Рашит Осипович Хайдаров вордӥськиз 1957-тӥ арын 10-тӥ куарусёнэ Башкириысь Янаул ёросысь Шудек гуртын крестьян семьяын. Тямыс классэз быдтыса, колхозын ужаз. Собере шор ёзо школаын дышетсконзэ азьланьтӥз.

Тямысэтӥ классын дышетскыкуз, Рашит ӟеч тодэ вал ини гожъяськись луоз шуыса. Туж Можга педучилищеын дышетскемез потэ вал. Но анаезлы кык пиоссэ дышетыны секыт луоз шуыса, Прогресс посёлокысь шор ёзо школае вамыштӥз. Сӥзьыл колхозын котькуд семьялы картофка но кушман октыны-утялтыны быдэс гектар пай сёто вал. Анаезлы юрттонъяз, школае бер кылиз, пиналъёс дышетско ни вылэм. «СПТУ-ын дышетскыны ӵектӥзы. Ветлыса утчано-а, мар-а, малпай. Трактороведение урок бере шутэтскон вис луиз. Пиос ваньзы сямен тамак пурккето, жоб кылъёсын верасько. Кыкетӥ уроке ӧй ни пыры, бертӥ. Ма, собере тракторист луон сярысь малпанэн ноку ӧй улы вал ук! Озьы мон парсьёслы сиён пыртасьын тырши», – вера Рашит Осипович. Озьы пияш арзэ ужаз колхозын. Собере выльысь дышетсконзэ азинтӥз школаын. Соку со дыр но, эсэп но шедьтылӥз на кылбуръёс, веросъёс гожъяны но [1].

1976-тӥ арын Рашит Хайдаров Удмурт кун университетысь кылосбур факультетаз пыриз. Куинетӥ курсэз быдтыса, заочной ёзэтэ выжиз но «Советской Удмуртия» элькун газетлэн редакцияз ужаны кутскиз. Корреспондент, старший корреспондент, кылкутӥсь секретарьлэн воштӥсез, сатира но юморъя ёзэтлэн кивалтӥсез но творческой огазеяськонлэн кивалтӥсез луыса ужаз. Куамын ар ӵоже арнялы быдэ потӥсь «Шӧкыч» сатира бамез нуиз. 1985-тӥ арын Рашит Хайдаров Тбилисиын быдэс Союзысь сатирикъёслэн семинаразы пыриськиз. 1991–2004-тӥ аръёсы «Вордскем кыл» журналлэн валтӥсь редакторезлэн воштӥсез вал.  Рашит Хайдаров журналын книга поттылыны ӵектӥз. Собере «Удмурт дунне» газетын сатира но юморъя ёзэтлэн редакторез луиз но «Герд» газетлэн валтӥсь редакторез.

Рашид Хайдаровлэн публикациосыз жанрзыя пӧртэмесь, соос пӧлын юмористической но сатирической веросъёс, кылбуръёс но фельетонъёс, туала дырлы тупась темаосын скетчъёс, сценкаос, басняос, эссеос, анекдотъёс, сюрес вылысь заметкаос, выжыкылъёс, притчаос, такмакъёс, маскариос, эпиграммаос. «Сизьыметӥ классын дышетскыкум, гуртысь одӥг кышномуртэн пумиськон ортчиз. Сое, ӟеч ужамез понна, Москвае ӧтчаллям. Кышномурт сыӵе зол паймем, кызьы соосты сюдӥллям, нош ачиз сиён-юонлэсь кызьы нимаськемзэс но уг тоды. Та учыр туж йырам кылиз но, героиняме, Занок нимо пиосмуртлы берыктыса, «Шӧкыч» баме ыстӥ. Юморескаме газетэ печатлазы» – тодаз вае гожъяськись [7]. Со дырысен «маскара» жанрын кык сюлэсь трос верос но сценка гожтӥз. Произведениосыз печатласькизы «Удмурт дунне», «Удмуртская правда», «Герд» газетъёсын, «Кенеш», «Инвожо», «Вордскем кыл», «Ашальчи», «Луч» журналъёсын; со сяна, «Йыр вадьсын инбам» (1984), «Колӟо» (1988), «На переломе эпох» (2006) книгаосы пыртэмын; радиоын, телевидениын но «Шулдыр ӝыт» ансамбльлэн выступлениосаз чузъяськылӥзы.

Куд-ог гожъямъёсыз ӟуч, башкир, чуваш, узбек но коми кылъёсы берыктэмын. Юморескаосыз, сатира веросъёсыз печатласькизы «Муштум» (Ташкент), «Ара» (Алма-Ата), «Чушканзи» (Сыктывкар), «Капкан» (Чебоксары), «Хэнэкен» (Уфа) журналъёсын. Юмористической веросъёсыз потӥзы «Ачим» (1999) но «Портрет с натуры» (2007, Расил Сабировлэн берыктэмез) нимо нимысьтыз бичетъёсын.

Гожъяськисьлэн серемес верос гожъян амалъёсыз аспӧртэмлыкоесь. Уноез соос пӧлысь "мон" шуыса кутско. «Геройлэн» ассэ маскаръямез, ассэ серекъямез-мактамез пыр ӟеч адӟисько улонысь тырмымтэос. Соин валче комической герой "ачиз" пыр ӟеч возьматыны быгатэ мылкыдъёссэ, малпанъёссэ, психологизэ, ассэ ачиз усьтэ, шарая. Нош серемес геройёсыз юн мылкыдоесь луо, улонлы осконзэс уг ышто на, улон соосты визьма, дышетэ. Соин ик калык азьын соос асьсэлэн шуге-леке вуэмзы сярысь шара, "мон", "ачим " шуыса верало. Лыдӟисез асьсэлэн пуш дуннеенызы тодмато [4].

Рашит Хайдарлэн кылыз лэчыт, солэн кадь ӵошатонъёс, эпитетъёс, метафораос литератураын шер пумисько, соосты автор зарни но марӟан пырыосты сямен сузьем веросъёсаз.

Вань веросъёсыз оскымонэсь, малы ке шуоно, улонын луылӥсь серемес учыръёс, серемес сямъёс, пӧртэм характеръёслэн ваче вуонъёссы, адямиез тодмамтэ вылысь юмоке вуонъёс, ваменэсъёс но шунёкъёс, асьсэды гинэ тодӥсьёс но кузьмаськыса шуге-леке вуэмысь потыны тыршисьёс, мукет югдуръёс но серемес характеръёс — сыӵе "геройёсты" пӧртэм учыръёс пыр возьматэ автор [4].

Рашит Хайдарлэн сатираен но юморен тырмем веросъёсыныз серекъяно но, малпаськоно но. Нош юморескаосын валче автор книгаяз пыртэм на серемес луисьтэмъёссэ но — малпасъкытӥсь новеллаоссэ: улон но кулон сярысь вакчи веросъёссэ. Та пичи новеллаос прозаен кылбуръёслы матынэсь. Соос адямилэн улонысытыз тужгес но драматической югдуръёсты возьмато. Сыӵеесь луо "Лобо луд ӟазегъёс", "Пуны", "Тӧллы пумит", "Курыт синкыли — сылало ", "Сьӧлык", "Ошмес" малпаськон гердъёсыз, "Укно син ", "Уй " но мукет веросъёсыз. Рашит Хайдарлэн произведениосыз берыктэмын ӟуч, коми, башкир, чуваш но узбек кылъёсы [5].

Мӧйыослы гожъян сяна, Рашит Хайдаров покчиослы но трос кылбур сӥзиз. Нылпилэсь пуш дуннезэ шӧдыны-адӟыны быгатэмысьтыз крезьгурасьёс кылбуръёссэ кырӟанлы пӧрмытъяло. Пиналъёслы сӥзем кылбуръёсын книгаосыз уно гинэ люкаськемын: «Вукарнан» (1992), «Ӟечыран» (1995), «Сюрес» (1998) но мукетъёсыз [2].

Тросэз кылбурез кырӟанлы пӧрмем, крезьгурзэ гожъязы Валентин Карпов, Николай Трубачев, Николай Шабалин но мукет крезьгурчиос. Ачиз нош ханты, манси, бигер но ӟуч кылъёсысь произведениосты берыктылӥз.

Сӥё-дано нимъёсыз но пусъесыз

1995 – Удмурт Элькунысь сӥё-дано журналист

Уже кутэм литература

1. Коряков Г. Мынекъян но ӵушкан – эгызоос // Удмурт кизилиос : очерки, зарисовки, интервью (2001-2007). – Ижевск, 2007. – С. 62-63.
2. Писательёс – нылпиослы : лыдӟиськон урокъёсын ужаны юрттэт // Вордскем кыл. – 2011. – № 3. – С. 49.
3. Рашит Хайдар (1957) // Вордскем кыл = Родное слово. – 2011. – № 3. – С. 48–49.
4. Уваров А. Кӧня ке кыл авторез сярысь // Ачим / Р. Хайдаров. – Ижевск, 1999. – С. 5–6.
5. Уваров А. Рашит Хайдар (1957) // Писатели и литературоведы Удмуртии. – Ижевск, 2006. – С. 115–116.
6. Хайдар Р. Мынекъян но ӵушкан – эгызоос : [беседа] / записал Г. Коряков // Удмурт кизилиос. – Ижевск, 2007. – С. 62–63.
7. Хайдар Р. Улон – со пияла // Известия Удмуртской Республики. – 2007. – 29 авг. – С. 4.