Виктор Леонидович Шибанов вордӥськиз 1962-тӥ арын 7-тӥ южтолэзе Глаз ёросысь Котгуртын.

Ваньмыз пичиысен кутске, куке тынад вӧзад анаед но атаед, нош Виктор понна – песянаез но. Анна Федотовна, кудӥз вордскиз 1891-тӥ арын, бадӟым но секыт улонэз адӟиз. Пересь муртлэн веранэз-даурез – со вашкала мадёсъёсты, пӧртэм выжыкылъёсты, ишанъёсты тодэ ваён; черсыны пуксе ке, вашкала уйпал крезьёсты «маде», губияны яке ӵемгес эмъюм турын-куар, пыштурын бичаны мынэ ке, вӧзысьтыз пияшлы будосъёс сярысь мар но со маде, азьвылзэ тодаз вае. Ваньмыз та Викторлэн йырвизьмаз пыӵатэк ӧз кыльы. Анаез но атаез – Людмила Григорьевна но Леонид Павлович – вазь ӵукнаысен бер ӝытозь колхоз луд вылын тыршизы. Шибановъёслэн семьязы бадӟым гинэ вал: ньыль пи (Виктор куинетӥез) но ныл. Бадӟым агайёсыз вӧзын пияш пичи дырысеныз гурт котырысь ужлы дышиз, бадӟымъёсыз вӧзын чупрес тыршылӥз: турнан яке пу дасян-а, бакча копан яке картошка октон-а. Сотэк одӥг уж но ӧз ортчылы. Азьланяз но ужез яратон солэн вираз ик пыӵаз, лэся: тыршыса дышетскиз, стройбатын службазэ ортчиз [2].

Котгуртысь школаез йылпумъяса, 1979–1984-тӥ аръёсы Виктор Шибанов Удмурт кун университетысь кылосбуръя факультетын дышетсконзэ азьланьтӥз. Университетэ дышетскыны пырыкуз Викторлэн литература-кылбурет удысэ сюлмыз золгес кыскылӥз. Владимир Романовлэн бурдъямезъя, кыкетӥ курс бере Москвае выжыны малпа вал, кытын оглом писательёсты дасяло. Но ӧз удалты… Берло тодмо профессор Б. О. Корман (Д. А. Яшинлэн ӵектэмезъя) Викторлы наукае мыныны сюрес сӥзиз [1].

1984–1985-тӥ аръёсы Ленинградысь госуниверситетын стажировка ортчиз, нош 1985–1990-тӥ аръёсы отын ик очно дышетскиз аспирантураын. Бронез ӧвӧлэн, Викторез армие басьто. Ар но ӝыны со Уфа котырын горд сюй гудӥз (службазэ стройбатын ортчиз) [9].

1990-тӥ арын Виктор Шибанов филологи наукаосъя кандидат луэ. 1992-тӥ арын – старший преподаватель, нош 1997-тӥ арын – доцент. 1996-1997, 1997-1998-тӥ аръёсы Хельсинкиын стажировка ортче [4]. 

Виктор Шибановлэн, аслаз верамезъя, улонэз осьминоглэн теориезъя ортче. Ужъёсыз пӧртэм-пӧртэм ӧръёсын бызё. Одӥгез университетысь ужен герӟаськемын, лекциос, диплом ужъёс. Административной уж но нуэ – 2000-тӥ арысен научной ужъёсъя деканлэн юрттӥсез. Озьы ик тырше Дышетӥсьёслэсь тодон-валанзэс будэтонъя институтын. Со дыре ик 5–6 классъёслы литератураен книгаосты выльдон бордын ужа. «Вордскем кыл», «Инвожо» но «Кенеш» изданиослэн редколлегиязы пыре. Со ик Удмуртиысь писательёслэн огазеяськоназы кивалтэтлэн ёзчиез, отын кыл кутэ финн-угор литературной дуннеен кусыпъёс понна. 1996-тӥ арысен Виктор Леонидович финн-угор писательёслэн Калыккуспо ассоциацизылэн кивалтэтаз ёзчиез луэ. Таиз ласянь ваньмаз сямен финн-угор писательёслэн ортчись конгрессъёслэн ужазы пыриське [1].

2001-тӥ арын Виктор Шибанов Россиысь гожъяськисьёслэн Огазеяськоназы пыриз. Озьы ик Удмуртиысь Кун Кенешлэн Председателез бордын усьтэм удмурт кылъя термино-орфографической комиссиезлэн ёзчиез луиз.

Виктор Шибанов туж трос научной статья гожтӥз, со сяна пӧртэм книгаосты но: «Под тенью Зэрпала» (1997, С. Васильевен ӵош), «Кылбурлэн паймымон дуннеез» (1994), «Удмуртская литература XX века: направления и тенденции развития» (1999), «Движение эпохи – движение литературы» (2001); 6-тӥ но 9-тӥ классъёслы «Удмурт литература» (2003, 2009; 2007) учебник-хрестоматия, 8-11 классъёслы удмурт литературая антология (2001, Финляндиысь М. А. Кастрен нимо огазеяськонлэн проектэз).

Кунгожсьӧр литератураен тунсыкъяськонэз, кудӥз кутскиз аспирантураын, Виктор Леонидовичез 1997–2001-тӥ аръёсы бадӟым проект борды кутскытэ: солы дэмлазы радиоэфирын ӝынычасъем «Дунне кизилиос» передача нуыны, кытын удмурт кылын дунне вылысь кизилиос сярысь верасал. Дасямын вал сюлэсь ятыр тунсыко радиопередачаос [1]. 

Виктор Шибанов удмуртъёс пӧлын нырысетӥез адями, кин удмурт литература пумысен аслаз чаклан-эскеронъёсаз «этнофутуризм», «постмодернизм» валатонъёсыз пыртӥз. Со оглом удмурт литератураез но нимысьтыз удмурт кылбуретэз огъя дуннелы возьматыны тырше [8]. Та ужпумъя эскеронъёсыз пӧртэм изданиосын потыло – Москваын, Сыктывкарын, Будапештын, Тартуын, США-ын но мукет интыосын. Тодосчи кусыпъёс возе кунгож сьӧрысь коллегаосыныз. Кылъёсты тодэмез – финн, немец, англи (ӟучсэ но удмуртсэ вератэк) – солы пӧртэм шаеръёсысь тодосчиосын кусыпъёс юнматыны юрттэ.

Кылбуръёсаз поэт языческо-мифологической мотивъёсты возьматэ. Виктор Шибановлэн кылбуръёсаз миф меӵак «син азьын», со лирической сюжетэз герӟась инъет луэ. Пӧртэм кыл чеберман амалъёсты – ӵошатонэз, витьымтэ шорысь артэ пуктонэз, метафораез, гиперболаез – уже кутыса выль утчанъёслы сӥзе, тросаз учыръёсы «азвесь даурысь» ӟуч футуристъёслы матэктэ.

Виктор Шибановлэн нырысетӥ кылбуръёсыз куатетӥ классын дышетскыкуз ини «Дась лу!» газетын печатласькизы. Тодмо удмурт кылбурчи Владимир Романов соосты синйылтӥз но соку ик пияшен ужаны кутскиз. Пинал кылбурчи куатетӥ классысен кутскыса котькуд ар элькунысь егитъёслэн творческой семинаръёсазы пыриськылӥз. Удмурт кун университетын дышетскыкуз, Даниил Яшин удмурт кылбурчилэн но тодосчилэн литературной кружоказ ветлӥз. 1982-тӥ арын «Выль ужъёсы ӧтё» (1982) нимын нырысетӥ кылбур сборниксэ поттӥз ини. Авторезлы соку 20 арес гинэ вал. Та книгалы вылӥ дунъет сётыса вазиськиз удмурт литературая критикмы Людмила Кутянова [7]. Берлогес потӥзы «Сюлэмам шунды» (1988), «Бертӥсько уйшоре» (1991), «Ӧс» (2003), «Toomingavari» (2006) кылбур бичетъёсыз.

Виктор Шибановлэн кылбуръёсызлы рос-прос дунъет сётэ литературовед Зоя Богомолова [2]. Гожъяськисьлэн творческой утчаськонъёсыз туала гурт но кар, язычество но христианство, умоез но уродэз вискын чукам адямилэсь психологизэ усьтон пала ӧръяське [5].

Виктор Шибановлэн кылбуръёсыз пыртэмын «Чипчирган» (М., 1985), «Вордскем музъем-аныкае = Родная мать-земля» (1990), «Родной земли просторы» (2004), «Удмурты» (М., 2005) книгаосы, «Эринтур» нимын потэм Юграысь гожъяськисьёслэн альманахазы (Екатеринбург, 2004). Эстон кылын кылбуръёсыз печатласькизы «Азвесь лодка = Hõbepaat» (Таллинн, 2005), «Kuumӧӧ» (Таллинн, 2006), «Neiujakaru» (Тарту, 2005) книгаосын; венгер, коми, эстон кылъёсы берыктэмъёсыз – «Льӧм ю = Льӧмпуаюок = Ломбоэн’ер = Zelnicemeggyes patakocska = Льӧмпу шур = Toomingajȏgi = Tuomijoki = Tom’jogi» (Сыктывкар, 2008) книгаосын.

Со сяна, Виктор Шибанов ӟуч, пор, мордва, эстон, финн, немец, ингушет кылъёсысь гожъямъёсты берыктылэ.

Сӥё-дано нимъёсыз но пусъесыз

1993 – Владимир Романов нимо литературной премилэн лауреатэз (Удмуртия)
2002 – Удмурт Элькунысь кивалтэтлэн Данъян грамотаез
2003 – «Литературная Россия» газетлэн премиезлэн лауреатэз
2004 – Удмурт Элькунысь лулчеберет удысысь сӥё-дано ужась
2007 – Удмурт Элькунысь Кун премилэн лауреатэз

Уже кутэм литература

1. Абазашвили Л. Виктор Шибанов // Инвожо. – 2010. – № 7–8. – С. 102–104.
2. Богомолова З. «Усточиез жильыяны кулэ…» // Вордскем кыл. – 2004. – № 4. – С. 78–85 ; № 5–6. – С. 63–73.
3. Бусыгина Л. Миф и реальность в поэзии В. Л. Шибанова // Время и слово. – Ижевск, 2010. – С. 442–444.
4. Зверева Т. Виктор Шибанов (1962) // Писатели и литературоведы Удмуртии. – Ижевск, 2006. – С. 123–124.
5. Зуева-Измайлова А. Архетип Мирового Древа // Инвожо. – 2009. –N 5/6. – С. 20–31.
6. Кириллова Р. Художественная роль цветовой символики : (поэтика В. Шибанова) // Время и слово. – Ижевск, 2010. – С. 464–469.
7. Кутянова Л. Нюръяськон пыр – азьлань // Советской Удмуртия. – 1983. – 14 янв.
8. Матвеев С. Кылбурчи но кылбур // Кенеш – 2003. – № 1. - С. 65–72.
9. Рябинина З. Солы керемет но сётэ берекет // Удмурт кизилиос : очерки, зарисовки, интервью (2001-2007). – Ижевск, 2007. – С. 12–13.
10. Христолюбова Л. Шибанов Виктор Леонидович // Ученые-удмурты / Л. Христолюбова. – Ижевск, 1997. – С. 355–356.
11. Шибанов Виктор Леонидович // Удмуртская Республика. – Ижевск, 2000. – С. 761.