Алексей Алексеевич Ельцов вордӥськиз 1955-тӥ арын 13-тӥ шуркынмонэ Яр ёросысь Тум гуртын. Бадӟым семьяын улӥз (тямыс мурт): вить нылпиос, анай-атаез, песянаез. Анаез фермаын ужаз, атаез – бусыын ужасьёслэн но лэсьтӥськисьёслэн бригадирзы [2]. Пӧйшураны но чорыганы яратӥз. Песянаез, Матрена Андреевна, трос будосъёсты тодӥз. Инкуазез яратон Алексейлы но пыӵаз [5].

Баяран школаысь тямыс классэз йылпумъяса, Алексей, гуртысьтызы тросэз эшъёсыз сямен ик, Глазовысь совхоз-техникуме дышетскыны пыриз [7]. «Малпасько вал пичиысен ик нюлэсчи яке охотовед луыны. Но валэктӥсь ӧвӧлэн со удысэ сюрес ӧй шедьты» [4]. Татын ӟеч радъямын вал общественной уж, спорт. Волейболэн но со шудӥз, футболэн но, шахматэз но, капчи атлетикаез но, кырӟан-эктонэз но мултэс ӧз кары. Со сяна туж трос книгаос лыдӟылӥз.

1975-тӥ арын техникумез «техник-строитель» специальностен йылпумъяз но «Удмуртсельпроект» проектной институтэ келямын вал. Татын куинь толэзь чертежъёс лэсьтэмез бере, армие мынон дырыз вуиз. Алексей Сахалинэ шедиз [4]. Со взводлэн командирезлэн воштӥсез, нырысетӥ классъем телеграфист вал. Будӥз старшинаозь, солэсь погонъёссэ нуллыса ӧз ке но вуы. Ротаын комсомол секретарь вал, дивизиысь но армиысь газетъёсы служба сярысь гожъяз [3].

1977-тӥ арын Алексей Ельцов «Советской Удмуртия» газетын корреспондент интыын ужаны кутскиз. Заочно дышетскиз Удмурт кун университетысь кылосбур факультетын. 1989-тӥ арысен арнялы быдэ потӥсь «Вестник Удмуртии» газетлэн редакторез вал, собере Удмурт радиоын спецкорреспондент. 1996-тӥ арысен – «Кизили» нылпи журналлэн валтӥсь редакторезлэн воштӥсез.

Алексей Ельцов пӧртэм жанръёсын гожъяське: очеркъёс, вакчи веросъёс, повестьёс, юморескаос, басняос, кылбуръёс но поэмаос. Озьы ик со «Удмурт чорыг нимъёс» статьялэн авторез луэ [9]. Творческой сюресэ султыны солы дэмлаз Баяранысь школае ӵем вуылӥсь удмурт кылбурчи но кылчи Георгий Архипов. Нырысетӥ публикациез печатласькиз Ярысь «Сельская правда» ёрос газетын, со сӥземын вал школаын ортчем КВНлы. Собере кылбуръёсыз но заметкаосыз печатласькыны кутскизы «Дась лу!» но «Советской Удмуртия» газетъёсын.

Кылбуръёсыз но балладаосыз пыризы «Егит дыр» (1989) коллективной сборнике. Куд-ог кылбуръёссэ пыртӥзы  «Йыр вадьсын инбам» (1984), «Песни родникового края» (1984), «Вай кырӟалом, эшъёс!» (1993), «Лэчыт кылъёс» (1996), «На переломе эпох» (2006) бичетъёсы. Нимысьтыз потэм кылбур сборникъёсыз: «Урт» (1998), «От росы до росы» (2005; Анатолий Демьяновлэн но Владимир Емельяновлэн берыктэмзы), «Вдоль чепецких излук» (2010; Анатолий Демьяновлэн но мукет берыктӥсьёслэн берыктэмзы).

Алексей Ельцовлэн произведениосаз валтӥсь инты басьто анайзэ но ӵыжы-выжыоссэ яратон, пичи но бадӟым шаерзэ гажан, инкуазез ас сяменыз учкон, туала удмурт гурт [3].

Кылбурчи удмурт нылпи литературае но пумен йыгмыт пыре. Куд-ог ужъёсыз учебникъёсы, пособиосы но пыремын. Алексей Алексеевич кылшудонъёс, мадиськонъёс, но серемес кылбуръёс кылдытон бордын тросгес ужа [1]. Пиналъёслы «Кӧжыпог» нимо нырысетӥ бичетэз потӥз 1995 арын [9]. Кылбуръёсыз, мадиськонъёсыз, выжыкылъёсыз, веросъёсыз печатласько «Кизили» но «Вордскем кыл» журналъёсын, «Ӟечбур!» газетын.

«Кӧжыпог» сяна, Алексей Ельцовлэн потӥзы на «Кенгуру уг си гуры» (2002) но «Кубиста йыр» (2008) книгаосыз. «Вордскем кыл» журналлы приложениос кадь потӥзы «Валчортӥсь» (1995), «Шок но Пуль» (1997), «Дуннеез мон котыртӥ» (2001), «Гондыръёс» (2002), «Сурсвуэн бӧрдӥсь тулыс» (2008), «Лыдъя, лыдъя, гыдые» (2010) нылпиослы книгаос.

Кылбур бичетъёсыз нимъёсынызы паймыто. Нырысетӥез исаса кадь «Кӧжыпог» («Гороховый колобок») нимамын… Тунсыкъяськись, выльзэ тодыны турттӥсь колобок кадь, бичетысь кылбуръёс одӥг валтӥсь малпанэ вутто: нылпиослы «дуннелэсь кылдэмзэ» усьтыны, «малы?» юанъёссылы веран сётыны, витьымтэ учыръёслэсь но кышканъёслэсь утьыны… [8]. «Кенгуру уг си гуры» книгалэн нимыз (ӟуч кылын «Кенгуру не ест сережки») шудон амалъя малпамын, со лыдӟиськисез дася кылын, куараосын шудонлы [6].

«Кылбурчи трос афоризмъёс уже кутэ, тужгес но тылобурдоос, нымы-кибыос, чорыгъёс нимъёсын, озьы пинал лыдӟиськисьёслэн кылзы паськыта» [8].

Алексей Ельцовлэн кылбуръёсыз пыртэмын Ю. Т. Байтеряковалэн 2-3-тӥ классъёслы «Удмурт кыл» (2002) учебникъёсаз, «Дышетӥсьлы юрттэт» (2003) книгае, Н. П. Боталовалэн «Ӟеч-а, бур-а, удмурт кыл!» (2004) учебниказ, А. М. Комаровалэн «Музыка в словарной работе в удмуртских детских садах» (2001) книгаяз.

Алексей Ельцовлэн кылбуръёсыз трос пол печатласькизы коми, чуваш, мари кылъёсын [3]. Вань бигер кылэ берыктэм кылбуръёсыз но. Ачиз кылбурчи Россиысь ог куамын авторъёслэсь кылбуръёссэс берыктӥз удмурт кылэ.

Авторлэн сизьымдонлэсь трос кылбуръёсыз кырӟанлы пӧрмизы, крезьгурзэс гожъязы пӧртэм композиторъёс: М. Журавлев, Евгения Копысова, Геннадий Корепанов-Камский, Николай Трубачев, Надежда Уткина, Виталий Шоркин но мукетъёс.

Сӥё-дано нимъёсыз но пусъёсыз

1982 – СССР-ысь ВДНХлэн бронзовой медалез
1988 – СССР-ысь журналистъёслэн Огазеяськонзылэн Данъян грамотаез
1995 – Удмурт Элькунысь дано журналист
2000 – Владимир Романов нимо премилэн лауреатэз (Удмуртия)
2005 – Россиысь дышетон удысысь сӥё-дано ужась, Финляндиысь М. А. Кастрен нимо Огазеяськонлэн литературной премиезлэн лауреатэз, Удмурт Элькунысь журналистъёслэн Огазеськонзылэн Данъян грамотаез
2006 – Удмурт Элькунысь лулчеберетъя, печатья но иворъёсъя Министерстволэн Данъян грамотаез

Уже кутэм литература

1. Бадретдинов У. Ш. Тумпи, кылбур дунне но "13" лыдпус // Кенеш. - 2005. - № 10. - С. 89-92.
2. Богомолова З. «С добрым словом входим в дом...» // От росы до росы / А. Ельцов. – Ижевск, 2005. – С. 3–18.
3. Гаврилова-Решитько М. Сюрес ӧте азьлане // Ӟечбур! – 2005. – 10 нояб. – С. 8.
4. Ельцов А. Бурдъясе мынам - инкуазь / записал Вл. Михайлов // Удмурт дунне. - 2002. - 28 июня.
5. Ельцов А. Монэ бурдъя инкуазь : [беседа] / записал Сергеев А. // Ӟечбур! – 2001. – 20 сент.
6. Комарова А. В мире словесного искусства // Вордскем кыл. – 2005. – № 11/12. – С. 34.
7. Красновская Е. Талант добрый и веселый // Время и слово. – Ижевск, 2010. – С. 478–486.
8. Пантелеева Т. Поэтика стихотворений А. Ельцова // Время и слово. – Ижевск, 2010. – С. 475–478.
9. Уваров А. Алексей Ельцов (1955) // Писатели и литературоведы Удмуртии. – Ижевск, 2006. – С. 43.