Сергей Васильевич Матвеев вордӥськиз 1964-тӥ арын 7-тӥ гудырикошконэ Вавож ёросысь Квашур гуртын. Атаез, Василий Петрович тракторист луыса ужаз, анаез Нина Ивановна – скал кыскись [4]. Семьяязы вить нылпи вал.

Сергей Матвеев Вавож ёросысь ик Брызгалово шор ёзо школаын дышетскиз. Сое йылпумъяса, кытчы мыныны уг тоды вал. Но удмурт кылъя но литературая дышетӥсез дэмлаз Удмурт кун университетэ филологияя факультетэ пырыны, кылбуръёс, пе, гожъяськод ук. Пияш верамзэ пеляз понӥз. Капчиен ортчиз конкурсэз. Экзаменын ӵап Даниил Александрович Яшин кылбурчи доры кемдӥз. Со но синйылтэм ни вылэм Сергейлэсь газетын потэм кылбуръёссэ. Студент дыръяз мылысь-кыдысь пыриськиз литературно-творческой кружоклэн ужаз. Кивалтӥсьсы Даниил Яшин вал. 1986–1988-тӥ аръёсы Казахстанын но Алтайын армиын служить кариз. Армия бере ог дас ар Сергей Матвеев тырше журналистика удысын. Унозэ «Дась лу!»-ын. Со ортчем аръёссэ али но шунытэн тодаз вае. Командировкае потанъёс, пӧртэм адямиосын пумиськылонъёс туж тунсыко потылӥзы солы [2].

1993-тӥ арын «Инвожо» журналлэн сотрудникез луэ, но со арын ик выже «Удмуртия» книжной издательствое чеберлыко но нылпиослы книга поттон ёзэтлэн редакторез луыса [4].

Кылбуран мылкыдыз сайказ школаын дышетскыкуз. 1980-тӥ арын «Дась лу!» газетын печатласькиз нырысетӥ кылбурез. «Эшъяськон» нимаське вал со. Собере ужъёсыз печатласькизы шаерысьтымы «Кенеш», «Инвожо», «Кизили», «Луч» журналъёсын; «Советской Удмуртия», «Удмурт дунне», «Дась лу!» но куд-ог ёрос газетъёсын [4].

Нимысьтыз потэм кылбур бичетъёсыз: «Мылкыд» (1991), «Лул» (1994), «Чурыт пус» (1999), «Фиолет» (2002, Владимир Емельяновлэн берыктэмез), «Ma kandun mööda linnuteed» (Таллин, 2006), «Инсьӧр пӧртмаськонъёс» (2011), «Сквозь призму ветров» (2011).

Сергей Матвеевлэн кылбурет дуннеезлэн шорсюлмыз — улонэз но ассэ каргась герой. Соин ӵош ик ассэ ачиз гинэ яратӥсь герой. Со уг кышка лул-сюлэмзэ вӧлак усьтыны, сьӧлыкъёссэ шараяны: одӥг Инмарлы гинэ вӧсяське, нош Инмарезлэн нимыз — эрик [9]. «Мон пыртос та улонын», — шуэ со ачиз сярысь ваньмаз кылбур бичетъёсаз. Кылбурчилэн героез ассэ пыртосэн лыдъя яратонэныз артэ но, атай юртаз но, быдэс улонын но [7].

Сергей Матвеевлэн лирической героез гуртын вордӥськемын, нош туннэ карын улэ, со выжыоссэ ыштэ ни шуыса шӧдэ, нош номыр лэсьтэмез уг луы. Со ноку но уз луы ни музъемез гырись-кизись, со уг тоды ни калык кырӟанъёсты («Нош гуртам пытьые ни кӧсаз...»). Карез адӟемпотостэм каре ке но («Из квартира монэ кутыса, / Мыжыказ пачкатэ но шона...»), Матвеевлэн лирической героезлэн дореныз но кусыпъёсыз шугесь, секытэсь, ӟиго-ӟугоесь. Дор со понна ӧвӧл ни дор выжы герд, со — бурмонтэм висён, огдырлы гинэ буйгатскон, малы ке шуоно солэн ӧвӧл татын аслаз киыныз ӝутэм юртэз, семьяез, мерттэм писпуэз. Лирической герой выльысь каре пегӟе. Огнамо улонлэсь Сергей Матвеевлэн героез уг кышка, уг кӧбера, со сое вите но данъя («Ӟеч но бур тон, Улон! / Нош ик мон одӥгнам...»). Та мылкыд вылын возиське солэн быдэс кылбуретэз [7].

Юридик тодосъёсъя доктор, Россиысь тодос удысысь сӥё-дано ужась, Удмурт Элькунысь лулчеберет удысысь сӥё-дано ужась Николай Витрук гожтэ, Сергей Матвеевлэн лирикаез удмурт кылбурет дуннеын выль бам усьтэ шуыса. Тематикая, дуннеез шӧдонъя со выль, стилезъя но образъёсты кутэмезъя но аспӧрэмлыко. Удмурт Элькунысь калык кылбурчи Владимир Емельянов «Фиолет» (2002) кылбур сборникезлы предисловияз «удмурт кылбуретлэн азвесь вакытэзлэн» кутскисез шуыса юнме ӧз нима сое, нош кылбуретэзлэн выжыосыз, пе, шундыпуксён палась но ӟуч классикъёслэн гуманистической поэзиязы луо. Куд-ог эскерисьёс Сергей Матвеевлэсь кылбуретсэ постмодерн яке этнофутуризм ӧръёсъя эскере [1].

Вера Пантелеева критиклэн но литературоведлэн малпамезъя, Сергей Матвеевлэн лирической героез наивной романтик но ассэ гинэ яратӥсь мурт, крестьян пияш но городысь эркын улонэн кудӟытэм творческой адями, гурт улонлэсь нравственной палъёссэ данъясь но цивилизациен сӧриськем егит мурт [8].

Сергей Матвеевлэн «Чорыглэсь лушкам кылбуранъёс» (2005) роман-уйбыртонэз удмурт литератураын нош ик одӥгез паймымон чеберлыко уж луиз, талэсь азьло автор лыдӟисьёссэ паймытӥз вал ини «Шузи» (1995) роман-зулёнэныз но «Ъ» (1999) кылбур бичетэныз. Выль роман-уйбыртонэз пусъемын кунгож сьӧрын. Та ужез понна автор 2007-тӥ арын Эстониысь «Фенно-Угрия» огазеяськонэн литератураын ялэм ӵошатсконын чеберлыко ужъёс пӧлын нырысетӥ инты басьтӥз [10]. 

Критик, литературовед Виктор Шибанов пусъе, автор аслэсьтыз прозаической произведенилэсь жанрзэ «роман-уйбыртон» нима шуыса, пушказ пыре 129 лиро-эпичекой миниатюраослы укшась люкет. Пуштросэз юри сӧриськемын, интригаез ватэмын суредъёслэн мозаик выллем вошъяськоназы но топоссылэн вошъяськоназы, со «лабиринт» образ пыр радъяське [9].

Ачиз автор кылбуранэз пумысен вера: «Котькуд адями дунне вылэ огшоры гинэ уг вордӥськы. Солы кыӵе ке но миссия сётэмын, сое вань улонэз пыр нуыны-быдэстыны кулэ. Мон доры тае шӧдон-валан аръёс ортчыса гинэ вуиз… Егит дыръям кылбуръёсы, веросъёсы вордӥськылӥзы… Малпалляй – со шузияськон гинэ. Нош али валасько: Инкуазен сётэмын. Урод-а, умой-а быдэстӥсько та куронэз, уг тодӥськы, но со – мынам» [5].

Сергей Матвеевлэн гожъямъёсыз пыртэмын «Йыр вадьсын инбам» (1984), «Инӟарекъян» (1991), «Уна рӧма сикӧтш» (Сыктывкар, 2002, коми кылын), «Эринтур» (Екатеринбург, 2004), «Удмурты» (М., 2005), «Зарни дэремен шунды» (2006), «Азвесь кышетэн толэзь» (2007), «Удмурт литературая антология» (2001) книгаосы; эстон кылэ берыктэмъёсыз пыризы «Азвесь лодка = Hõbepaat» (Таллин, 2005), «Neiu ja karu» (Тарту, 2005), «Kuum ӧӧ» (Таллин, 2006) книгаосы.

Кылбурчи удмурт кылэ берыктылэ ӟуч (Александр Пушкин, Николай Некрасов, Сергей Есенин но мукетъёс), белорус, коми, мордва, финн гожъяськисьёслэсь произведениоссэс. Венгер гожъяськисьёслэсь (Миклош Радноти, Эндре Ади но мук.) тросэз берыктэмъёсыз пыризы «Дунай тулкымъёс – Кам ярдурын» (1997) антологие.

Сӥё-дано нимъёсыз но пусъёсыз

1996 – Флор Васильев нимо премилэн лауреатэз (Удмуртия)
2004 – Удмурт Элькунысь лулчеберет удысысь сӥё-дано ужась
2007 – Эстониысь «Фенно-Угрия» огазеяськонлэн премиезлэн лауреатэз, Эстониысь ӵыжы-выжы луись калыкъёслэн Программазылэн литературной премилэн лауреатэз

Уже кутэм литература

1. Витрук Н. Сергей Есенин и новые поколения удмуртских поэтов // Сергей Есенин в контексте удмуртской поэзии и искусства: удмуртская есениниана / Н. Витрук. – Ижевск, 2005. – С. 45–121.
2. Возняков В. Со сярысь Америкаын но гожъяло // Удмурт дунне. – 2001. – 27 июль. – С. 4–5. - (Удмурт кизилиос).
3. Зайцева Т. Современная удмуртская проза: проблемы, поиски, решения // Современная удмуртская проза (1980–2000-е гг.) / Т. Зайцева. – Ижевск, 2006. – С. 5–14.
4. Зверева Т. Сергей Матвеев (1964) // Писатели и литературоведы Удмуртии. – Ижевск, 2006. – С. 82.
5. Матвеев С. Сергей Матвеев // Инвожо. – 2007. – № 3–4. – С. 6–7.
6. Пантелеева В. Матвеев Сергей Васильевич // Удмуртская Республика – Ижевск, 2008. – С. 466–467.
7. Пантелеева В. Сергей Матвеев // Удмурт литература : 10–11-тӥ классъёслы учебник / С. Т. Арекеева [и др.]. – Ижевск, 2008. – С. 321–323.
8. Пантелеева В. Философские основы лирики С. Матвеева // Четвертая Российская университетско-академическая научно-практическая конференция. – Ижевск, 1999. – Ч. 3. – С. 164–165.
9. Шибанов В. Второе дыхание удмуртской прозы // Италмас. – 2009. – № 1. – С. 10–12.
10. Шибанов В. Выль эскеронъёслэн емышсы // Кенеш. – 2008. – № 1. – С. 94–98.