Русский | Удмурт

Олег Геннадьевич Четкарев вордӥськиз 1953-тӥ арын 11-тӥ толсуре Дэри ёросысь Изгуртын.

Семья кусыпъёссы туж шунытэсь, умоесь вал. Мумиз-дышетӥсь сюлмысьтыз яратӥз книгаосты но кырӟанъёсты. Удмуртъёсыз но, ӟучъёсыз но крезьгуръёс кельшизы солы. Бубиз синмаськымон усто шудылӥз арганэн но скрипкаен. Шофёрын ужаз. Шудтэм учыре шедьыса, со вазь быриз. Валамон ини, мумизлэн-бубизлэн мылкыдъёссы пизылы но юн пыӵазы [1].

Литература удысэ нырысетӥ вамышъёссэ Олег Четкарёв лэсьтӥз школаын дышетскыкуз. Кылбуръёс малпаны яратоз вал. Нош урокын сочинение гожтоно ке, одно ик эркын шуоно темаез бырйылӥз. Куд-ог гожъямъёссэ быдэс класс азьын лыдӟылӥзы. «Толэзё уин» сочиненизэ печатлазы районысь «Ленинец» газетын [1].

Олеглы туж кельшо вал литература но физика. Соин ик, школаез йылпумъяса, со кытчы дышетскыны мыныны ӟудӥз вал. Но соку физикаез яратэмез вормиз. Егит пияш Казане кошке но отысь училищеын связистэ дышетске. Татын со ӵош сюре но Юкаменскын одӥг бригадаын артэ ужа Флор Васильевлэн выныныз Валериен. Соиз тодматэ Олегез агаезлэн книгаосыныз [1].

Училищеез Олег Четкарёв «витьёсын» гинэ йылпумъяз. Удмурт университетын журналистъёсты дасяны кутскемез тодыса, филология факультетлэн удмурт ёзэтаз дышетскыны пыриз. Татын тодон-валан люкакуз ик, ӵемгес но ӵемгес веросъёс, кылбуръёс гожъяны кутскиз, нош «Дась лу!» газетын практиказэ ортчыкуз, выжыкылъёс но кылдытӥз [5]. Студент дыръяз Василий Петровский тодосчилэн кивалтэмез улсын ортчись семинаръёсы ветлӥз, литературно-творческой кружоке, арганэн шудыса художественной самодеятельносте пыриськиз.

1976-тӥ арын, университетэз йылпумъяса, Олег Четкарёв «Последние известия» газетлэн редакцияз ужаз, Удмурт радиоын нылпи передачаослэн редакторзы луыса тыршиз. Бӧрысь – Удмурт телевидениысь художественной программаосъя валтӥсь редактор, «Молот» журналысь проза но публицистика ёзэтлэн редакторез, трос аръёс ӵоже Удмуртиысь Писательёслэн огазеяськоназы чеберлыко литератураез эскерись-чаклась луыса ужаз. Тӧролэн воштӥсез но тӧро луыса тыршиз [4]. 2000-тӥ арысен – «Кенеш» журналын публицистика ёзэтэзлэн редакторез.

Удмурт лыдӟисьлы Олег Четкарёвлэн нимыз тодмо луиз 1970-тӥ аръёслэн пумазы. Гожъяськон сюрессэ веросъёс бордысен кутскиз, соослэн пуштроссы ӵемысь герӟаськемын вал аслаз авторлэн пичи дырысьтыз тодэ ваёнъёсыныз, гуртын будэм пияшлэн улонэз валаны тыршеменыз. Нош удмурт литературае йыг-йыг, солы гинэ тупась куараен со пыриз ини 1990-тӥ аръёсы, куке кылдытӥз синмаськымон повестьёссэ «Чагыр но дыдык...» (1989), «Кыӵес» (1993) но «Пиртэш толэзь» романзэ (1996).

«Мон ворми тонэ» нырысетӥ книгаез 1982-тӥ арын потӥз. Отчы пыризы веросъёс, легендаос но пинал дырысьтыз тодэ ваёнъёсызъя гожтэм «Нуналэз воштэ нунал» повесть. Берлогес потӥзы «Выж герӟа ярдуръёсты» (1985) повесть, «Йӧ вылэ тэтчон» (1989) но «Крещение – грехам отпущение» (1993, Анатолий Демьяновлэн берыктэмез) бичетъёс.

Удмурт прозаез эскерись тодосчи Татьяна Ивановна Зайцева гожтэ: «Олег Четкарёвлэн произведениосыз удмурт чеберлыко литература понна бадӟым вормон шуыны луоз... Пусйыны кулэ — нырысь ик, Олег Четкарёвлэн аслаз темаез. Асьме литератураын вань солы гинэ тупась, соин гинэ туж аспӧртэмлыко ӝутэм ужрад: гурт но город вискы сюрем адямилэн улонэз. Шонергес вераса, гурт но город вискы шедем адямилэсь драмазэ сэрттон-пертчон. Та секыт адӟонэз Олег Четкарёв удмурт прозаын ваньмызлэсь мургес усьтӥз, паймымон но аспӧртэм шараяны пӧрмытӥз «курадӟись» адямилэсь вӧсь луэмзэ, солэсь лул висёнзэ котыр бергась дуннеен герӟаны быгатӥз. Ӟуч литература ас вакытаз трос поттӥз таӵе геройёсты, соосты маргинальная личность шуизы.

Олег Четкарёв асьме литературае маргинальной адямиез пыртӥз но сое удмурт материал вылын возьматӥз, удмурт адямилэсь таӵе адӟонзэ тунсыко но выль гожъяськон амалъёсты уже кутыса суредаз.

Удмурт лыдӟись понна кема витем но огдыре ик малпамтэ шорысь кузьым луиз Олег Четкарёвлэн «Чагыр но дыдык...» повестез» [2]. 

Удмурт критикъёслэн но тодосчиослэн пусъемзыя, Олег Четкарёв трослы выльдӥз но азинтӥз повесть жанрлэсь луонлыкъёссэ. Солэн быгатонлыкез но гожъяськон кужымез тужгес но шараяськиз та жанрын. Туала удмурт повесть кылдытӥсьёс пӧлысь со одӥгез тунсыкоез автор луэ. Сое со ачиз но шӧдэ, тазьы валэктэ: «Одӥг пичи повестьын ик вакыт сярысь но, адями сярысь но трос вераны луэ. Оло, бадӟым жанр борды кутскымтэелэн одӥгез мугез ӵапак та ик луэ» [5].

«Чагыр но дыдык» (1989), «Кыӵес» (1993) повестьёсыз Олег Четкаревез туала удмурт гожъяськисьёслэн нырысетӥ радазы поттӥзы. Татьяна Зайцева гожтэ, «Чагыр но дыдык» повестьлэн потэмез огдыре кемалась возьмано ни но витьымтэ но, шуыса. Огласянь гожъяськись «маргинал» адями темаез азьланьтӥз, макет ласянь – витьымтэ шорысь дӥсьтыса национальной прозаез выльдон борды басьтӥськиз. Фольклорен аналогиос татын зэмлыко образъёсын но учыръёсын валче сыло, публицистической материал философ валэктонэныз [3].

«Кенеш» журналын печатламын «Пиртэш толэзь» (1996), «Кырныж ӧрыд вера» (2003) романъёсыз. Татьяна Зайцева пусъе, «Пиртэш толэзь» роман научной фантастика жанрлы матын луэ шуыса [3].

Олег Четкаревлэн гожъямъёсыз пыртэмын «Дедушкин родник» (М., 1981), «Солнышко» (1987), «Побратимы» (1988), «Голубые дали» (Саранск, 1990), «Жильыртӥсь ошмес» (1992), «Быльырам синкыли» (1997), «Удмурт калавĕсем» (Шупашкар, 2002, чуваш кылын), Алевтина Журавлевалэн «Анай кыл» (2003), «Родной земли просторы» (2004), «На переломе эпох» (2006), «Азвесь кышетэн толэзь» (2007) книгаосы.
Олег Четкарев Валентин Распутинлэсь, Станислав Романовскийлэсь, Олег Поскребышевлэсь, Анатолий Демьяновлэсь, Семен Шуртаковлэсь но мукет ӟуч гожъяськисьёслэсь произведениоссэс удмурт кылэ берыктӥз. Аслаз гожъямъёсыз нош  ӟуч, коми, пор, чуваш кылъёсы берыктэмын.

Сӥё-дано нимъёсыз но пусъёсыз

1996 – Удмурт Элькунысь лулчеберет удысысь сӥё-дано ужась

Уже кутэм литература

  1. Богомолова З. Улон тубатлэн лёгетъёсыз // Инвожо. – 1993. – № 4. – С. 3–7.
  2. Зайцева Т. О. Четкарёвлэн повестьёсыз сярысь малпанъёс // Движение эпохи – движение литературы : удмуртская литература ХХ века : учеб. пособие. – Ижевск, 2002. – С. 206–218.
  3. Зайцева Т. Соотношение национального и универсального в прозе О. Четкарева // Удмуртская проза второй половины XX – начала XXI века : национальный мир и человек. – Ижевск, 2009. – С. 282–304.
  4. Олег Геннадьевич Четкарёв (1953) // Завьялово ёросысь писательёслэн но поэтъёслэн творчествозы. – Ижевск, 1997. – С. 79–86.
  5. Пантелеева В. Олег Четкарёв (1953) // Удмурт литература / С. Арекеева [и др.]. – Ижевск, 2008. – С. 357–359.
  6. Сунцова А. Витьтон – улонлы пушъён // Ӟардон. – 2003. – 16 дек. – С. 1, 2.
  7. Уваров А. Олег Четкарев (1953) // Писатели и литературоведы Удмуртии. – Ижевск, 2006. – С. 121–122.
  8. Четкарев Олег Геннадьевич // Удмуртская Республика. – Ижевск, 2008. – С. 714–715.
  9. Четкарев Олег Геннадьевич (11. 12. 1953) // Феномен Удмуртии. – Ижевск, 2008. – Т. 7. – С. 365.