Анатолий Аркадьевич Перевозчиков вордӥськиз 1947-тӥ арын 24-тӥ тулыспалэ Пичи Пурга ёросысь Байситово гуртын. Анаез, Нина Михайловна Титова, начальной классъёсын дышетӥсь луыса ужаз, атаез – механизатор. Семьяязы вить нылпи вал, Анатолий – бадӟымез.

Ас гуртаз начальной школаез йылпумъяса, Анатолий дышетскиз Аксакшур сизьым классъем школаын. Пияшлэн арганчи но, суредась но луэмез потэ вал. Но школаязы кружокъёс урод ужамен вань быгатонлыкъёссэ волятыны, муромытыны ӧз кылды. Сизьыметӥ классын дышетскыкуз соос доры вуиз удмурт кылъя но литературая дышетӥсь Раиса Ивановна Покоева. Со ас вакытаз пединститутын Семён Самсоновен ӵош одӥг группаын дышетскем. Раиса Ивановналэн кылбуръёсыз газет бамъёсын печатласько ни вылэм. Со ик школаязы кылдытӥз литературно-творческой кружок, дышетӥз пиналъёсты калык творчествоез люканы, кылбур-веросъёс гожъяны. Кружоклэн ужаз пыриськиз егит пияш но [5].

Анатолий Перевозчиков Удмурт кун пединститутысь (туала дыре Удмурт кун университет) кылосбуръя факультетсэ йылпумъяз. Студент дыръяз Даниил Яшин кылбурчилэн но литературоведлэн литературно-творческой кружоказ ветлӥз. 1969–1970-тӥ аръёсы Совето Армиын служить кариз. Бертыса, Пичи Пурга ёросысь Аксакшур школаын удмурт кылъя но литературая дышетӥсь луыса ужаз, литературной кружок радъяз, собере Дэри ёросысь Лудорвай школае выжиз.

1975–1984-тӥ аръёсы Анатолий Перевозчиков «Дась лу!» газетын литсотрудник луыса тыршиз, отын солы шуд усиз Герман Ходыревен, Вячеслав Михайловен, Григорий Симаковен, Николай Бигбашевен, Клавдия Дзюинаен, Вениамин Ившинэн, Елена Глебоваен ӵош ужаны. 1984-тӥ арысен со Удмуртиысь гожъяськисьёслэн Огазеяськонзылэн художественной литератураез вӧлмытон бюроаз ужаз. 1986–1989-тӥ аръёсы «Молот» журналын тыршиз, 1989-тӥ арысен нош «Советской Удмуртия» газетын, 1990-тӥ арысен – «Вордскем кыл» журналын. 1999-тӥ арысен Пичи Пурга ёросысь Кечол гуртысь шор ёзо школаын «Тылгизьы» нимо литературной кружоклэн кивалтӥсез вал, 2007-тӥ арысен – Байситовоысь школаын.

Анатолий Перевозчиков кылбуръёсаз но прозаяз вордскем шаерезлы, ужась адямиослы, яратонлы дан сётэ. «Шудон» нимо нырысетӥ кылбурез 1961-тӥ арын «Молот» журналын печатламын вал. Кылбур сборникъёсыз: «Мон малпасько вал» (1980), «Гажанлэн выжыосыз» (1984), «Зэмлык синъёс» (1989), «Йырчукин» (1997).

Критик, литературовед Виктор Шибанов «Йырчукин» книгаез эскеронъяз, малпанэ вуэ, со постмодерн шӧмо шуыса. «Анатолий Перевозчиков огвакытэ улонысь зэмлык вылэ но, культураысь чеберлыко дунне вылэ но пыкъяське. Та малпанэз кылбуръёслэн пуш герӟетъёссы но юнмато. Книгалэн паймымон бадӟым люкетэз Кылбурлы но кылбуран темалы сӥземын. Выльдӥськон ортчемъя улонмы йырин-чукин берытскиз бере, азьвыл дунъетъёс но чеберлыкез валэктонъёс кымаськизы бере, Анатолий Перевозчиков понна зэмос улонэз – реальностез – кылбуран дунне воштӥз». Анатолий Перевозчиков ӵем реминисценция уже кутэ, бичетлэн культурно-литературной контекстэз пӧртэм пумо (Анна Ахматова, Константин Бальмонт, Флор Васильев, Марина Цветаева, Шекспир но мукетъёс) [8].

Критик, литературовед Зоя Богомолова гожтэ, Анатолий Перевозчиковлэн кылбуретаз трос пӧртэм тема пумиське шуыса. Валтӥсез отын – улон сярысь, бадӟым но покчи вордскем шаер сярысь, адями лул, дыр, ортчись аръёс сярысь малпаськонъёс [2]. Валтӥсь мотивъёсыз: война но тупаса улон, кырӟанлэн образэз, адями. Анатолий Перевозчиковлэн кылбуретаз инкуазь явлениос адямиослэн улонъёсазы но лулъёсазы ялан пыро – сюлмаськыто яке шулдырто [2]. Автор уно выль кылъёсты но аспӧртэмлыко кыл оборотъёсты уже кутэ.

Зоя Богомолова пусъе, пӧртэм жанръёсын быгатонлыксэ чакласа, кылбурчи «вакчи» кылбурлы, ньыль чуръем кылбурлы вазиське шуыса, угось соос пичиесь ке но, трос визьлык нуо [2]. Наталья Атнабаева кылосбур тодосъёсъя кандидатлэн малпамезъя, Анатолий Перевозчиковлэн сонет творчествояз шӧдске традициослэн но новаторстволэн огазеяськонзы. Со сонетист-экспериментатор, творчествояз пӧртэм сонет формаос пото, кудъёс сонет искусстволэсь пӧртэм техникаосты возьмато [1].

1995-тӥ арын Анатолий Перевозчиковлэн потӥз «Чулпон» нимо книгаез. Отчы пыризы веросъёс, юморескаос, очеркъёс пыризы.
Трос аръёс ӵоже Анатолий Перевозчиков эскериз финн, эстон, ӟуч, бигер, шундыӝужан палан улӥсь калыкъёслэн эпосъёссэс, Гомерлэсь «Илиадазэ», собере соос вылэ пыкиськыса гожтӥз «Донды батыр, солэн пиосыз но Уйпери сярысь кузьмадёс-кырӟан» (2006) книга. Берло аръёсы гожъяськись удмурт эпосэз эскерыны кутскиз.

Анатолий Перевозчиковлэн гожъямъёсыз пыртэмын «Пыд улын музъем»(1977), «Горизонт» (1980), «Встреча друзей» (Пермь, 1981), «Горизонт-82» (1982), «Между Волгой и Уралом» (1982), Глеб Пагиревлэн «От берега к берегу» книгаяз (1984), «Чипчирган» (М., 1985), «Побратимы» (1988), «Вордскем музъем-аныкае» (1990), «Быльырам синкыли» (1997), Александр Шкляевлэн «Эшъёс-юлтошъёс» (2004), «Азвесь лодка = Hõbepaat» (Таллин, 2005, эстон кылын), «На переломе эпох» (2006) коллективной бичетъёсы; озьы ик печатласькизы «Аврора», «Уральский следопыт», «Юность», «Литературная Россия» газет-журналъёсын.

Нылпиослы гожтэм выжыкылъёсыз, веросъёсыз, кылбуръёсыз печатласько «Ӟечбур!», «Кизили» но «Вордскем кыл» газет-журналъёсын. ««Вордскем кыллэн» книжкаез» сериын потӥзы «Шунды пыры» (1996), «Звездная ночь» (2007, Игорь Мазнинлэн берыктэмез), «Мон будӥ ке – паймод» (2010), «Пу коньки» (2011) книгаос; со сяна, гожъямъёсыз пыртэмын «Солнышко» (1987), «Вуюись» (1990), «Зарни дэремен шунды» (2006) книгаосы.

Анатолий Перевозчиковлэн кылбуретэз крезьгуро луэменыз висъяське. Тросэз кылбуръёсыз кырӟанлы пӧрмемын, соослы крезьгур гожъязы Екатерина Антонова, Валентин Карпов, Виталий Шоркин но мукетъёс. Тужгес но тодмо луиз Геннадий Бекмановлэн «Аргурезь» кырӟанэз.
Гожъяськисьлэн кылбуръёсыз берыктэмын ӟуч, чуваш, белорус кылъёсы. Ачиз нош автор удмурт кылэ берыктылэ ӟуч, пор, эстон кылъёсысь гожъямъёсты.

Сӥё-дано нимъёсыз но пусъёсыз

1997 – Удмурт Элькунысь лулчеберет удысысь сӥё-дано ужась

Уже кутэм литература

1. Атнабаева Н. Три этапа развития удмуртского сонета // Историко-педагогический опыт и проблемы разработки учебно-методических изданий в Удмуртии на современном этапе. – Ижевск, 2007. – С. 197–200.
2. Богомолова З. Анатолий Перевозчиков // Малопургинская земля – моя родина. – Ижевск, 2002. – С. 327–330.
3. Ермаков Ф. Перевозчиков Анатолий Аркадьевич // Пурга ёросын вордскем писательёслэн творчествозы / Ф. Ермаков. – Ижевск, 1999. – С. 125–134.
4. Перевозчиков А. Аргурезь йылын узвесь-а зор? / вераськиз Е. Виноградова // Удмурт дунне. – 2002. – 22 февр.
5. Перевозчиков А. Кутскон сётӥз… шудон // Ӟечбур! – 2007. – 22 февр. – С. 11, 15.
6. Тимирзянова И. Эра эпоса? // Обучение родному языку в полиязычном пространстве. – Ижевск, 2010. – С. 191–194.
7. Уваров А. Анатолий Перевозчиков (1947) // Писатели и литературоведы Удмуртии. – Ижевск, 2006. – С. 89–90.
8. Шибанов В. Классикъёслэсь дышетскыса // Вордскем кыл. – 2005. – № 8. – С. 44–48.
9. Шкляев А. Перевозчиков Анатолий Аркадьевич // Удмуртская Республика. – Ижевск, 2008. – С. 533.