Егор Егорович Загребин вордӥськиз 1937-тӥ арын 4-тӥ пӧсьтолэзе Якшур-Бодья ёросысь Кутоншур гуртын.

Семьязы бадӟым вал, анай-атаез сизьым нылпи будэтӥзы: куать пи но одӥг ныл. Пичи дырыз война вакытэ тупаз, отын трос курадӟонэз но, адӟонэз но вал. Со вакыт сярысь гожъяськись тазьы вера: «Дедкое мушкась вал, мушъёс кадь ик ӝикыт… Тятяе но лякыт сямо вал, нош улон сое егитысен секыт адӟонэ вуттӥз… Анае пичи мугоро, юн сямо кышномурт вал, черкез кесятозь, отын ужаз, колхозэ ӧз пыры. Инмарлы оскон мылкыдыз мыным но пыӵаз… Бакчамы – 40 сотка, котыраз тэль но пудомы. Эн азьтэмъяськы – сютэм уд кулы…» [8]. Песятаезлэн но атаезлэн мушъёсын выронзы Егор Егоровичлы но паласькем. Али но со муш вордэ.

Шаркан ёросысь Сосновка гуртысь шор ёзо школаез йылпумъяса, Егор Загребин Удмурт Элькунысь крезьгуръя училищее дышетскыны пыриз. Ӝыны ар ортчыса, Анатолий Саратов режиссёр сое Удмурт театре ӧтиз Игнатий Гавриловлэн «Азин» нимо спектакляз адьютантлэсь рользэ шудыны. Озьы Егор Загребинэз театрлэн штатаз пыртӥзы.

1956–1961-тӥ аръёсы со Ленинградысь А. Н. Островский нимо театральной институтын дышетскиз. Собере Удмурт драмтеатрын актёр луыса но литература ёзэтлэн заведующиез луыса ужаз, 1972–1982-тӥ аръёсы Ижысь телестудиын режиссёр но литературно-художественной передачаослэн редакторез луыса тыршиз. 1992-тӥ арысен егитъёслэн «Инвожо» журналазы валтӥсь редакторез вал [1]. 1999-тӥ арысен Удмурт Элькунысь гожъяськисьёслэн Огазеяськонзылэн председателез луиз.

Егор Загребин – веросчи но драматург. Веросъёсысьтыз адӟыны луэ кык тодметсэ-аспӧртэмлыксэ: писатель синмаськымон гожъя инкуазьлы сӥзем вакчиесь веросъёс-зарисовкаос но зэмос улонысь учыръёс пыр кыӵе ке вакытлэсь туссэ-буйзэ суреда, адями кусыпъёс пыр обобщение-конфликт кылдытэ. Солэн веросъёсаз вань мур драматизмез, гожъяськон манераз драматург луэмез адӟиське. Со кӧня ке кылъёсын гинэ яркыт характер но мур конфликт кылдытыны быгатэ [8].

Творческой сюресэ султыны Егор Загребинлы мылкыд усьтӥз удмурт поэт Степан Широбоков. Пияшлэн нырысетӥ заметкаез дас куинь аресъем дыръяз потӥз. Инкуазь сярысь зарисовкаосыз, тылобурдоос но пӧйшуръёс сярысь малпанъёсыз потылӥзы «Советской Удмуртия» газетлэн «Натуралистлэн сэрегаз» рубрикаын. Удмурт литературае Егор Загребинлэн нимыз пыриз 60-тӥ аръёслэн шораз «Тулыс зор» пьесаен. Собере пӧртэм аръёсы потӥзы «Тӧдьы юсь» (1976), «Асьмелэн со одӥг» (1983), «Насьток но Исьток» (1990) пьесаосын сборникъёс.

Тросэз пьесаосыз театрын пуктэмын вал. Кылсярысь, «Эн кушты монэ, туганэ» пьесаез Чувашиысь К. Иванов нимо театрын шудӥзы. Ваньмаз сямен произведениосаз действие гуртын ортче яке гуртын вордскем но будэм геройёс возьматэмын. Сямъёссыя, улон шоры учкемзыя, вераськон манерзыя соос лыдӟисез вутто 1950–1980-тӥ аръёсы удмурт гуртъёсын улӥсьёс доры. Соос пӧртэмесь: ужасесь но азьтэмесь, егитэсь но пересесь, лякыт но чурыт сямоесь. Нош конфликт котьку пӧртэм луэ.

1997-тӥ арын Удмурт кун йӧскалык театр Егор Загребинлэсь «Эш-Терек» трагедизэ пуктӥз, 1998-тӥ арын – Кузебай Гердлэн 100 ар тырмонэзлы сӥзем «Кикы нош весь силе но силе» трагедизэ.

«Эш-Терекын» драматург аслыз задача пуктӥз фольклорысь но литератураысь сюжетъёсты кутыса исторической произведение кылдытыны, соин ик татын валтӥсь геройёслэн (Эш-Терек но Алсу) улон-вылонзылы сокем ик саклык уг висъя, бадӟымгес инты – кык матын улӥсь но кема дыр ӵоже ог-огенызы музъем понна ожмаськись калыёслэн – удмуртъёслэн но бигеръёслэн – улонзы [2]. «Эш-Терек» но «Кикы нош весь силе но силе» трагедиос понна Егор Загребинлы Удмурт Элькунысь Кун премия сётӥзы (2001).

Театр сцена вылын пуктон понна Егор Загребин удмурт классикъёслэн произведениоссыя инсценировкаос дасяз: Григорий Медведевлэн «Лӧзя бесмен», Михаил Коноваловлэн «Гаян», Геннадий Красильниковлэн «Арлэн кутсконэз» пьесаосъя. Озьы ик удмурт кылэ берыктӥз Александр Островскийлэсь «Светит, да не греет», «На бойком месте», Анатолий Сафроновлэсь «Странный доктор», Михаил Варфоломеевлэсь «На распутье» пьесаоссэс.

Драматургия удысын тыршем сяна, писатель нылпиослы но мӧйыослы психологической но юмористической повестьёс но веросъёс гожъя. Соос потӥзы «Нюлэс куараос» (1971), «Палэзь ӟускиос» (1978), «Секыт адӟон» (1992), «Тулыс зор» (1997), «Лебеди моего детства» (Валерий Болтышевлэн но Василий Глушковлэн берыктэмзы) книгаосын [9].

Удмурт критик но литературовед Татьяна Зайцева гожтэ, Загребинлэн улон сярысь малпанъёсаз вань одӥг туж туала луись аспект – инкуазь но адями вискын кусыпъёс. Загребинлэсь инкуазез возьматон амалзэ шуыны луоз куд-ог пӧйшуръёслэсь но тылобурдоослэсь сямъёссэс «адямиятон», адямилэсь сямъёссэ соослы сётон. Зэмос улонэз тунсыко мадёнэн кузъятыса, гожъяськись «кутэ» аспӧртэмлыко учыръёсты, соослэсь серемес но трагичной палъёссэ. Сыӵеесь «Баюкают отца», «Трясогузка», «Дятел», «Белый заяц», «Летят журавли», «Привидение» но мукет яратонэн но ӟеч мылкыдо юморен тыр веросъёсыз.

2004-тӥ арын потэм «Яратонэ, тон вожанэ…» тодэ ваёнъёсын книгае пыризы тодмо удмурт артистъёс, писательёс, авторлэн дышетӥсез но эшъёсыз сярысь веросъёс, очеркъёс но пьесаос [6].

Егор Загребинлэн веросъёсыз но пьесаосыз пыризы «Шулдыр ӝыт» (1963), «Пьесаос» (1967), ««Молотлы» 60 ар» (1986), «Выль дунне» (1991), «Катанчи усьтӥське» (1992), «Удмурты» (М., 2005), «На переломе эпох» (2006) книгаосы. Озьы ик школаослэн дышетон программаосы пыртэмын: «Лыдӟон книга» (1973, 1993, 2001, 2004), «Удмурт литература» (2008) но мукет учебникъёсы; «Дедушкин родник» (М., 1981), «Арлэн нылпиосыз» (1991), «Удмурт кыл нылпи садын» (1992), «Жильыртӥсь ошмес» (1992), «Котырысь улон но мон» (2003), «Родной земли просторы» (2004), «Покчи эше» (2006), «Азвесь кышетэн толэзь» (2007) хрестоматиосы но внеклассной лыдӟон книгаосы. Гожъямъёсыз берыктэмын ӟуч, чуваш, мари, мордва но мукет Волга котырын улӥсь калыкъёслэн кылъёсазы.

Сӥё-дано нимъёсыз но пусъёсыз

1991 – Удмурт Элькунысь искусство удысысь сӥё-дано ужась
1998 – Россиысь лулчеберет удысысь сӥё-дано ужась
2000 – Удмурт Элькунысь Кун премиез
2004 – Удмурт Элькунысь калык писатель
2005 – Михаил Петров нимо премия (Удмуртия)
2008 – Эшъяськон орден

Уже кутэм литература

1. Богомолова З. Любовь к двум музам // Время и Слово. – Ижевск, 2010. – С. 332–334.
2. Богомолова З. Слово об авторе // Лебеди моего детства /Е. Загребин. – Ижевск, 2008. – С. 171–173.
3. Загребин Е. Коньдон – со воньдон : [беседа] / записала Г. Романова // Удмурт кизилиос. – Ижевск, 2007. – С. 156–157.
4. Загребин Егор Егорович // Удмуртская Республика. – Ижевск, 2008. – С. 323.
5. Зайцева Т. Некоторые размышления о творчестве Е. Загребина // Движение эпохи – движение литературы : удмуртская литература XX века. – Ижевск, 2002. – С. 219–222.
6. Зайцева Т. Писательские воспоминания, литературные портреты // Удмуртская проза второй половины XX – начала XXI века: национальный мир и человек / Т. Зайцева. – Ижевск, 2009. – С. 249–255.
7. Кралина Н. Егор Загребин (1937) // Писатели и литературоведы Удмуртии. – Ижевск, 2006. – С. 49–50.
8. Пантелеева В. Г. Егор Загребин (1937) : улон но ужан сюресэз // Удмурт литература : 10-11-тӥ классъёслы учебник / С. Т. Арекеева [и др.]. – Ижевск, 2008. – С. 291-299.
9. Романова Г. В. Коньдон – со воньдон // Удмурт кизилиос : очерки, зарисовки, интервью (2001-2007). – Ижевск, 2007. – С. 156-157.