Владислав Германович Кириллов вордӥськиз 1956-тӥ арын 2-тӥ толсуре Можга ёросысь Атабай ӟуч гуртын. «Пинал дырысеныз ик пӧртэм-пӧртэм интыосын улоно луиз. Татарстанысь Ошторма-Юмья (Улынгурт) – соос пӧлысь одӥгез пусйымонэз. Атаез Герман Кириллов тодмо дышетӥсь но кылбурчи бере, соос доры Ошторма-Юмьяе ӵем гинэ куноос вуылӥзы, кылсярысь, кылбурчиос Гай Сабитов, Александр Вотяков, тодосчи Георгий Архипов, аспирант-этнограф Владимир Владыкин но трос мукетъёсыз. Пичи пияш понна сыӵе пумиськонъёс яркыт пытьы кельтӥзы. Нырысь гожтосъёссэ Владик газетъёсы ысъяны но уг быгаты вал, конвертъёссэ атаез эскерылӥз» [11].  

Школаез вылӥ дунъетъёсын йылпумъяса, Владислав Кириллов Можгаысь педучилищее пыриз. Ньыль ар ӵоже литературно-творческой кружоке ветлӥз, кудӥныз со вакытэ кивалтӥз тодмо удмурт писатель Николай Семенович Байтеряков. Та кружокысен бадӟым литературае сюрес усьтӥськиз [2].

1976-тӥ арын, педучилищеез йылпумъяса, Владислав Кириллов Татарстанысь Кукмор ёросысь Ошторма-Юмья школаысь пиналъёсты удмурт кыллы но литературалы дышетыны кутскиз. Собере кык ар Советской Армиын служить кариз.

1979–1985-тӥ аръёсы «Дась лу!» газетлэн корреспондентэз луиз, со вакытэ ик заочно дышетскиз УдГУ-ысь филологияя факультетын. Владислав пинал дырысеныз капчиен тодматскылэ пӧртэм калыкъёсын. Со сямыз ик юрттӥз газетын ужезлы но. Редакциын ужакуз пинал корреспондентъёслы гожтэтъёс гожъялляз, шуныт кылъёс шедьтылӥз. Егит журналист наукая, ужъя но спортъя ёзэтын тыршиз. Со вакытэ пиналъёсын трос ужрадъёс ортчылӥзы. Соин ик газетын ужасьёс но лыдӟисьёссылы ӝегатскытэк ивор вуттылӥзы. Владислав но сыӵе интыосы мыныны котьку дась вал [9].

1985-тӥ арын Удмуртиысь гожъяськисьёслэн Огазеяськонзылэн ӧтемезъя Владислав Кириллов Художественной литератураез вӧлмытон бюролэн директорез луиз. 1991-тӥ арын «Литературный фонд России» нимо гожъяськисьёслэн мерлыко огазеяськонзылэн удмурт ёзэтаз председатель интые пуктэмын вал. Владислав Кириллов Фондлэн конференциосаз пыриське. Юрттэ гожъяськисьёслы книгаоссэс поттылыны, творческой ӝытъёсты, лыдӟиськисьёсын пумиськонъёсты ортчытъя. Солы луыса трос гожъяськисьёслэн произведениоссы ӟуч кылэ берыктэмын. Владислав Кириллов мылысь-кыдысь ваньбурлыко но юридик ужпумъёсын юрттэ Фондлэн ёзчиосызлы но литераторъёслэн оген кылем кышнооссылы.

Владислав Кириллов пичи дырысеныз ик литературной творчествоен тунсыкъяськиз. «Нырысь май» нимо нырысетӥ кылбурез 1965-тӥ арын  «Советской Удмуртия» газетын печатламын вал. Можгаысь педучилищеын дышетскыкуз, ёросысь «Ленинское знамя» газетын печатласькиз.

Кылбуръёсыз шаерысьтымы пӧртэм журнал-газетъёсын пото, со сяна «Йыр вадьсын инбам» (1984), «Между Волгой и Уралом» (Саранск, 1987), «Середина земли родной» (М., 1987), «Как молния в ночи» (1998), «На переломе эпох» (2006) книгаосы пыртэмын. Аслаз но нимысьтыз сборникъёсыз потӥзы: «Лымы корка» (1988), «Бадьпу сайка = Ива просыпается» (1989), «Нылашлы кузьмай сяська = Девушке дарю цветы» (1990), «Снежный домик» (1993, Анатолий Демьяновлэн берыктэмез), «Айно» (1993), «Айно = Света – светлое имя» (1994, Анатолий Демьяновлэн берыктэмез)

«Лымы корка» нимо нырысетӥ книгазэ Владислав Кириллов «Удмуртия» книгапоттонниын поттӥз. Та бичетэ пырем кылбуръёсысь пичи мурт – чылкыт сюлэмо, котьмае синйылтӥсь чупыргы, ужез гажась, котьмалы паймись, котырзэ валаны турттӥсь. Та кылбуръёсты огазея огъя малпан: улон – синпӧет, лымы корка выллем. Ортчо нуналъёс, толэзьёс, арлэн вакытъёсыз, аръёс. Ортчо гольык пыд бызьылон вакытъёс. Озьы ортче быдэс улон, шуэ Владислав Кириллов [5]. Нылпиослы сӥзем кылбуръёсыз инкуазез, ужез, адямиосты гажаны-яратыны дышето, ӟеч сямъёс пыӵато [9].

Кирла Ладилэсь чуръёссэ тужгес мур эскериз Евгений Самсонов. «Бадьпу сайка» бичет пумысен со вераз: «Та книгалэн лирической героез – со ӧжытак кескичгес яке валамтэ улэ аналтэмъяськись, уж борды ас сяменыз мылысь-кыдысь кутскись, дунне улонэн тунсыкъяськись яке адямиосыз валаны турскись, чеберез, инкуазез но эшъёс доры кыстӥськись но вордскем гуртсэ яратӥсь бадӟым «адями»! Нылпиослы хрестоматиосы пыртымон усто гожтэмын «Нянь юдэс» кылбур» [7].

Кылбуръёсызлы дунъет сётӥз мукетыз тодмо удмурт кылбурчи – Владимир Романов: «Владислав Кирилловлэн нылпиослы сӥзем кылбуръёсын рукописен тодматскыса, шумпотӥ. Егит автор улонысь, пиналъёслэн шудонъёсысьтызы, асьме удмурт кылысь шедьтыны быгатэ туж тунсыко ситуациос… Отын вань ини кылбурлэн тысез, отысь ӝужалоз ӟеч кылбур. Шумпоттӥз соиз: автор пичи лыдӟисьёссэ меӵак дышетыны уг туртты». Владимир Романов пусйиз, Владислав Кириллов нылпиос сярысь гинэ уг, нылпиос понна гожъя шуса [6].

2004-тӥ арын «Ива неплакучая моя» книгаез потӥз, отчы пыризы вань ӟуч кылэ берыктэм гожъямъёсыз (Анатолий Демьяновлэн берыктэмез). Та бичетын Владислав Кирилловлэн паськыт творческой быгатонлыкъёсыз адско: нылпи кылбуръёс но лирико-философской произведениос. Аслаз кылбуръёсаз со адямиослэсь кусыпъёссэс, дунне шоры учкемъёссэс, инкуазен герӟетъёссэс но лул-сюлэмъёссэс сэрттэ-пертче. Автор паймытэ улонысьтымы ӵем пумиськылӥсь суредъёсыз чылкак выль сямен возьматэменыз, соин ик соос адӟемъёссэс ятвылтыны-шӧдыны, мар ке но выльзэ утчаны косо кадь, ас дуннемылэн лякытмес шараясь интыосаз небытак йӧтскыло [5].

2007-тӥ арын потӥз «Над вечным морем бытия» книгаез.

Владислав Кирилловлэн кылбуръёсыз лиричноесь но кырӟано кадесь. Тросэз соос пӧлысь кырӟанлы пӧрмемын, крезьгур соослы гожъязы Мефодий Караваев, Геннадий Корепанов-Камский, Василий Старших, Николай Трубачев но мукет крезьгурчиос. Калык пӧлын тужгес но тодмо луиз «Нылашлы кузьмай сяська» кырӟан, солы вить пӧртэм гур лэсьтэмын.

Владислав Кирилловлэн кылбуръёсыз ӟуч, немец, мокша, эрзя, бигер, коми, коми-пермяк, абхаз кылъёсы берыктэмын. Эстон кылэ берыктэмъёсыз пыризы «Азвесь лодка = Hõbepaat» (2005) антологие. Ачиз кылбурчи нош ӟуч, финн, карел, венгер, пор гожъяськисъёслэсь произведениоссэс берыктылӥз.

Со сяна, кылбуръёсыз начальной школаослэн дышетон программаязы пыртэмын: Александра Вахрушевалэн но Аркадий Кузнецовлэн «Лыдӟон книга» (1993), Римма Даниловалэн «Букварь» (1999) но «Лыдӟон книга» (2004) учебникъёсы. Озьы ик «Вуюись» (1990), «Удмурт кыл нылпи садын» (1992), «Котырысь улон но мон» (2003), Римма Даниловалэн «Внеклассной лыдӟон урокъёс» (2003), «Зарни дэремен шунды» (2006) покчиослы хрестоматиосы но внеклассной лыдӟон книгаосы пыртэмын.

Сӥё-дано нимъёсыз но пусъёсыз

1991 – Кузебай Герд нимо йӧскалык премилэн лауреатэз (Удмуртия)
1992 – Айво Иви нимо Премия (Удмуртия)
1993 – Иван Михеев нимо Премия

Уже кутэм литература

1. Безымяннов В. «Снежный домик» // Удмуртская правда. – 1990. – 7 янв. – С. 4.
2. Владислав Кириллов (1956) // Вордскем кыл = Родное слово. – 2011. – № 3. – С. 44–45.
3. Демьянов А. И время откликается на слово // Луч. – 2005. – № 7/8. – С. 83–84.
4. Кириллов В. Ива неплакучая моя... – Ижевск, 2004. – 117 с. – Цитата из аннотации.
5. Лаптев А. Гожъяськон удысэ пичиысен кыстӥськиз // Ӟечбур! – 2004. – 16 дек. – С. 6.
6. Романов В. «Лымы корка» книга пумысь // Бадьпу сайка / В. Кириллов, Г. Кириллов. – Ижевск, 1989. – С. 51–52.
7. Самсонов Е. «Бадьпу сайка» книга сярысь // Советской Удмуртия. – 1987. – 24 июль.
8. Уваров А. Владислав Кириллов (1956) // Писатели и литературоведы Удмуртии. – Ижевск, 2006. – С. 62–63.
9. Фёдоров Л. «Ӟеч ужлэн вань-а пумыз?» // Ӟечбур! – 2006. – 30 нояб. – С. 10.
10. Фёдоров Л. Сюрес лёгиз «Дась лу!»-ын // Удмурт дунне. – 2007. – 21 марта. – С. 6.
11. Шибанов В. Кытын ке но кин ке весь шукке кусозэ… // Удмурт дунне. – 2011. – 2 дек. – С. 14.
12. Шибанов В. Лымылэсь куэ дэра... // Ӟечбур! – 2011. – 22 дек. – С. 3.