Федор (Фатихян) Пукрокович Пукроков вордӥськиз 1937-тӥ арын 16-тӥ шуркынмонэ Башкириысь Татышлы ёросысь Сирпогуртын (Вязовка). Семьязы шоро-куспо вал, соин ик «кулак выжы» адӟонлэсь ӧз пегӟе. Ярам ай, гуртысьтызы ӧз поттэ. Отӥяз ини анаез но атаез колхозын ужазы. Фатых семьяын куатетӥез, берпуметӥез нылпи вал. Анаез сое 41 арес дыръяз ваем на. Солэсь азьло Тимур пиез пичи дыръяз ик пӧсьвуаськыса кулэм. Туж, пе, ӟеч, визьмо но сабырлы пияш вылэм. Фатихян пичи дырысеныз бадӟым агаезлы туж вожъяськыса будӥз. Вань ужъёссэ, вамышсэ агаеныз ӵошатылӥз: кызьы Тимур созэ яке тазэ ужез лэсьтысал меда, шуса [3].

Будӥз пияш Башкир музъем вылын, бигер гуртъёс пӧлы пуксем удмурт гуртын. Соин ик со пичиысен пӧртэм калыкъёслэсь культуразэс, кылзэс, сям-йылолъёссэс гажаны но валаны дышиз [1].

Дышетскиз Федор Выль Татышлыысь сизьым классъем школаын, Бигинеево шор ёзо школаын. Литераурной кружоклэн старостаез вал но школыаысьтызы киын гожъям журналлэн редакторез.

Дас классэз йылпумъяса, вуоно кылбурчи Ижысь механической институтэ дышетскыны пыриз. Дышетскон куспаз сюлэмезлы кельшымон удыс бырйымтэзэ вала но витетӥ курсысен, дышетсконзэ йылпумъятэк, институтысь кошке. Чидасьтэм сюлэмо пияш комсомоллэн путёвкаезъя котыр ласянь ушъямон (образцовой) гурт улон лэсьтон борды басьтӥське – Красногорск ёросысь Ленин нимо колхозэ мынэ. Нырысь плотник, собере тракторист луыса ужа. Собере витетӥ курсын Гурт удысъя институтын (Сельскохозяйственной институт) одӥг семестр дышетске [4]. Нырысь-валысь ваньмыз умой мынӥз кадь гуртын ужзы. «Комсомольская правда» газет быдэс бамзэ но висъялляз ӟырдыт мылкыдоослы. Отын ужакуз эшъёсыз но, колхозникъёс но ушъязы удмурт пияшез. Но бадӟым малпан ӧз быдэсмы. Куашканлэн мугез кивалтӥсьёссы бордысен кутскиз кадь [2].

1963-тӥ арын Фёдор колхозын кык ар пала ужамез бере, Москваысь Ломоносов нимо кун университетысь философия факультетэ дышетскыны пыриз. Огшоры дышетӥсь гинэ, пе, луэме ӧз поты. Улонлэсь мургес сӥоссэ, законъёссэ тодэме потӥз, соин ик, пе, отчы вамыштӥ [4]. 1969-тӥ арын дышетсконзэ йылпумъяз но Ижысь медициная институтын философилы дышетӥз. Озьы Фёдор Пукроков удмуртъёс пӧлысь нырысетӥез дышетскем философ луиз [5]. 1978-тӥ арысен «Удмуртия» книгапоттонние интыяське – гожъяськон удыслы но гожъяськисьёслы матэ. 1985–1993 аръёсы «Молот» но «Инвожо» журналъёсын ужа [4].

Нырысетӥ кылбурзэ Фёдор гожтӥз ньылетӥ классын дышетскыкуз. Со кема оскыса улӥз, ачиз аспӧртэмлыко кылбур гожтӥз шуыса. Но куке соку валаз – со А. Пушкинлэсь кылбурзэ ас сяменыз берыктэм ук. Возьдаськеменыз пияш сюй пыдсы выйыны дась вал. Берло малпаз, ма со быдӟым поэт ук солы юрттэм… Нош сизьыметӥ классысен тюрагай сярысь кылбур кылдытӥз [3]. Выль Татышлы школаысь литературной кружоке ветлӥсь пиналъёс Ленинлы, Сталинлы, коммунизмлы сӥзьыса кылбуръёс гожъязы. Но берлогес Фёдялы возьыт луиз со гожъямъёсыз понна. Со кутӥз но сутӥз со журналзэс… [3]. Студент дыръяз ини Федя Пукроков кутске гожъяськыны. Куд-ог ужъёссэ печатлало ини ёросысьтыз газетазы, собере шаерысьтымы «Советской Удмуртия» газетын, «Молот» журналын. Берлогес «Аврора», «Урал», «Волга» журналъёсын. Мединститутын ужакуз но со писательёсын, журналистъёсын кусыпъёссэ ӧз ыштылы, дырын-дырын вуылӥз редакциосы, выль гожтэм чуръёссэ вуттылӥз [2]. Фёдор Пукроковлэн кылбуръёсыныз «Вылӥысен учкем потэ» нырысетӥ бичетэз 1969-тӥ арын потӥз. Собере вал «Думем тӧл» (1973), «Сюресъёс» (1980), «Ошмес син» (1984) кылбурен гожтэм роман-малпаськонэз, «В пути» (1983), «Тайна трёх иллюзий» (1990), «Кизили ныл» (1997), «Родниковое око» (2010) но мукетъёсыз [5]. Фёдор Пукроков пӧртэм жанрен гожъяськись писатель: кылбур, поэма, выжыкыл, верос, очерк, роман, пьеса. Со удмурт сям-йылолъёсты, кылэз ӟеч, мур тодэ, улонысь ужпумъёсты яркыт, оскымон суреданы быгатэ. Гожъяськоназ Фёдор Пукроков удмут куриськонъёсты, вӧсяськон кылъёсты но пыртэ: «Инбаме выль толэзь ӝужаку, песяе вӧсяське вал котьку: сёты, выль толэзе, выль синдэ, мон уг вунэты ноку та ӟечтэ». Индылон, чакласькон: «Бодыедлэн пумыз ведь кык, шонер вера вылэм калык, – лулӟиськылэ ини Герей, – огпол пумитаз шуккод муртэ, мукет пумыз аслыд йӧтэ» [1].

Кылбурен гожъямъёссэ чакласа, адӟыны луэ – поэтлэн сюлэмыз тужгес но «висе» удмурт калыклэсь лулзэ умойтэм сямъёслэсь но мылкыдъёслэсь утён пумысь. Та сярысь сюлмаськыса, со гожъя инкуазьлы сӥзем чуръёс. Огшоры ужасез – дояркаез я механизаторез данъясь кылбуръёс, улонысь пӧртэм югдуръёс пумысен малпаськонъёссэ – философской вераськонъёссэ. Куке кылбурчи улонлэсь сӥоссэ ас чакламез, улон опытэз пыр бугыртыса чакла-эскере, соку чуръёсыз бадӟым малпанэн, яркыт образъёсын но сюлэмез вырӟытӥсь мылкыдъёсын узырмо. Тужгес но та ласянь пусйымон луэ «Ошмес син» кылбурен роман малпаськонэз. Та кылбурен гожтэм роман удмурт литератураын нырысетӥез луэ. Произведенилэн удалтэм но удалтымтэ палъёсыз сярысь трос вераз Анна Зуева «Молот» журналын потэм статьяяз (1985, 9 №). Пукроковлэн та книгаезлы критик ӟеч дунъет сётӥз [4].

Проза амалэн гожтэм произведениосысьтыз но адӟыны луэ, Федор Пукроковлэн сюжетъёсыз улонысь басьтэмын. «Макмыр» веросэз мурдалаезъя драмалы матын. Адямилэн улонысьтыз тужгес бадӟым кайгырон вакытсэ басьтыса, писатель, бугроез пумен сэратэм сямен, чырткем, таза, ужась, яратӥсь кузпаллэсь но атайлэсь тордослы пӧрмемзэ шарая [1].

«Кизили ныл» книгазэ но чакласа, отын роман но кык повестьёс пыртэмын, адӟиськомы, асьсэ пуштросэнызы соос улонысь лэчыт ужпумъёсты ӝуто. Син азе сайкыт пуксё егитъёс. Соослэн улонзы пӧртэм сямен азьланьске. Но ваньзэсты огазея ог-огдэ, атай юрттэ но дор музъемдэ гажан, ненег яратонэз утьыны тыршон мылкыд.

Фёдор Пукроков гожъяз драматической произведениос но. Одӥгез соос пӧлысь – «Корка пырон» пьесаез Удмурт кун театрын 1984-тӥ арын пуктэмын вал. Со сяна, Федор Пукроков гожъя очеркъёс, рецензиос.

Кылбурчилэн куд-ог гожъямъёсыз кырӟанлы пӧрмизы (крезьгурез гожъязы Владимир Возняков, Геннадий Ганьков, Августа Семенова но мукетъёс). Озьы ик со удмурт кылэ берыктылӥз ӟуч, бигер, башкир, мордва, финн гожъяськисьёслэсь произведениоссэс.

Уже кутэм литература

1. Пантелеева Т. Дуннеез котыр ласянь адӟись // Кенеш. – 2007. – № 11-12. – С. 96–100.
2. Перевощиков С. Пельтӥз ке ыртӧл // Вордскем кыл. – 1997. – № 6. – С. 53–55.
3. Пукроков Ф. От автора // Тайна трёх иллюзий. – Ижевск, 1990. – С. 4–11.
4. Айтуганова Л. Мед шедьтоз сюрессэ «Ошмес син» // Удмурт дунне. – 1997. – 18 нояб. – С. 3.
5. Фёдор Пукроковлы – 70 // Кенеш. – 2007. – № 11-12. – С. 96–97.
6. Лаптев А. «Мынам вань улонэ – выль сюрес утчан» // «Тӥ учке ӵемгес ӵукпала…» / А. Лаптев. – Ижевск, 2008. – С. 213–221.
7. Шибанов В. «Мон шедьтӥ вордскыны кык вапум висъёсы...» // Кенеш. – 2012. – № 11–12. – С. 76–80.