Семен Карпович Карпов вордӥськиз 1946-тӥ арын 3-тӥ куарусёнэ Пичи Пурга ёросысь Сырьезшур (Тыло) гуртын. Атаез, Карп Ясонович, но анаез, Ксения Дмитриевна, колхозын ужазы. Семьяязы вить нылпи вал, Семен – пичиез.

1961-тӥ арын Пичи Пурга ёросысь Бобья-Уча гуртысь сизьым классъем школаез йылпумъяса, Семен Карпов Можгаысь педучилищее пыриз. Татын со понна паськыт ужан луд усьтӥськиз: крезьгурен но выриз, хорын но кырӟаз, спортъя секциосы но ветлӥз. Нырысетӥ курсысен ик литературно-творческой кружоке мылысь-кыдысь пыриськиз [12]. Кружокен кивалтӥз педагог, кылбурчи но прозаик Григорий Данилов.

1965-тӥ арысен Семен Карпов куинь арзэ Лымшор Азербайджанысь Талыш гурезьёсын границаын служить кариз. «На рубежах Родины» военной газетын внештатной корреспондент луыса тыршиз. Армия бере, 1968–1970-тӥ аръёсы Пичи Пурга черкогуртысь шор ёзо школаын физкультура урокъёсты нуиз, 1970–1975-тӥ аръёсы – Бобья-Уча шор ёзо школаын физкультурая но крезьгуръя дышетӥсь вал. Кивалтӥз литературной кружокен но дышетӥсьёслэн хоренызы. 1975-тӥ арын Удмурт кун университетысь кылосбуръя факультэз заочно йылпумъяз.

1976-тӥ арын Семен Карповез Удмурт телевидение ӧтё нылпи передачаослэн редакторзы луыны. Отын со кылдытӥз «Визьмын, кужмын, эшъёсын» нылпиослы передача. Дасяз но нуиз «Чингыли» (берлогес  «Рос-прос»), «Ми будӥськом», «Ӟардон» передачаосты. 1986-тӥ арын чеберлыко программаослэн валтӥсь редакторез луиз. 1991–1994-тӥ аръёсы «Крезь» нимо творческой огазеяськонэн кивалтӥз, 1994–1997-тӥ аръёсы – «Лик» огазеяськонэн. Собере «Удмуртия» кун телерадиокомпаниын спецкорреспондент луыса ужаз. Лулчеберет но искусство сярысь «Тулкым» нимо салэсьтыз передачазэ нуиз. 2005–2008-тӥ аръёсы отын ик корреспондент луыса тыршиз.

Удмурт кылэз но литератураез яратыны но гожъяськон борды басьтӥськыны Семен Карповлы юрттӥзы Бобья-Учаысь сизьым классъем школаысь дышетӥсьёс П. К. Кузьмина но Ф. Д. Зайцева. Витетӥ классын дышетскыкуз ик лушкем кылбуръёс гожъяны тыршиз. Озьы ке но, ачиз Семён Карпов шуэ: «Умой-умой валаса гожъяськыны училищеын кутски, отын туж кужмо кружокмы вал». Огзэ кылбурзэ "Ударник" ёрос газетын печатлазы, соин ик пияшлэн мылкыдыз лобӟыны дась вал. Собере уката но ӟеч тыршылӥз пӧртэм творческой ужъёсты — изложениосты, сочинениосты – мылысь-кыдысь быдэстыны. Со сяна, егит пияшлы вунонтэм кыльылӥзы писательёсын пумиськылонъёс, соос школаын но, педучилищеын но дышетскыкуз ӵем ортчылӥзы. Туж сак кылзылӥз Семен Карпов гуртысьтызы тодмо луэм писательлэсь Семен Самсоновлэсь верамъёссэ, яратыса лыдӟылӥз солэсь печатлам ужъёссэ но радио пыр верамъёссэ [2].

Cемён Карпов тросгес кылбуръёс гожъяз пичи нылпиослы сӥзьыса, соос пӧлысь умойёссэ люкаса, А. Леонтьев юрттэмъя, 1986-тӥ арын поттӥз "Лымыпог" сборникен. Та нырысь книгаяз ик умой шодӥське нылпиослэсь психологизэс ӟеч валамез но тодэмез, автор быгатэ котькуд нылпилэсь ас сяменыз мадемзэ но, малпаськемзэ но шараяны. Со ласянь туж тунсыко луэ "Шудыса но кӧт тыре" кылбур. "Учкисько синучконэ" кылбурын мултэс индылон кылъёстэк гинэ Семён Карпов валэктэ пичи пияшлы, сапрес сямзэ куштоно шуыса. Та бичетаз ик «Монъяськись Гирой» выллем кылбуръёсаз авор возьматэ мултэс ушъяськись пиналъёсты [2].

Кыкетӥез «Чильтэръёс» (1994) нимо бичетэз нош ик нылпиослы сӥземын. Но таяз сборникын тросгес пумиськыло ини дышетскись пиналъёслы сӥземъёсыз но. Соослэн улонзы, дышетскемзы, малпанъёссы возьматэмын. Удмурт луэменыд данъяськон мылкыдын пыӵамын «Тон малы-о удмурт?» кылбурез. Та бичетэ ик пыртэмын кылын шудонъёс, мадиськонъёс, соос нылпиосты кылмылэсь узырлыксэ валаны дышето, кылбур дуннее ӧтё. Куинь ар ортчыса, Семён Карпов мӧйы лыдӟисьёслы «Малпанъёс» (1997) нимо бичетсэ кузьмаз. Улон-вылон кылбурчиез пӧртэм интыосы вуттэ, пӧртэм адямиосын пумиськытэ. Ваньзэ сое поэт кылбуръёсаз пыртыны тырше [4].

Берлогес потӥзы «Ульча Кузё» (2006), «Паньтэм = Тёзка» (2008, Василий Глушковлэн но Анатолий Демьяновлэн берыктэмзы), «Тӧлпи = Ветрёнок» (2009, авторлэн берыктэмез, Василий Глушковлэн, Герасим Иванцовлэн), «Разговор» (Владимир Парамоновлэн берыктэмез), «Пальпотон = Улыбка» (2011, авторлэн берыктэмез) книгаос. «Вордскем кыл» журналын нылпи литература серияз потӥзы «Пиньтэмъёс» (2005) но «Мынам вуюисе» (2006), «Вордскем нунал» (2008) пичи бичетъёс. Кылбуръёсыз пыртэмын «Вуюись» (1990), «Внеклассной лыдӟон» (2003), «Зарни дэремен шунды» (2006) пичиослы хрестоматиосы но внеклассной лыдӟон сборникъёсы.

Семен Карпов быгатыса азьланьтэ Григорий Веращагинлэсь, Кузебай Гердлэсь, Аркадий Клабуковлэсь но мукет гожъяськисьёслэсь нылпи литература традицизэс. Кылбуранэзлэн лирической геройёсыз – чупрес, тунсыкъяськись пиналъёс, соос котыр дуннеез мургес валаны туртто, пӧртэм учыръёсысь пальпотыса пото [1]. Семен Карповлэн кылбуръёсысьтыз сыӵе чылкыт омырлы туж тупа чылкыт калык кылбуран кыл, солэн гурез [9].

Семен Карпов быдэ вуэм адямиослы но гожъя. 1997-тӥ арын «Малпанъёс» бичетэз потӥз. Удмурт литературовед Фома Ермаков пусйиз: «Татчы 54 кылбур пыремын. Тросэз соос армиын службазэ ортчытон дырыныз герӟаськемын… службазэ ортчытозяз лирической герой – солдат котырысьтыз интыосты но инкуазез ялан вордскем палъёсыныз, тодмо но данъяськоно интыосыныз ӵошатылӥз… Кыдёке кошкем солдатлэсь сюлэмзэ дор палась ыстэм гожтэтъёс шунто: семьяезлэсь, гажанэзлэсь…» Со сяна, дышетӥсезлы, «Айкай» фольклор театрлы но удмурт калыклы сӥзем кылбуръёс пыризы [4].

«Улон зарезе» (2012) книгае пыризы кылбуръёс, поэмаос но пӧртэм кылъёсысь берыктэм произведениос. Валтӥсь мотивъёссы – кылбурет, вордскем шаер, яратон, адями но инкуазь вискын кусыпъёс. Кылбуръёсын ог дыре сюлмаськон, шумпотон, шулдыръяськон но ӝож мылкыдъёс кылӥсько. Лирической герой асэныз ӵош лыдӟисез но малпаськыны ӧте [14].

Семен Карповлэн кылбуръёсыз печатласько «Инвожо», «Кенеш», «Луч» элькун журналъёсын, «Удмурт дунне» газетын. Таллинын потэм «Азвесь лодка = Hõbepaat» (2005) удмурт кылбуретлэн антологияз пыртэмын «Я, сёт на Инмаре» кылбурез. Куд-ог ужъёсыз пыризы «Удмурты» (2005), «На переломе эпох» (2006), «Малая Родина – большая любовь» (2010) книгаосы. Тросэз кылбуръёсыз кырӟанлы пӧрмиз. Крезьгурез ачиз но гожъяз, Василий Ежов, Пантелей Кузнецов, Николай Постников но мукет крезьгурчиос но.

Семен Карпов Удмурт Элькунысь удмурт но ӟуч гожъяськисьёслэн творчествозы сярысь телевизионной киноолы сценарий гожъяз но пуктылӥз. 1989-тӥ арын «Даур» нимын огазеям передачаосты кылдытӥз, кудъёс сӥземын вал удмурт литературалэн 100 ар тырмонэзлы. 1997–1998-тӥ аръёсы Кузебай Гердлы но Ашальчи Окилы 100 ар тырмемзылы сӥзем телевизионной киноосты возьматӥз, озьы ик реабилитировать карем гожъяськисьёс сярысь «Доре бертон» нимо кино лэсьтӥз. Со сяна, Михаил Петровлэн «Италмас» поэма-легендаезъя телеспектакль кылдытӥз.

Сӥё-дано нимъёсыз но пусъёсыз

1980 – УАССР-ысь ВЛКСМлэн Обкомезлэн Данъян грамотаез
1986 – УАССР-ысь Вылӥ Кенешлэн Президиумезлэн Данъян грамотаез
1990 – Удмурт Элькунысь лулчеберет удысысь сӥё-дано ужась
1996 – Россиысь лулчеберет удысысь сӥё-дано ужась
2002 – Удмурт Элькунысь йӧскалык политикая Министерстволэн Данъян грамотаез
2006 – Россиысь журналистъёслэн огазеяськонзылэн Данъян грамотаез

Уже кутэм литература

1. Бадретдинов У. Семен Карпов // Паньтэм = Тезка / С. Карпов. – Ижевск, 2008. – С. 4 обл.
2. Ермаков Ф. Карпов Семён Карпович // Пурга ёросын вордскем писательёслэн творчествозы / Ф. К. Ермаков. – Ижевск, 1999. – С. 117–124.
3. Ермаков Ф. Семен Карпов (1946) // Писатели и литературоведы Удмуртии.  – Ижевск, 2006. – С. 59–60.
4. Ермаков Ф. Ужъёсыз емышо но табышо // Кенеш. – 2006. – № 8. – С. 99–103.
5. Карпов С. Мынам улонэ – чильтэр : [беседа] / записал В. Возняков // Удмурт дунне. – 2004. – 16 апр.
6. Карпов С. Нылпиосы – «Пальпотон» : [беседа] / записала Л. Тихонова // Удмурт дунне. – 2011. – 6 сент. – С. 5.
7. Карпов С. Улон зарезь, яке ачим сярысь… // Сыӵе со Тыло гуртмы но отысь калыкез / А. Осипов, Ю. Фомин. – Малая Пурга, 2010. – С. 81–92.
8. Карпов Семён Карпович / Удмуртская Республика. – Ижевск, 2000. – С. 392–393.
9. Красновская Е. Талант добрый и веселый : о стихах А. Ельцова и С. Карпова // Время и слово. – Ижевск, 2010. – С. 478–486.
10. Малахова Н. Он сохранил в душе детство // Удмуртская правда. – 2006. – 15 сент. – С. 12.
11. Семён Карпов // Кенеш. – 2010. – № 11/12. – С. 107.
12. Семен Карпов // Малопургинская земля – моя родина. – Ижевск, 2002. – С. 318–320.
13. Семён Карпов (1946) // Вордскем кыл = Родное слово. – 2011. – № 3. – С. 32–33.
14. Самсонова М. Дуно кузьым // Удмурт дунне. – 2000. – 20 янв.
15. Тихонова Л. Улон зарезь – чуръёс пушкын // Удмурт дунне. – 2012. – 8 авг. – С. 8.
16. Тодмо удмурт журналистлы – Семен Карпович Карповлы // Ӟечбур! – 2006. – 7 сент. – С. 16.