Анатолий Леонтьевич Григорьев вордӥськиз 1952-тӥ арын 7-тӥ гудырикошконэ Можга ёросысь Бадӟым Сибы гуртын. Гуртысьтызы 4 классъем школа бере Можга черкогуртысь шор ёзо школаын дышетскиз [8].

Толя пичи дырысеныз сцена вылын. Удалтӥз дышетӥсьёсын. «Мон малпамъя, ваньмыз дышетӥсь бордысь потэ…» – шуэ Анатолий Григорьев. Покчи классъёсын дышетӥз соку гинэ Можга педучилищеез йылпумъям Печникова (али Петрова) Елизавета Владимировна. Котькыӵе праздниклы концертъёс дасяллязы, эктонъёс, удмурт писательёслэн произведениоссыя сценкаос пуктылӥзы, куштӥськем кагаз, корт бичаллязы, возь вылын яркыт тылскем дурын пукылӥзы. Можга черко гуртын дышетӥз Анна Николаевна Шутова, кудӥз ас дыраз Михаил Коноваловен но мукет тодмо адямиосын дышетскем. Вордскемын но со Пётр Блиновен одӥг гуртын. Туж визьмо кышномурт [2].

Со сюлмаськемен ик пияш туж яратӥз удмурт кылэз но литератураез. Туж яратылӥз пӧртэм мадиськонъёс кылдытъяны: соос понна котьку «вить» басьтылӥз. Пичи дыръяз Толя артист луыны малпа вал. «Советской Удмуртия» газетысь огпол лыдӟиз таӵе ялон: Удмурт егитъёсты Б. В. Щукин нимо Вылӥ училищелэн кыкетӥ курсаз артистэ дышетскыны куто. Гуртысьтыз ик кык эшъёсыныз кужымзэс эскероно кариськизы. Толяез но Мишаез ӧз кутэ. Нош Германлы одӥгаз экзаменын «кык» пуктӥзы. Но пинал мурт йырзэ ӧз ошы: дораз бертса, документъёссэ сётӥз Удмурт кун пединститутлэн кылъя но литературая факультетлэн удмурт люкетаз. Солы отчы пырыны чик шуг ӧй вал: вань удысъёсъя ӟеч тодэм-валамзэ возьматӥз [1].

Пединститутын дышетскыкуз ветлӥз драмстудие. Отысен ик тодматскиз тодмо писателен, артистэн Василий Гаврилович Гавриловен (соос одӥг гуртысь потэмын). Берлогес соослы Драмая удмурт кун театрын но ӵош ужаны кылдӥз. 1974-тӥ арын Анатолий УдГу-ысь филологической факультетлэсь удмурт ёзэтсэ йылпумъяз.

Со аре ик телевиденилэн Ижысь студияз ужаны пыриз, ӟуч кылын иворъёс дасяз. Но кык толэзь гинэ ужаса вуттӥз, военкоматэ ӧтчаны кутскизы. Сӥзьыл басьтӥзы армие. Шедиз Хабаровске. Отын кияз котьма – автомат но, пулемёт но, гранатомёт но – кутылыны кылдӥз. Библиотекарьлэсь ужзэ но оскыны малпало вал, но солдат пумит луиз. Ӧз поты ӝокыт, книга тузоно юрт пушкын пукемез. Армиын эшъёсыз Анатолиез ярато вал: соослы пӧртэм серемес учыръёс сярысь мадьылӥз, тумошо суредъёсын шумпоттылӥз…

Служба бере кылдытӥз семья: кузпалэныз, Евгения Гурьяноваен огвакытэ дышетскизы университетын. Со вакытэ ик Анатолий Григорьев ветлӥз Драмая удмурт кун театре. Татын возьматъяськись спектакльёсыз артистъёс, писательёс, журналистъёс дэмен сэртто-пертчо вал соку. Отысен ик тодматскиз Александр Блинов режиссёрен. Соиз егит муртэз ӧтиз ужаны театре.

Гожъяськыны Анатолий Григорьев кутскиз студент вакытаз. Солэн вакчиесь серемес веросъёсыз, зарисовкаосыз печатласькизы «Советской Удмуртия» газетын [8].

Нырысетӥ пьесазэ кызь вить аресын театрез тодытэк-валатэк гожтӥз. Со «Кесэг пилемъёс» нимаське вал. Сое театрын но лыдӟиз. Но валаз: пьеса ляб, трос мултэсэз, геройёсыз но осконтэмесь. Та пьеса борды медам берытскылы ни шуыса, сое кесяса куштӥз [3].

Нырысетӥ бадӟым ужез – «Лысву сямен уг тӧлӟы синкыли» драмаез - удмурт кун театрлэн сцена вылаз пуктэмын вал 1985-тӥ арын. Та спектаклез туж шумпотыса пумитазы театрез яратӥсьёс, учкисьёс азьын возьматэмын вал ог 230-лэсь трос пол. Удмуртиын гинэ ӧвӧл, палэнын, Татарстанын, Башкириын, Перьм улосын улӥсь удмуртъёс но адӟизы спектаклез. Автор та ужаз нырысьсэ удмурт литератураын кутӥське Афган тема борды. «Со вакытэ Афганистанын тылож мынэ на вал. Со сярысь гожъяны но ӧз лэзьылэ. Пьесаям но Афганистан кылэз ӧй пырты: эскерись-чаклась муртлэн синмыз туж лэчыт вал ук», – вера Анатолий Леонтьевич. Та пьеса ожмаськонлы пумит пафосъем луэ.

Ар ортчыса «вордӥськиз» «Атас Гири» комедия. Таяз пьесаяз автор серекъя азгынмемъёсты, мурт чотын улӥсьёсты, дуно ваньбурез капыръясьёсты… [1]. «Атас Гири-2» (2010) комедия азьланьтонэз луэ. Отын пумисько лэчыт конфликтъёс но калык юмор, гуртоослэн аспӧртэмлыко образъёссы [7].

«Котькуд ролез пьесаысь нырысь ик ачим шудӥсько. Ачим ик актёр кариськисько но корка пуштӥ солань-талань лёгаськисько: таиз тазьыгес луоз, таиз – тазьыгес, таиз – тазьыгес шуисько», – ужез сярысь вера Анатолий Григорьев [1].

Гожъяськисьлэн ужъёсыз пыризы Россиысь финн-угор драматургъёслэн «Венок родной земли» (Сыктывкар, 2008) нимо пьесаосын бичетэ но удмурт гожъяськисьёслэн «Катанчи усьтӥське» (1992) нимо пьесаосын бичетэ.

1994-тӥ арын Удмурт театрын пуктӥзы «Эмезь кисьмаку» сатирической комедия-фарс. Кызьы пусъе ачиз Анатолий Григорьев, ”Эмезь кисьмаку” пьесаын возьматэмын со вакыт, куке Б. Ельцин ваньмызлы кин кытысь быгатэ коньдон поттыны дэмлаз. Озьы со та учырез котькуд комедияын кадь ик абсурдозь вуттӥз [5]. «Парсьпи но эмеспи» пьесая пуктэм спектакльлэн премьераез ортчиз 1998-тӥ арын.

Анатолий Григорьевлэн гожъямъёсызъя пуктэм спектакльёсты мукет улосвылъёсын но пуктылӥзы. «Эмезь кисьмаку» комедия-фарс Саранскысь йӧскалык театрын умой пумитамын вал. «Пужмерен ӵуштаськем яратон», «Парсьпи но эмеспи» пьесаос Йошкар-Ола (Марий Эл) карын ортчем финн-угор драматургъёслэн семинаразы вылӥ оценка басьтӥзы.

Анатолий Григорьев трос ужа кылысь кылэ берыктон бордын. Со удмурт кылэ берыктӥз даслэсь трос кунгож сьӧрысь классикъёслэсь ужъёссэс, ӟуч но мукет калыкъёсысь драматургъёслэсь произведениоссэс (Ж.-Б. Мольер, А. Макаёнок, В. Винниченко но мукет). Туннэ нуналлы Анатолий Леонтьевич Григорьев Удмуртиын валтӥсь драматург луэ. Солэн пьесаосызъя пуктэм спектакльёс кема уло сцена вылын, калык яратыса, мыло-кыдо выльысь но выльысь лыктэ театре та авторлэсь ужъёссэ учкыны [8].

Сӥё-дано нимъёсыз но пусъёсыз

2002 – Удмурт Элькунысь искусство удысысь сӥё-дано ужась

Уже кутэм литература

1. Виноградова Е. Шудо киын шудэ тэтчась кужым // Удмурт дунне. – 2002. – 19 июль. – С. 6, 11. - (Удмурт кизилиос).
2. Григорьев Анатолий Леонтьевич (1952) // Сельский активист – учитель / М. И. Шишкин ; Можга писательёс. Можга удмуртлыкез азинтыса. Пазял гуртысь фольклор / А. А. Комаров. – Ижевск, 2010. – С. 67–71.
3. Григорьев А. «Классикаез котькуд театр шудыны кулэ...» : [беседа] / записала Л. Нянькина // Инвожо. – 2007. – № 11/12. – С. 49–51.
4. Григорьев А. «Мылкыды котьку но сцена борды кыскылӥз» : [беседа] / записал А. Лаптев // Ӟечбур! – 2002. – 1 авг.
5. Григорьев А. «Наш зритель любит смеяться и плакать» : [беседа] / записала Н. Пузанова // Удмурты. – М., 2005. – С. 454–457.
6. Григорьев А. Шудо киын шудэ тэтчась кужым : [беседа] / записала Е. Виноградова // Удмурт дунне. – 2002. – 19 июля.
7. Новая старая комедия // Известия Удмуртской Республики. – 2010. – 26 марта. – С. 3.
8.  Уваров А. Анатолий Григорьев (1952) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 41–42.