, кыӵе инты басьтэ нылпиослэн улоназы инкуазь, кыӵе мылкыдъёсты со покчиослэн сюлэмъёсазы бугыртэ. Писатель вераны тырше – инкуазез саптан-быдтон адямиослэсь лул-чеберлыксэс сапта-быдтэ [4].

1988-тӥ арын дуннеез адӟиз солэн  «Сяська сюлэмын но ӝужа» веросъёсын нырысетӥ бичетэз. Берло аръёсы потӥзы «Мар луоз ӵуказе?» (1991), «Мар со кадик?» (1995),  «Ӧте...» (1997), «Серекъян – адскисьтэм кужым» (1997),  «Пальпотон но малпаськон» (2002), «Ӵушъял вордӥське веньёстэк» (2007) веросъёсын, сценкаосын, сценарийёсын, юморескаосын, кылбуръёсын, повестьёсын книгаосыз.

2000-тӥ арын «Инвожо» журналын Ульфат Бадретдиновлэн «Шордӥн» повестез печатласькиз. 2004-тӥ арын со ӟуч кылын нимысьтыз книгаен поттэмын вал. Берыктӥсез – Анатолий Демьянов. Та повесть – Башкортостанын улӥсь удмурт нылпиос сярысь нырысетӥез произведение. Солэн валтӥсь малпанэз – адямилэсь пуш дуннезэ, улонысь чеберзэ но шӧтэмзэ, ӟечсэ но уродзэ валаны дышетскон [4].

Татьяна Зайцева литературоведлэн верамезъя, Ульфат Бадретдинов пезьгыт сюжет ӧръёс утчаны тырше, лыдӟисьсэ ас сьӧраз валтэ, геройёсызлэсь куспазы вераськемзэс но инкуазь дуннеез туж усто возьматэ. Веранзэ мултэс чеберматэк, со покчи лыдӟисьёсызлы валамон кылын гожъя. Нылпиосты огшоры учыръёсысь но арбериосысь ӟечсэ, серемессэ адӟыны дышетэ. Веросъёсаз лыдӟисьёсызлы улонысь тужгес но кулэез сярысь вераськыны-кенешыны ӵектэ [4].

Ульфат Бадретдинов гожъямъёсаз огазея серемессэ но серемтэмзэ, исаськонэз но выльзэ эскеронэз. Тужгес но умой со шӧдӥське «Юнкор»  веросын, кудаз автор туж быгатыса кылын шудэ. Ульфат Бадретдинов туж умой вала но суреданы быгатэ покчи геройёсызлэсь пуш дуннезэс, соослэсь сюлмаськонъёссэс но шумпотонъёссэс  [4].

Ульфат Бадретдиновлэн куд-ог гожъямъёсыз пыризы «Азвесь кышетэн толэзь», «Покчи эше»  хрестоматиосы но лыдӟон книгаосы. Кӧняез ке кылбурез кырӟан луэмын. Крезьгур соослы гожтӥз ачиз гожъяськись.

Писательлэн гожъямъёсыз ӟуч, башкир, бигер, коми, коми-пермяк, карел, пор, мордва, эстон кылъёсы берыктэмын. Соос «Рабоче-крестьянский корреспондент», «Мурзилка», «Миша», «Луч», «Юный натуралист», «Воин России» но мукет газет-журналъёсын печатласько. «Кучыран»  веросэз  2010-тӥ арын «Литературная газетаын» потӥз.
Ульфат Бадретдинов ӟуч, финн, мадьяр, коми, башкир, бигер писательёслэсь гожъямъёссэс удмурт кылэ берыктон бордын ужа.

Сӥё-дано нимъёсыз но пусъёсыз:

2007 – Удмурт Элькунысь лулчеберет удысысь сӥё-дано ужась
2008 – Россиысь дышетон удысысь дано ужась
2010 – Эстониысь ӵыжы-выжы луись калыкъёслэн Программалэн литературной премиез

Уже кутэм литература:

  1. Бадретдинов У. БУШ – ӧвӧл буш / вераськиз О. Самигулова // Удмурт кизилиос. – Ижевск, 2007. – С. 84–85.
  2. Бадретдинов У. 56, яке «Кучыранлы» удалтӥз» // Удмурт дунне. – 2011. – 28 сент. – С. 7.
  3. Зайцева Т. Нылпиосын но нылпиослы : Ульфат Бадретдиновлы – 50 / вераськиз Г. В. Романова // Кенеш. – 2007. - № 1. – С. 92–95.
  4. Зайцева Т. Понять ребенка // Современная удмуртская проза (1980–2000-е гг.) / Т. Зайцева. – Ижевск, 2006. – С. 143–159.
  5. Лаптев А. Калык визьбурен пӧлэстэмын // Инвожо. – 2008. – № 3–4. – С. 63–67.
  6. Уваров А. Ульфат Бадретдинов (1957) // Писатели и литературоведы Удмуртии – Ижевск, 2006. – С. 13–14.