Владимир Пантелеевич Михайлов вордӥськиз 1957-тӥ арын 10-тӥ куартолэзе Можга ёросысь Ягул-Какси (туала дыре Вуж Юбера гурт пушкы пыре) гуртын. Семьяязы ньыль нылпи вал. Пичи Вовик 9-тӥ куартолэзе вордскиз, нош кагазэ 10-тӥ куартолэзе гожтӥзы: атаез озьы куриз. Пантелей Михайлович – гуртысьтызы нырысетӥ шофёр но тракторист – ож вакытэ снарядъёс ворттӥз, машинаеныз Берлинозь вуиз. Соин ик Вормон Нуналэз нокыӵе мукет праздникъёсын сурамез ӧз поты – пиезлэн вордскем нуналэныз но [3]. Куамын укмыс аресъем дыръяз, Пантелей Михайлович аварие сюрыса быриз. Анаезлы Ксения Николаевналы ньыль нылпизэ огназ будэтыны кулэ луиз [1].

Владимир Михайлов Вуж Юбераысь тямыс классъем школаын но Можгаысь шор ёзо школаын дышетскиз. Вуж Юбераысь школаез Пётр Бабкинлэсь нимзэ нуллэ вал. Герой сярысь книга гожтыкузы, доразы Владимир Голубев писатель, Герман Ходырев кылбурчи, Антон Шнайдер тодмо туспуктӥсь вуылӥзы. Соос нылпиосын лулысь-сюлмысь вераськизы, сюлмазы гожъяськон гизьы уськытыны тыршизы. Тыршемзы юнме ӧз луы: пиналъёслэн ужъёссы «Советской Удмуртия», «Дась лу»!» газетъёсын поталлязы. Володялэсь но кылбурзэ газетын печатлазы. Со вал кылбурет дуннее нырысетӥ вамышез [1].

Школаез йылпумъяса, Владимир Михайлов Удмурт кун университетысь кылосбуръя факультетэ пыриз. Студент дыръяз Даниил Яшинлэн литературая кружоказ ветлыны кутскиз. Михаил Федотов тодмо кылбурчиен но мукет эшъёсыныз ӵош «Егит куараос», «Инвожо» бордгазет потталлязы, ог вакытэ Володя солэн валтӥсь редакторез но луылӥз.

1979-тӥ арын Владимир Михайловез Яр ёросысь Лековай школае дышетыны келязы, «Советской Удмуртия» газетлэн редакцияз кельто ке но вал. Улонэзлэсь тазьы берытскемзэ со бӧрысь дунъяз ни. Школаын литературая но кылъя урокъёсты нуэм сяна, немец кыллы дышетӥз, физкультурая, ужъя урокъёсты но нуиз, интернатын воспитатель но вал. Берло куинь арзэ школалэн директорез вал ини [2].

1982-тӥ арын Элькунысьтымы гожъяськисьёслэн Огазеяськонзылэн тӧроез Александр Шкляев Владимир Михайловез дораз ужаны басьтӥз. Вить ар ӵоже литконсультантын но литератураез вӧлмытонъя бюроын тыршемез бере Удмурт радиое кошконо кариськиз. Озьы Владимир Михайлов радиоын 1987-тӥ арысен тырше ини. Нырысь ужаз иворъёсъя редакциын, собере — литературая но драмая редакциын. Солэсь капчи мылкыдын, мактаськыса гожъямъёссэ тодыса, Удмурт радиоын ужасьёс серемес веранъёсын быдэс сузьет дасяны дэмлазы. Озьы кылдӥз «Ладилэн азбарез» программа. Со быдэсак кылбуръёсын но крезьгуръёсын дасямын. Отчы артистьёс, писательёс, журналистъёс ӵемысь пыриськыло. Радио кылзӥсьёслы «Ладилэн азбарез» туж яраз. Бӧрысьгес «Чуки-беки» передача кылдӥз. Соиз но калыке ӝог вӧлмиз [2].

Владимир Михайлов нырысь ик нылпи кылбурчи кадь тодмо. Со туж умой вала нылпи психологиез, образной кылын чебер вераськыны быгатэ но эмоциосты шонер суреда. «Лобӟы, лобӟы, дыдыке» нимо нылпиослы нырысетӥ кылбур бичетэз 1988-тӥ арын потӥз. 2007-тӥ арын «Пужыё дэрем» но «Светофор» кылбур бичетъёсыз дуннеез адӟизы (ӟуч кылэ берыктӥзы Владимир Емельянов, Владимир Новиков, Герасим Иванцов, Владимир Созонов).

Нылпиослы гожтэм кылбуръёсыз шаерысьтымы йӧскалык нылпи литературалэн фондаз пыртэмын; «Вуюись» (1990), «Жильыртӥсь ошмес» (1992), «Покчи эше» (1992, 2006), «Котырысь улон но мон» (2003), «Зарни дэремен шунды» (2006) покчиослы хрестоматиосы но внеклассной лыдӟон книгаосы пыртэмын. «Грибник», «Вот так гриб!», «Бабушка», «Чиполлино», «Сказочное село» (Владимир Емельяновлэн берыктэмез) кылбуръёсты 2005-тӥ арын Мускоын поттэм «Удмурты» книгае пыртӥзы.

Кылбурчилэн жингрес чуръёсызлы крезьгурчиос но синмасько. Солэн кылъёсызъя чебересь кырӟанъёс кылдытӥзы Пантелей Кузнецов, Геннадий Павлов, Светлана Белых, Зинаида Антонова.

Растем Заппаров прозаиклэн но публицистлэн верамезъя, кылбурчи возьматэ ке но вылтуссыя огшоры но синме йӧтӥсьтэм улонысь суредъёсты, соослэн одно ик дышетӥсь ёзнэтсы вань, автор тырше нылпилэсь малпаськон манерзэ кулэ луись ӧре берыктыны [7].

Удмурт Элькунысь дышетӥсьёслэсь тодон-валанзэс будэтонъя но выльдонъя институтын ужась, культурологияя но филологи дышетонъя кафедраысь доцент Светлана Скопкарева пусъе, Владимир Михайловлэн кылбуръёсыз пӧртэм темаослы сӥземын шуыса: пинал дырлы («Мама, полечи!», «Бабушка», «Сказочное лето»); ужлы но нылпилэн калык пӧлын интыяськемезлы («Мы дождя не испугались», «Шустрая швея», «Светофор»); инкуазьлы но пӧйшуръёслы («Я – щенок», «Кто стелил?», «Новый домик», «Солнышко», «Дождь» но мукет). Кылбуръёсызлэн геройёсыз луыны быгато нылпиос но, пӧйшуръёс но, куддыръя инкуазь явлениос но: зор, пильмаськон, пери, гудыри, шунды но мукет.

Владимир Михайловлэн кылбурет дуннеяз классической нылпи литератураысь сямъёс инты шедьтӥзы, тужгес но Агния Бартолэн. Сыӵе ик капчи, юри индылӥсьтэм, валамон гожъян стиль, озьы ке но, со уг люкеты пиналлы нодбуро дунлыкъёсты пыӵатыны [8].

Удмуртиысь социально-педагогической колледжын ужась дышетӥсьлэн Василя Хакимовалэн малпамезъя, Владимир Михайловлэн нылпи литератураез шунды тылэн, яркыт буёлъёсын, ӟеч энергиен тырмемын шуыса. Произведениосаз нылпилэн лулпушкыз психология ласянь туж усто возьматэмын. Владимир Михайловлэн гожъян манерыз фольклорлы матын: ӵем дыръя кылъёсын шудэ, ӝогверанъёс, исаськонъёс, лыдъяськонъёс кылдытэ [10].

Удмурт кылбурчи Ада Диева Владимир Михайловлэн творчествоез сярысь вера, со тужгес но кыллэн узырлыкез ласянь аспӧртэмлыко луэ шуыса. Автор быгатэ нылпилэсь визьзэ, малпанъёссэ имитировать карыны. Со сяна, стиль но содержание ласянь аспӧртэмлыкез луэ юмор. Нылпи психологиез мур валаса, кылбурчи героезлэсь пуш дуннезэ быгатыса кылдытэ [5].

Владимир Михайлов мӧйыослы но гожъя. Шаерысьтымы «Инвожо», «Кенеш», «Луч» журналъёсын, «Удмурт дунне» газетын печатласько юморескаосыз, фельетонъёсыз, басняосыз, кылбуръёсыз. Куд-ог ужъёсыз «Йыр вадьсын инбам» (1984) нимо коллективной сборнике пыртэмын. Таллинын потэм «Азвесь лодка = Hõbepaat» (2005) книгае пыриз «Черкын» нимо кылбурез.

Владимир Михайлов кылысь кылэ берыктон бордын но трос ужа. Берыктэ ӟуч, пор, венгер писательёслэсь гожъямъёссэс. 1997-тӥ арын Ижкарын потэм «Дунай тулкымъёс – Кам ярдурын» венгер литературалэн антологиысьтыз троссэ кылбуръёсты со берыктӥз.

Радиожурналист луыса, Владимир Михайлов сюлэсь трос радиоочерк дасяз Удмуртиысь лулчеберет удысын ужась адямиос сярысь. Всероссийской радиолэн фондъёсаз возиське солэн сценариезъя гожтэм «Лопшо Педунь но Алдар» радиоспектакль но А. С. Пушкинлэн «Капитанская дочка» повестезъя лэсьтэм радиофильм.

Сӥё-дано нимъёс но пусъёс

1994 – Удмурт Элькунысь сӥё-дано журналист
1995 – Россиысь «Сибирский тракт» радиофестивальлэн лауреатэз
1997 – Удмурт Элькунысь Кун Кенешлэн Данъян грамотаез
1998 – Россиысь журналистъёслэн Огазеяськонзылэн «Серебряное перо» пуссы
2002 – ВГТРК-лэн Данъян грамотаез, «Сибирский тракт» радиофестивальлэн лауреатэз
2004 – «Сибирский тракт» радиофестивальлэн лауреатэз, Владимир Романов нимо Литературной премилэн лауреатэз (Удмуртия)
2007 – Удмурт Элькунысь Кун Кенешлэн Данъян грамотаез
2010 – «Патриотическая Россия» СМИ-лэн Огъя Росси конкурслэн дипломантэз, «Сибирский тракт» радиофестивальлэн лауреатэз
2011 – Удмурт Элькунысь лулчеберет удысысь сӥё-дано ужась, «Патриотическая Россия» конкурслэн дипломантэз, «Удмурт кенеш» Огъя удмурт ассоциацилэн Данъян грамотаез (Удмуртия), «Дэмен» удмурт лулчеберетъя Огазеяськонлэн Трокай Борисов нимо премилэн лауреатэз

Уже кутэм литература

1. Богомолова З. Становление личности : [беседа] / записала Решитько М. В. // Италмас. – 2008. – № 1. – С. 15–19.
2. Гаврилова М. Ладилэн бадӟым азбарез // Кенеш. – 2007. – № 4. – С.89–93.
3. Гаврилова М. Юморчи // Удмурт дунне. – 2009. – 14 апр. – С. 8.
4. Гаврилова-Решитько М. Ладилэн бадӟым азбарез // Кенеш. – 2007. – № 4. – С. 89–93.
5. Диева А. Мир поэзии Владимира Михайлова // Финно-угорские этносы: технологии развития в условиях глобализации. – Ижевск, 2010. – С. 163–165.
6. Ермолина А. Кызьы пичи Вовик бадӟым Лади луиз // Ӟечбур! – 2004. – 8 апр. – С. 6–7.
7. Заппаров Р. Поэт Владимир Пантелеевич Михайлов // Литературные встречи / Р. Заппаров. – Ижевск, 2007. – С. 47–48
8. Скопкарева С. Светлое, доброе, вечное... // Италмас. – 2011. – № 2. – С. 76–77.
9. Уваров А. Владимир Михайлов (1957) // Писатели и литературоведы Удмуртии. – Ижевск, 2006. – С. 85.
10. Хакимова В. Главный герой стихов – ребенок// Время и слово : голоса соврем. филологов Удмуртии. – Ижевск, 2010. – С. 469–471.