Василий Ванюшев вордӥськиз 1936-тӥ арын 10-тӥ тулыспалэ Кизнер ёросысь Улын Кусо-Какся гуртын. Война дыръя атаез фронтэ кошкиз, анаез ньыль нылпиеныз огназ кылиз. Кузпалызлы гожтэт гожъян понна со лыдӟиськыны-гожъяськыны дышетскиз.

Василий Ванюшев, Можгаысь педучилищеез йылпумъяса, Москваысь Ломоносов нимо университетлэн журналистъёсты дасян ёзэтаз тодон-валан басьтӥз. 1960-тӥ арын дышетсконзэ быдтэм бераз Ижкаре ужаны лыктӥз, нырысь «Советской Удмуртия», собере «Комсомолец Удмуртии» газетъёсын тыршиз. Можгаысь педучилищеын дышетскыкуз кылбуръёслы но кылбур-веросъёслы дунъет кылдытъяны кутскем мурт, газетын тыршон дыръяз но та ужлэсь ӧз куштӥськы.

Василий Михайлович кема дыр ӵоже Флор Васильевен «Комсомолец Удмуртии» газетын тыршиз валтӥсь редакторлэн воштӥсез интыын. Нуиз удмурт кылын потӥсьсэ. Дубляжлэсь мозмытскемзы но сое «Дась лу!»-эн воштэмзы бере, со басьтӥз на идеологияя ёзэтэн кивалтонэз [8].

1970-тӥ арын улон сюрес сое нош ик Муское вуттэ. Василий Ванюшев, куинь ар аспирантураын дышетскыса, диссертацизэ быдэстэ но филология наукаосъя кандидат луэ. Аспирантураын дышетскон, выль тунсыко адямиосын тодматскон тодосчилы наука удысын тыршыны кужым сётӥзы. Мускоысь бертыса, Василий Ванюшев Россиысь наукаосъя академилэн Историяя, кылъя но литературая удмурт институтлэн литературая но фольклоръя сектораз ужа [4]. Институтын удмурт литературалэсь азинскон сюрессэ, солэсь аспӧртэмлыксэ эскерыны-дышетыны кутске. 1997-тӥ арын докторской ужзэ уте.

1998–2003-тӥ аръёсы Удмурт кун университетысь удмурт кылосбуръя факультетын удмурт литературая кафедраен кивалтэ. Кандидат но доктор диссертациосты утёнъя кенешъёслэн ёзчиез луэ, аспирантураен кивалтэ.

Василий Ванюшев кык сю пала научной уж гожтӥз, соос пӧлысь тужгес тодмоосыз «Расцвет и сближение» (1980), «Вершины корнями сильны» (1987), «Творческое наследие Г. Е. Верещагина в контексте национальных литератур Урало-Поволжья» (1995) книгаос. Кык томъем «История удмуртской советской литературы» (1987, 1988) книгалэн авторской коллективлэн кивалтӥсез вал, кыл кутӥсь редакторъёсыз пӧлысь одӥгез, со сяна куд-ог люкетъёсты гожтӥз; Григорий Верещагин гожъяськисьлэсь но тодосчилэсь трос томъем гожъямъёссэ дасянэн но поттонэн кивалтӥз.

Ог дыре Василий Ванюшев Ижысь кар кенешезлэн депутатэз вал, Удмурт лулчеберетъя Огазеяськонлэн исполкомаз но быръемын вал, со сяна «Удмурт кенеш» огазеяськонлэн ёзчиез. 1975-тӥ арысен финн-угор йӧскалык конгрессъёсы пыриське.

Кылбуретэн тунсыкъяськон но кылбуръёсты гожъян мылкыд Василий Ванюшевлы пыӵатӥз Дмитрий Иванович Тимофеев дышетӥсез. Нырысетӥ кылбурзэ Василий Ванюшев ньылетӥ классын дышетскыкуз гожтӥз. Можгаысь педучилищеын душетсконъяз Екатерина Алексеевна Коноваловалэсь литературной кружоказ ветлӥз но соку ик печатласькыны кутскиз. Егит кылбурчиез синйылтӥзы тодмо удмурт писательёс Михаил Петров но Трофим Архипов. Удмурт но ӟуч кылын гожтэм рецензиосыз, очеркъёсыз, фельетонъёсыз, кылбуръёсыз шаерысьтымы газет-журналъёсын печатласькылӥзы: нырысь Можгаысь «Ленинъя» ёрос газетын, собере «Советской Удмуртия» газетын но «Молот» журналын. Соку «Егит большевик» кылдӥз на [11]. Авторлэн произведениосыз печатласькыны кутско шаермылэн палэназ но: «Литературная Россия», «Литературная газета» газетъёсын, «Урал», «Волга», «Театральная жизнь» журналъёсын но огъя бичетъёсын.

Берло потӥзы ини аслаз кылбуръёсын, поэмаосын, балладаосын сборникъёсыз: «Выжыосы» (1976), «Шунды но гудыри» (1980), «Колосок, задевший небо» (1985), «Шунды-мумы» (1990), «Салам, Шупашкар!» (Чебоксары, 1993), «Аръёсын ваче син» (1995). 2006-тӥ арын «Удмурт Выжы Книга (Иднакарын) = Как будто Книга бытия (На Иднакаре)» (Анатолий Демьяновлэн берыктэмез) нимо историко-философской поэма гожтӥз.

Василий Ванюшевлэн кылбуран дуннеяз граждан тематикалы сӥзем ужъёсыз тужгес висъямон луо. Быдӟым тыложлы сӥзем чуръёсыз но, ас вордскем палъёсыз пумысен сюлмаськонъёсыз но (солэн вордскем Кусо-Какся гуртэз али быремын ни), выльдӥськон бере кылдэм шугадӟонъёс но, тодос удысысь малпанъёсыз но (Иднакар пумысен, Г. Верещагинлэн кылосбурез пумысен), удмурт кылэз, удмуртлыкмес утьыны тыршонъёсыз но – ваньмыз со литератураямы яркыт пытьы кельтӥз [11].

Удмурт критик Алексей Ермолаев гожтӥз, Василий Ванюшев кылбуръёсаз ӵемысь удмурт фольклорысь элементъёсты уже кутэ шуыса, традиционной удмурт тӥрлыкъёсты туала дыръёслы мудрон тупатыса сётэ, вуж поэтической образлэн валатонэзлы выль усьтон сётэ.

Василий Ванюшевлэн гожъямъёсыз пыртэмын «Чипчирган» (М., 1985), «На просторах земных» (1990), «Как молния в ночи» (1998), «Удмурт калавĕсем» (Шупашкар, 2002, чуваш кылын), «Опаленный подвиг батыра» (2003), «Эринтур» Юграысь писательёслэн альманахазы (Екатеринбург, 2004), «Азвесь лодка = Hõbepaat» (Таллин, 2005, эстон кылын) но мукет книгаосы.

Василий Ванюшев нылпиослы но гожъя. Пичи лыдӟиськисьёс понна поттӥз «Вить чиньы – одӥг кикур» (1982) кылбуръёсын книга, «Солнечный каравай» (М., 1983, Алексей Кондратьевлэн берыктэмез), «Меми гожтэт = Мамино письмо» поэма (2006). Отын Быдӟым Отечественной ожысь учыръёс нылпи синъёсын возьматэмын, ӵемысь авторлэн улонысьтыз басьтэмын. Одӥг семьялэн улонэз пыр возьматӥське фронтлэн но ожлэсь палэнын улонлэн ваче луэмзы, отын вордӥське быронтэм яратон, астэ жалятэк нюръяськон, анайёслэн курадӟонзы шараяське.

Василий Ванюшевлэн гожъямъёсыз удмурт литератураез дышетонъя школьной программаосы пыртэмын: Александра Вахрушевалэн но Аркадий Кузнецовлэн «Лыдӟон книгаязы» (1993), «Удмурт литературая антологияе» (2001), «Удмурт литература» (2003) книгае. Озьы ик пыризы «Дедушкин родник» (М., 1981), «Котырысь улон но мон» (2003), «Родной земли просторы» (2004), «Зарни дэремен шунды» (2006), «Азвесь кышетэн толэзь» (2007) но мукет покчиослы лыдӟон хрестоматиосы но внеклассной лыдӟон книгаосы.

Василий Ванюшев Михаил Худяковлэсь «Песнь об удмуртских батырах» эпоссэ удмурт кылэ берыктӥз, берло со пӧрмиз «Дорвыжы» (2004) эпической поэмалы. Со сяна, гожъяськись венгер, финн, француз, коми, чуваш, литва, ӟуч поэтъёслэсь кылбуръёссэс удмурт кылэ берыктылэ.

Василий Ванюшев кык люкето «Мултанское дело» (1994) публицистической кинолэн одӥгез авторез луэ, озьы ик «Дети с небес» кинолэн (2006) но авторез. Евгения Копысова композитор солэн кылбуръёсыз вылэ крезьгур гожтыса пӧрмытӥз «Удмуртские любовные игры» кантата, «Молитва» кырӟан, «Кисель» серемес кырӟан, «Встреча друзей» («Пумиськон») но «Италмас» нылпиослы кырӟанъёс. Соосты кырӟало ГТРК «Удмуртия»-лэн Академической капеллаез, Удмурт кун симфонической оркестр, «Ингур» пиослэн хорзы, озьы ик пӧртэм мукет кырӟасьёс. Озьы ик Василий Ванюшевлэн гожъямъёсызлы крезьгур гожъязы Геннадий Бекманов, Геннадий Корепанов-Камский, Пантелей Кузнецов, Андрей Ураськин но мукетъёс.

Сӥё-дано нимъёсыз но пусъёсыз

1986 – Удмурт Элькунысь лулчеберет удысысь сӥё-дано ужась
1992 – И. Я. Яковлевлэсь нимзэ нуллӥсь Огъя чуваш йӧскалык премилэн лауреатэз (Чувашия)
1995 – Удмурт Элькунысь тодос удысысь сӥё-дано ужась, Чуваш Элькунысь лулчберет удысысь сӥё-дано ужась
1996 – Удмурт Элькунысь Кун премиез
2001 – Удмурт Элькунлэн Данъян грамотаез
2006 – Удмурт Элькунысь калык писатель
2009 – Кузебай Герд нимо Огъя удмурт йӧскалык премия
2012 – Эшъяськон орден

Уже кутэм литература

1. Богомолова З. Василий Ванюшев (1936) // Писатели и литературоведы Удмуртии. – Ижевск, 2006. – С. 123–124.
2. Ванюшев Василий Михайлович // Институт: история и современность. – Ижевск, 2001. – С. 260–261.
3. Ванюшев Василий Михайлович // Удмуртская Республика. – Ижевск, 2000. – С. 218.
4. Волкова Т. «Шаермылы визьмыд кулэ дыръя…» // Вордскем кыл. – 2006. – № 1. – С. 30–31.
5. Ермолаев А. Росткам расти до неба // Колосок, задевший небо / В. Ванюшев. – Ижевск, 1985. – С. 3–4.
6. Красновская Е. «Почему ты, родник, вытекаешь, звеня?» // Содружество двух муз / Е. Красновская. – Ижевск, 2004. – С. 164–171.
7. Кутянова Л. Нити судьбы // Удмуртская правда. – 1996. – 13 февр.
8. Лаптев А. «Культура одӥг калык пушкы гинэ кенерамын ӧвӧл» // «Тӥ учке ӵемгес ӵукпала…» : кылдунъетъёс, кылужъёс, юан-валэктонъёс / А. М. Лаптев. – Ижевск, 2008. – С. 192–200.
9. Христолюбова Л. Ванюшев Василий Михайлович // Ученые-удмурты / Л. Христолюбова. – Ижевск, 1997. – С. 232–234.
10. Шибанов В. «И потаенна сила родника...» // Вордскем кыл = Родное слово. – 2011. – № 1. – С. 34–38.
11. Шибанов В. Дорвыжымы сярысь сюлмаськыса : Василий Ванюшевлы – 75 // Кенеш. – 2011. – № 2. – С. 93–101.