Ада Заитовна Диева вордӥськиз 1958-тӥ арын 8-тӥ куарусёнэ Башкириысь Янаул ёросысь Вот-Ошья гуртын. Атаез Заит Садриевич гуртазы «Керемет» вӧсяськонъёсты ортчытылӥз, Михаил Садриевич агаез – «Лудэ пырон» вӧсяськонъёсты [3]. Ада пичи дырысеныз ик кырӟаны яратылӥз. Солы удалтӥз – вӧзаз анай-атаез сяна, лякыт сямо но туж визьмо яратоно песяез вал. «Али но син азям на: тани песяеным ӵош черсыса пуконъямы удмурт гуръёсты нёжъяськомы. Мон куараеным сое вормыны турттӥсько. Нош тодмо гурез кырӟакумы, воксё согисько вал», – вера Ада Диева. Озьы пичи дырысен тусьты-пуньы миське-а, нюлэскын узы-боры бича-а, ӟег пӧлысь сяськаослэсь тугоко керттэ-а – мылкыдыз кырӟанэ куриськылӥз [7].

Школаын но нылаш етӥз вал. Бигер кырӟанъёсты удмурт кылэ берыктыса, эшъёсыныз ӵош кык кылын соосты кырӟаллязы. Концертъёс пуктылӥзы. Эшъёсызлэсь мылкыдзэс ӝутыса, концертлы программа дасялляз, ачиз ик режиссер но, нуись но кариськылӥз [2].

Выль Артаулысь шор ёзо школаез йылпумъяса, Ада Диева Ижкарысь профессионально-технической училищеын электромонтажниклы дышетскиз. Одӥг арзэ Ижкарысь механической заводын радиомонтажник луыса ужаз. Уж бере «Октябрь» культурая Юртысь академической хорын кырӟаз. Ас понназ нотаосты дышетӥз но фортепианоен шудыны кутскиз [1]. Удмурт кун университетысь кылосбуръя факультэтсэ йылпумъяса, отчы ик аспирантурае кылиз.

Университетэз йылпумъяса, «Италмас» ансамбле конкурсэз ортчиз: 15 мурт пӧлысь куиньзэ бырйизы. Ада кадь шудоез ӧй вал, дыр, соку. Но шумпотонэз кема ӧз кыстӥськы, «сюлмаськисьёс» сюризы. Вань улондэ, пе, татын сӧрод, мукет уж утча, артист шудо уг луы. Кылзӥськиз [2].

Озьы со вуиз ужаны Трамвайно-троллейбусной управлениын комсомоллэн секретарез луыса, пумен «Тюрагай» ансамбле кырӟаны ветлӥз [2]. Полиграфкомбинатын корректорын ужакуз, удмурт телевидениын внештатной дикторлы конкурсэ ортчиз. Кема ик ужаса ӧз вутты: бызиз, пиез вордӥськиз но вордскем гуртаз кошкиз. Отын дышетскем школаяз англи кылэз нуиз. Но вордӥськем гуртаз гань-гань улыны ӧз быгаты, сюлмыз Удмуртие куриськиз [5].

1996-тӥ арысен «Инвожо» журналлэн публицистикая ёзэтлэн корреспондентэз, редакторез луыса ужаз. Удмурт Элькунысь гожъяськисьёслэн Огазеяськоназы творческой пумиськонъёсты радъялляз, чеберлыко литератураез вӧлмытонъя бюролэн директорез вал. 2010-тӥ арын Удмурт Элькунысь гожъяськисьёслэн Огазеяськонзылэн секретарез луиз.

Ада Диева мылысь-кыдысь пыриське «Дэмен» культурая огазеяськонлэн ужаз, озьы ик со Ижкарысь Ленин ёросъя «Удмурт кенеш» Ассоциацилэн ёзчиез, творческой профессиен нылкышноослэн Федерацизылэн ёзчиез но Удмурт Элькунысь гожъяськисьёслэн Огазеяськонзылэн ӟуч секциезлэн ёзчиез.

Ада Диевалэн творчествоез пӧртэм пумо. Со кылбурчи но ас понназ дышетскем крезьгурчи. «Яратон» нимо нырысетӥ кырӟанзэ со 1999-тӥ арын гожтӥз. Нырысь крезьгурзэ, собере гинэ кылъёссэ. Кылзӥськисьёс нырысьсэ кылӥзы Ада Диеваез «Удмурт кенеш» но «Дэмен» огазеяськонъёсын радъям «Лымыгырлы» ужрадын «Лушкем яратон» кырӟанэн.

2012-тӥ арын Адалэн нырысетӥ кылбур бичетэз потӥз. «Юг Индур» нимам со книгазэ. Башкортостанын вордӥськем гожъяськись ас шаерзэ, анай-атайзэ, песянай-песятайзэ сӥлы каре, дунъя. Пинал дырлы, вордскем шаерлы, сям-йылолъёслы сӥзем гуръёс сюлэмез шунто, мылкыдэз бурдъяло («Атаелы», «Дуно песяелы»). Оглом лирической кылбуръёссэ чакласа, поэзизэ куинь люкетъёслы висъяны луэ: анай-атайлы сӥзем чуръёс; вордскем шаерез, инкуазез данъян; эрик сярысь [3].

Гожъямъёсыз печатласько «Удмурт дунне», «Ашальчи», «Инвожо», «Кенеш» газет-журналъёсын; ӟуч кылэ берыктэмъёсыз «Луч» журналын пото, бигер кылэ берыктэмъёсыз – «Янарыш» газетын (аслаз но Анатолий Демьяновлэн берыктэмез).

Кылбурчи переводъёс бордын но кужымзэ эскере: ӟуч но бигер кылъёсысь кылбуръёс, кырзанъёс берыктылэ. Ӟуч кылысь Анатолий Демьяновлэсь, Василий Глушковлэсь, Александр Вепрёвлэсь но мукет кылбурчиослэсь кылбуръёссэс удмурт кылэ берыктӥз ини. Быдӟым бигер поэтлэсь, классиклэсь Габдулла Тукайлэсь берыктэм кылбуръёсыз Кузонын куать кылын потэм «Габдулла Тукай. Кылбуръёс» (2011-тӥ ар) книгае пыртэмын.

Адалэсь кылбуръёссэ ӟуч кылэ берыктэ тодмо кылбурчи но кылысь кылэ берыктӥсь Анатолий Демьянов [3].

2004-тӥ арын Ада Диева Удмурт кун йӧскалык театрын «Синмаськи» нимын творческой ӝыт ортчытӥз, собере егитъёслэн юртазы – «Ялыке» (2007) нимо ӝыт. Видео-аудио дискъёсыз пото, кырӟанъёсыз удмурт радиоын чузъясько. Тужгес но тодмоосыз – «Вудур вадьсын», «Лушкем яратон», «Чебер пияше», «Азьло ик синмаськысал». Со сяна, Ада Диева мукет удмурт кылбурчиослэн гожъямъёссылы но крезьгур гожъя: Галина Романовалы, Яков Майковлы, Любовь Тихоновалы, Людмила Хрулёвалы, Петр Захаровлы но мукетъёслы.

Сӥё-дано нимъёсыз но пусъёсыз

2000 – Удмурт Элькунысь лулчеберетъя, печатья но иворъёсъя Министерстволэн Данъян грамотаез
2002 – «Ӝужась кизилиос» конкурслэн лауреатэз (Башкортостан)
2011 – Удмурт Элькунысь Кун Кенешлэн Данъян грамотаез, Николай Бурашниковлы сӥзем кылбуретъя Межрегиональной ӵошатсконлэн лауреатэз (Чайковский)
2012 – Удмурт Элькунысь лулчеберетъя, печатья но иворъёсъя Министерстволэн Данъян грамотаез

Уже кутэм литература

1. Диева А. Кырӟаса лэзём али // Удмурт дунне. – 2003. – 25 июль. – С.13.
2. Диева А. Мӧзмон: Ада Диева // Ашальчи. – 2005. – № 4. – С. 12–13.
3. Зуева-Измайлова А. Азькыл // Юг Индур / А. Диева. – Ижевск, 2012. – С. 3–7.
4. Любимова С. Ваньмыз кутскиз «Яратон» бордысен // Инвожо. – 2001. – № 4. – С. 31; 34.
5. Романова Г. Пӧзись ошмес ӧръяське // Удмурт дунне. – 2004. – 7 май. – С. 12.
6. Соловьёва Н. Ворекъясь шудбур сиос // Известия Удмуртской Республики. – 2007. – 11 янв. – С. 12.
7. Хайдар Р. Крезьгура но кырӟа Ада // Удмурт дунне. – 2007. – 28 нояб. – С. 6.