Татьяна Николаевна Чернова вордӥськиз 1953-тӥ арын 15-тӥ толсуре Игра ёросысь Зура черкогуртын.

Будэмын куать нылпиё семьяын. Быдэ вуиз Можга ёросысь Пазял гуртын [6].

Анаез, Лидия Чернова, нырысь ужаз почтальонын – газет-журнал нуллӥз. Нылыз лыдӟе, учке вал соосты. Нош мемиез библиотекаын ужаны кутскыса, Татьяна аслыз книгаослэн кузёзы кадь потылӥз. Вань удмурт книгаосты, оло, пырпотылӥз, соос пӧлын – «Вордӥськем палъёс», «Вуж Мултан», «Лӧзя бесмен»… 2-тӥ классын дышетскыкуз сценарий дасяса, эшъёсыныз концерт пуктӥзы. Со вакытэ ик «Ленинской знамя» ёрос газет конкурс ялӥз: суредъя кылбур яке верос, пе, гожтоно. Анаез но нылзэ ӝутказ. Соиз отчы ужзэ ыстӥз. Бӧрысьгес «Дась лу!» газетэн кусып тупатӥз. Таня пичи дырысеныз вылез, тунсыкоез доры кыстӥськиз. Школаын ӟеч дышетскись нылаш туж яратыса учкылӥз журналъёсты, синмаськылӥз отысь суредъёслы но туспуктэмъёслы. Анайзэ соосты вандылыны курылӥз. Озьы аспӧртэм альбом кылдӥз [1].

Пазялысь 8 классъем но Бадӟым Учаысь 10 классъем школаосты йылпумъяса, Татьяна дышетскыны пыре Удмурт кун университетлэн филология факультетаз. Татын со ветлӥз Д. Яшинлэн литературно-творческой кружоказ. Соку ик журналист луон сярысь но малпанэз кылдӥз [6].

1976-тӥ арын дышетсконзэ быдтыса, одӥг арзэ Пичи Пурга ёросысь Вуж Монья школаын ужаз, соку ик бызиз но, сюлэмыз куремъя, Ижевске кошкиз. 1977–1985-тӥ аръёсы «Советской Удмуртия» газетын ужаз. 1986-тӥ арысен «Удмуртия» издательствоын редактор луыса тыршиз [8]. «Быдэ вуонэ тупаз, Михаил Федотовен ӵош издательствоын ужакум. Мон соку йырысеным пыдозям поэзия «шумесэ» выйылӥ… Редактор луон вирам ик пыӵамын, лэся. Та ужлы вордскемме шӧдӥ, кылсярысь, Арсений Загребинлэн но Любовь Тихоновалэн книгаоссы бордын ужакум. Чуръёссы пӧлы выйыса дась вал уй-нунал пукыны…» [7].

1991–1992-тӥ аръёсы Татьяна Чернова лулчеберетъя министерстволэн научно-методической центраз методист вал, 2001-тӥ арын «Вордскем кыл» журналын ужа, 2002–2004-тӥ аръёсын – Писательёслэн огазеяськоназы литературной консультант. 1996–2001-тӥ аръёсы но 2004-тӥ арысен тырше «Удмурт дунне» газетын журналист луыса [8].

1998-тӥ арын трос кужымзэ сётӥз «Ашальчи» журналэз кылдытонлы.

Татьяна Чернова Удмуртиысь нылкышно кылбурчиос пӧлысь нырысетӥосыз радын вал, кинэ Россиысь гожъяськисьёслэн Огазеяськоназы пыртӥзы (1988). Со мылысь-кыдысь пыриськылӥз шаерысьтымы творческой егитъёслэн семинаръёсазы, Перьмын ортчем Уралысь но Шундыпуксён Сибирьысь егит гожъяськисьёслэн совещаниязы (1976), СССР-ысь егит гожъяськисьёслэн совещаниязы (1984).

Кылбуретлы яратонэз Татьяна Черновалы анаез пыӵатӥз, угось со ачиз но гожъяськись. Татьяналэн нырысетӥ кылбурез печатламын вал «Советской Удмуртия» газетлэн «Пинал куараос» рубрикаяз. Кылбурчилэн гожъямъёсыз потӥзы таӵе нимысьтыз бичетъёсын: «Тыныд тодмотэм кырӟанэ» (1980), «Та шундыё дуннеямы» (1986), «Тӥ ӧй тодысалды» (1991). Бадӟым кылбур циклъёсыз пыризы дэмен бичетъёсы-сборникъёсы: «Голубые дали» (Саранск) – 1990, «Мир женской души» (Ижевск) – 1992, «Ньыль тылскем» (Эстония) –2002. Озьы ик «Молодая гвардия», «Крестьянка», «Урал» но мукет журналъёсы [8].

Ма сярысь гожъя кылбурчи Татьяна Чернова? Яратон сярысь. Нырысь ик, вордскем, будэм палъёссэ яратон: «Гондыркуш – кӧкые…», «Мон пукисько Карлуд дурын…», «Тау тӥледлы» но мукет. Малы поэт яратэ вордскем шаерзэ? Со татын вордскемын, будэмын, татын котькудӥз сузэр-вын кадь дуно, удмурт ныл сюлэмез огкадь валало. Татын мусояське турын но, йырсиосты но тӧл веша, татын ӵыжы-выжыос, нылъёсыз-дыдыосыз, нэнэез, кудӥз котьку дась вал буйгатыны, кытын инбам пызырес – лыздари… [1].

Кыкетӥез, яратӥсь сюлэмъёс. Яратон тема шӧдӥськымон паськыта но кытӥяз улонлэсь пуштроссэ, адямилэсь кыӵезэ тодон-эскеронъёс вылэ выже. Татьяна Черновалэн кылбуръёсаз ӵемысь пумиськылэ шудтэм яратон. Но со яратон улонэз карганэ уг вутты. Яратон шудтэм луыкуз но, адямилы дунолэсь но дуно луэ. Поэтессалэн кылбуретаз яратон – кортнаны луонтэм мылкыд. Уродзэ, шушсэ, гольтрэссэ таркам сяна, со ӟечсэ, югытсэ но куашкатыны ворме. Но котькыӵе мед луоз, со котьку яке вырӟытэ-донге, яке лобӟытэ-ӝутэ… Татьяна Черновалэн творчествояз вылӥе омырскем мылкыдъёс валтӥсь луо [2].

Тазьы чуръёс бӧрсьы чуръёсты лыдӟыса кылбурчилэн улэм-вылэмез, семьяез, эшъёсыз, яратэмез но кайгыремез – ваньмыз син азе пуксе, ӧвӧл отын лыдпусъёс но гурт нимъёс, ужан интыос но книгаослэн йыръянъёссы [1]. 

Татьяна Черновалэн кылбуретэз романтизм пуштросъем. Та тодмет шӧдӥське нимаз кылбуръёсын но («Выжыкыл дунне», «Шедьтэ сяськадэс»), произведениосын валтӥсь, ӵем кутӥськись кылсуретъёс пыр но. Озьы ке но авторлэн быдэсак творчествоез туж аспӧртэм но паськыт, романтизм ӧре гинэ сое тэрытыны уг луы. Темаос ласянь чаклано ке, пумитаны луэ яратонлы сӥзем чуръёсты но («Синъёсамы пиштӥз», «Тон кошкид, мон кыли…», «Вожан сяськаез тӥяло…»), мур философия пуштросъем кылбуръёсты но («Тӧл улля аръёсты…», «Нылы но анае», «Малпаськон»), гражданской лирикаез но («Куштом пурысь кышетмес»). Кылбурчилэн тросэз произведениосыз фольклор поэтикаен герӟаськемын, кылсуредъёсыз, эпитетъёсыз но метафораосыз калык кылосысь асэстэмын кадь [3].

Татьяна Черновалэн сценарийёсыз шаерысьтымы газет-журналъёсын печатласькизы. Василий Ушаковен ӵош гожтэм «Айна» пьесаез Удмурт Элькунысь Йӧскалык драматической театрын пуктэмын вал (2000). Финн-угор театръёслэн фестивалязы но та спектаклез туж умой пумитазы.

Татьяна Черновалэн гожъямъёсыз печатласькизы «Горизонт» (1980), «Встреча друзей» (Пермь, 1981), «Горизонт-82» (1982), «Между Волгой и Уралом» (Уфа, 1982), Глеб Пагиревлэн «От берега до берега» (1984), «”Молотлы” – 60 ар» (1986), «Середина земли родной» (М., 1987), «Созвездие» (Л., 1988), «Голубые дали» (Саранск, 1990), «Вордскем музъем-аныкае» (1990), «На просторах земных» (М., 1990), «Покчи эше» (1992), «Мир женской души» (1992), «Как молния в ночи… : К. Герд. Жизнь. Творчество. Эпоха» (1998), «Удмурт литературая антология» (2001), «Ньыль тылскем = Neli udmurditari» (Таллин, 2002); «Уна рӧма сикӧтш» (Сыктывкар, 2002, коми кылын), «Котырысь улон но мон» (2003), «Удмурт литература» (2004), «Родной земли просторы» (2004), Александр Шкляевлэн «Эшъёс-юлтошъёс» (2004), «Удмурты» (М., 2005), «Азвесь лодка = Hõbepaat» (Таллин, 2005, эстон кылын), «Зарни дэремен шунды» (2006), «На переломе эпох» (2006), Любовь Петровналэн «Удмурт нылкышно кылбуретлэн тулкымъёсыз» (2007), «Льӧм ю = Льӧмпуа юок = Ломбо эн’ер = Zelnicemeggyes patakoсska = Льӧмпу шур = Toomingajȏ gi = Tuomijoki = Tom’jogi» (Сыктывкар, 2008, коми кылын) книгаосын; шаерысьтымы газет-журналъёсын, «Молодая гвардия», «Крестьянка», «Урал», «Дружба» журналъёсын. Кылбуръёсыз берыктэмын ӟуч, украин, эстон, бигер, пор, мордва, коми, чуваш кылъёсы. Ачиз Татьяна Чернова удмурт кылэ берыктылэ ӟуч, коми, пор, мордва, эстон, француз, бигер, чуваш, чечен кылъёсысь произведениосты.

Куд-ог кылбуръёсыз тодмо кырӟанъёслы прмизы: «Трос-а кулэ милемлы?», «Мон тынад тодад-а?», «Мынам шумпотонэ», «Кылъёсыд тынад» но мукет; крезьгурзэ гожъязы Геннадий Бекманов, Светлана Белых, Сергей Кириллов, Пантелей Кузнецов, Юлия Кузьмина, Лидия Михайлова, Екатерина Павлова, Николай Постников, Николай Трубачев, Николай Уткин, Надежда Уткина но мукет крезьгурчиос.

Сӥё-дано нимъёсыз но пусъёсыз

1989 – Удмурт Элькунысь лулчеберет удысысь сӥё-дано ужась
1994 – Флор Васильев нимо литературной премилэн лауреатэз (Удмуртия)
2009 – Финляндиысь М. А. Кастрен нимо Огазеяськонлэн журналист премиезлэн лауреатэз

Уже кутэм литература

1. Гаврилова М. «Сюлэмы пуксиз кыл бурд вылэ…» // Ӟечбур! – 2003. – 18 дек.
2. Зуева А. Тунаськон-веднаськон йылолъёс – нылкышно кылбуръёсын / А. Зуева, Е. Галеева // Кенеш. – 2001. – № 3. – С. 53-58.
3. Пантелеева В. Татьяна Чернова (1953) // Удмурт литература / С. Арекеева [и др.]. – Ижевск, 2008. – С. 377–384.
4. Пантелеева В. Чернова (Петрова) Татьяна Николаевна // Удмуртская Республика. – Ижевск, 2008. – С. 714.
5. Федорова Л. Голос феминности в поэзии Т. Черновой // Удмурт нылкышно кылбуретлэн тулкымъёсыз / Л. Федорова. – Ижевск, 2007. – С. 168-173.
6. Федорова Л. Татьяна Чернова (1953) // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 214-216.
7. Чернова Т. Парнас, Пегас но пегась / записал А. Шкляев // Удмурт кизилиос : очерки, зарисовки, интервью (2001-2007). – Ижевск, 2007. – С. 84–85.
8. Яшина Р. Татьяна Чернова (1953) // Писатели и литературоведы Удмуртии. – Ижевск, 2006. – С. 120–121.