Лидия Степановна Нянькина вордӥськиз 1965-тӥ арын 23-тӥ куарусёнэ Алнаш ёросысь Серп гуртын. Апаезлэсь но солэн эшезлэсь адӟем карыса, пичи дырысеныз ик гожъяськыны кутске. Ужъёссэ «Дась лу!» газетэ ысъялля. Солы кылбуръёс, веросъёс гожъяны кельше. Озьы нылаш та газетлэн одӥгез азьветлӥсь юнкорез луэ. Школаысен туж яратыса литературно-творческой кружоке ветлэ.

Тямыс классъем школаез йылпумъяса, Лидия Можгаысь педучилищее дышетскыны пыриз. Школаын но училищеын дышетскыкуз литературно-творческой кружоке ветлӥз.

1984–1986-тӥ аръёсы Лидия Нянькина Дэри ёросысь школаын начальной классъёсын дышетӥсь луыса ужаз. Заочно дышетскиз Удмурт кун университетысь кылосбуръя факультетын. Удмурт Элькунысь гожъяськисьёслэн Огазеяськонзылэн ӵектэмезъя, 1986-тӥ арын А. М. Горький нимо Литературной институтлэн чеберлыко литератураез берыктон люкетаз пыриз. 1991-тӥ арын дышетсконзэ йылпумъяса, одӥг арзэ "Кизили" журналын валтӥсь редактор луыса тыршиз, 1992-тӥ арысен кема аръёс ӵоже «Инвожо» журналлэн редакцияз публицистика, поэзия но проза ёзэтъёсаз ужаз. 2009-тӥ арысен «Кенеш» журналын ужаны кутске.

2003-тӥ арын Тюмень улосысь Ишим карын радъям егитъёслэн Всесоюзной литературной семинаразы пыриське. Солэсь прозазэ вылӥ дунъяло но, отысен ик Россиысь гожъяськисьёслэн Огазеяськоназы куто.

Лидия Нянькина туала удмурт прозаын одӥгез тужгес но яркытэз гожъяськись. Нырысетӥ ужъёсыз потӥзы 1978-тӥ арын «Дась лу!» газетлэн «Ӵушъял» рубрикаяз. «Ваёбыж кар» нимо нырысетӥ веросъёсын но повестен бичетэз 1996-тӥ арын потӥз. Критик, литературовед Любовь Федорова гожтэ, Лидия Нянькиналэн нырысетӥ книгаез потэменыз удмурт литератураын выль нылкышно проза сярысь вераськыны кутскизы шуыса. Егит прозаиклэн литературной творчествоез удмурт критикъёслэн син азязы сюриз. Эскерисьёс пусйизы темаослэсь, сюжетъёслэсь, произведениосызлэн геройёсызлэсь аспӧртэмлыксэс, веросъёсаз зэмлыко но синпӧртман мотивъёслэн сураськемзы.

Лидия Нянькина XX даурлэсь берпуметӥ аръёссэ аслаз мертэтэныз мерта, сюлэмыз пирсэкъяса, шоканэз пытсаськымон лулӟылыса но жаляса гожъя со асьме каръян вакытмы сярысь, адямилэн сьӧд вирын сурам-пожам визь-лулыз сярысь, огназ улонэ ӝимем муртлэн шал-шал бушесь но кезьытэсь уй-нуналъёсыз сярысь. Прозаиклэн быдэс творчествоезлы инъет выллем луо кык пӧртэм улон интыос: бадӟым город аслаз валэктыны луонтэм сямъёсыныз, выросъёсыныз, катъёсыныз, лек но жоб кылъёсыныз, ог-огзылэсь палэнскем, or-огзэс ыштэм адямиосыныз («Мынам мусо папа Карлое», «Лара», «Ой, буралоз, буралоз...») но вордэм музъемезлэн гогы бордаз бурмем пичи удмурт гурт («Ваёбыж кар», «Шуд пуйы», «Шузи-Мази», «Имитация»). Автор шӧдэ, татын но адями кусыпъёс тэшкало ини шуыса. Пичи дырзэ тодаз вайыса, азьлозэ туннэеныз ӵошатыса, табере ини гуртсэ жалян мылкыдъёс улӟо. Нылкышно гожъясь созэ но, тазэ но улон интыосты валаны тырше, ӟиго-ӟуго учыръёсы шедем адямиослэсь малпан-мылкыдъёссэс сэрттэ-пертче. Кылсярысь, городысь яратонэз суредакуз, Лидия Нянькина ӵем выже эротикае, юромо шудтэм, палдурес, мӧзмыт, осконтэм, воштыны луонтэм учыръёсты быръе. Нош гуртысь яратон сярысь со гожъя шыпыт-шуныт кылъёсын, коня ке серемпыр но вожъяськыса, малы ке шуоно прозаиклы татын ваньмыз валамон но оскымон потэ [5].

Лидия Нянькина одӥг кадь ӟырдыт мылкыдын суреда пиосмуртъёсты но нылкышноосты, пересьёсты но егитъёсты, гурт калыкез но творчествоен герӟаськем адямиосты. Но вань солэн тужгес но яратоно героез — гуртын улӥсь арлыдтэм воргорон («Шузи-Мази»). Со кӧня ке шузи-мази, котьмалы оскись, юмокъёсы шедись, ас вактаз усем мурт, ӵемысь чылкак огназ. Нош ассэ авторез но лыдӟисьёсты паймытэ котыр улосэз юн яратыны быгатэменыз, эрико луэменыз, инкуазьлэн куронъёсызъя каньыл но огшоры, мултэссэ курытэк но керӟегъяськытэк улэменыз. Та бадӟым дуннеын солы туж пичи инты кулэ — аслаз коркаез. Лидия Нянькиналэн асьсэды йӧн-йӧн возись геройёсын таӵе веросъёсыз туннэ удмурт гуртлэсь пуш кужымзэ, ӵуказе нуналлы осконзэ шараяло, луоз. Кузёосын вунэтэм пичи гуртъёсын улӥсь таӵе адямилыко воргоронъёс вылын возиське на, дыр, каръян дуннемы но [5].

Веросъёс гожъям сяна, егит автор кылбуран удысын но быгатэмзэ возьматӥз ини. 2004-тӥ арын Лидия Нянькиналэн «Синучкон» кылбур бичетэз потӥз. Автор кылбур яратӥсьёслы выль образъёс вае, тодмо малпанъёсты выль сямен пертче, мукет сяменгес усьтэ. Солэсь чуръёссэ нокинэн уд сура: соку ик шӧдӥсько аслаз тусыз но куараез [5].

Удмурт поэзие вуиз выль героиня – гетера. Ку вал со, куке возьдаськись, кепырась, кышкась, ненег удмурт нылаш калык кылымон ачиз сярысь озьы вераны быгатысал? Удмурт поэзиын ӧй вал на сыӵеез. Лидия Нянькиналэн кылбуръёсыз зол ик палдыса кылё огъя нылкышно кылбуран сюреслэсь. Та поэтесса туж музон луэ. Лирической героиняез солэн быдэс дунне литературае потэ [8].

Лидия Нянькина нылпиослы но гожъя. 2009-тӥ арын «Удмуртия» книгапоттонниын потӥзы «Косьтэй но Кыстыбей» но «Ческыт кӧмеч» книгаосыз; нылпиослы гожъямъёсыз пыризы «Азвесь кышетэн толэзь» (2007) семьяен лыдӟон книгае, «Камсьöр батыр но Инсьöр нылаш» (2011) литературной выжыкылъёсын бичетэ но школаын удмурт литератураез дышетон программае.

Лидия Нянькина шаерысьтымы вань газет-журналъёсын печатлаське, озьы ик мукет элькунъёсысь периодикаын но. Гожъямъёсыз пыртэмын «Инӟарекъян» (1991), «Быльырам синкыли» (1997), «Азвесь лодка = Hõbepaat» (Таллин, 2005, эстон кылын), «Neiu ja karu» (Тарту, 2005, эстон кылын), «Kuum ӧӧ» (Таллин, 2006, эстон кылын) книгаосы.
Ачиз Лидия Нянькина удмурт кылэ берыктэ ӟуч, финн, коми, француз но мукет кылъёсысь гожъямъёсты; ӟуч кылэ – удмурт кылбурчилэсь Ашальчи Окилэсь веросъёссэ. Лидия Нянькиналэн кылбуръёсызлы крезьгур гожъязы Геннадий Ганьков, Сергей Кириллов, Пантелей Кузнецов, Николай Постников, Василий Старших, Надежда Уткина но мукет крезьгурчиос. Гожъяськон ужезлы сӥземын документальной фильм, сое дасяз Вера Пантелеева критик но литературовед.

Сӥё-дано нимъёсыз но пусъёсыз

1998 – Ашальчи Оки нимо Йӧскалык премилэн лауреатэз (Удмуртия)

Уже кутэм литература

1. Зайцева Т. Удмуртская проза новой волны // Удмуртская правда. – 1998. – 8 июля.
2. Зверева Т. «Возрождение» образа гетеры в современной удмуртской поэзии // Женщины и общество: вопросы теории, методологии и социальных исследований. – Ижевск, 1998. – С. 373–374.
3. Зверева Т. Лидия Нянькина (1965) // Писатели и литературоведы Удмуртии. – Ижевск, 2006. – С. 88.
4. Федорова Л. Проза Лидии Нянькиной: традиции и новации (гендерное прочтение) // Вестник Удмуртского университета. – 2010. – Вып. 4. – С. 131–136.
5. Фёдорова Л. Лидия Нянькина (1965) ; «Мон – гетера...» // Удмурт нылкышно кылбуретлэн тулкымъёсыз / Л. Фёдорова. – Ижевск, 2007. – С. 278, 295–303.
6. Христолюбова Л. Нянькина Лидия Степановна (23.09.1965) // Удмуртские женщины, ХХ век / Л. Христолюбова. – Ижевск, 2002. – С. 312.
7. Шибанов В. Черты этнофутуризма и постмодернизма в современной удмуртской литературе / В. Шибанов, Н. Кондратьева // Удмуртская литература ХХ века: направления и тенденции развития. – Ижевск, 1999. – С. 258–289.
8. Зверева Т. Удмурт поэзиын – выль героиня // Инвожо. – 1997. – № 3. - С. 17–19.