Люза Геннадьевна Бадретдинова вордӥськиз 1965-тӥ арын 16-тӥ толсуре Башкириысь Бурай ёросысь Алтау гуртын колхозникъёслэн семьяязы. Атаез 18 ар ужаз колхозын бригадир луыса. Нош анаез 14 арескысен доярка луыса тыршиз. Соос ӵошен вить нылпи будэтӥзы но пыд вылазы султытӥзы. Люза – бадӟымез нылпизы [6].

Люза Кузебайысь шор-ёзо школаын дышетскиз. Укмысэтӥ классын визьнод люкакуз, егит гожъяськисьёслэн семинаразы пыриськиз. Та ужрадэз ортчытӥз тодмо удмурт кылбурчи Владимир Романов.

Школаез йылпумъяса, Люза Бадредтинова Удмурт кун университетысь кылосбуръя факультетлэн удмурт ёзэтаз дышетсконзэ азьланьтӥз.

1987-тӥ арын Люза «Дась лу!» газетын редактор но корреспондент луыса ужаны кутскиз;  1991-тӥ арысен со «Кизили» журналын кылкутӥсь секретарь луыса тырше.

Кылбур гожъян борды Люза  Бадретдинова школаысен ик басьтӥськиз. Ньылетӥ классын дышетскыкуз,  ӟуч кылъя но литературая дышетӥсезлэн Фания Ильтимировна Байметовалэн куремезъя  Башкирилы сӥзьыса нырысетӥ кылбурзэ гожтӥз. Со дырысен Бадретдинова «Дась лу!» газетэн юн кусып возиз. Нош 1984-тӥ арын, 10-тӥ классын дышетскыкуз, ужъёсыз печатласькизы «Йыр вадьсын инбам» бичетын.

Туннэ Люза Бадретдиновалэн кылбуръёсыз «Дась лу!», «Удмурт дунне», «Кизили», «Инвожо», «Кенеш», «Ашальчи» но «Луч» газет-журналъёсын печатласько. Кӧняез ке Любовь Федоровалэн «Удмурт нылкышно кылбуретлэн тулкымъёсыз» (2007) книгаяз пыртэмын. Нырысетӥез нимысьтыз кылбур бичетэз потӥз 2006-тӥ арын «Сюлэм пужыос» нимын.

Люза Бадретдиновалэсь кылбуръёссэ чильпаськемен ӵошатыны луоно: со чильпаськыку сямен бӧрсьысь бӧрсе пужы пуктэ но синмаськымон арбери кылдытэ, кожалод. Удмурт кылбурчи Людмила Кутянова пусйиз: та кылбурчилэн чуръёсаз кышномуртлэн дунне шоры учкемез, солэн малпанъёсыз шӧдӥсько шуыса. Чылкыт но ненег,  со вакытэ ик юн но оскымон, со лыдӟисьсэ улонэз яратыны дышетэ, уродэзлэсь палэнтӥськыны ӵектэ. Люза Бадретдиновалэн кылбуръёсыз паймымонэсь, соос фольклорен зол герӟаськемын, пушказы аспӧртэмлыко крезьгур чузъяське [5].

Кылбуръёсаз со уно пӧртэм дуннеос кылдытэ. «Гужем дунне» лыдӟисьёсты инкуазен герӟа. «Сӥзьыл дунне» мур малпаськон, ортчемзэ тодэ ваён вакытэ вуттэ. Люза Бадретдиновалэн кылбуретэз буйган мылкыдо. Яратонлэн интыез татын – саюлын, со огдыре ик вань но ӧвол но [1].

Кылбурчилэн «Мынам сюресэ – сюлэме» нимо кыкетӥ бичетэз 2008-тӥ арын печатласькиз Эстониын финн-угор калыкъёслы юрттон программая Книга потӥз эстон, удмурт, ӟуч, англи кылъёсын.

Финн-угор гожъяськисьёслэн калыккуспо огазеяськонзылэн тӧроез  Арво Валтон бичетлы йылпумъян гожтыса, пусйиз, Люзалэсь кылбуръёссэ лыдӟыса амалтэк яратонлэн кужымезлы, чылкытлыкезлы оскыны кутсконо шуыса. Со вакытэ ик лыдӟись уг адӟы авторлэсь яратоно адямизэ – валантэм, вань со оло ӧвӧл. Кылбурчи со понна но, солы пумит но уг нюръяськы. Люзалэн кылбуръёсыз огшоры кылын но мур пуштросо гожтэмын. Вакчи, шуак но аспӧртэм йылпумъяськись чуръёс сюлмысь потэмын – утчамын ӧвӧл [3].

Люза Бадретдинова  покчиос понна но гожъяське. Солэн веросъёсыз, выжыкылъёсыз, сценарийёсыз «Кизили» журналын но  «Ӟечбур!» газетын печатласько.  «Ойдолэ лыдъяськоме, чиньыосын шудоме»  кылбурез  «Зарни дэремен шунды» (2007) семьяен лыдӟон книгае пыртэмын. Озьы ик со берыктон ужен тунсыкъяське – коми-пермяк, бигер, ӟуч авторъёсты удмурт кылэ берыктэ.

Куд-ог гожъямъёсыз кырӟан луэмын. Крезьгуръёслэн авторъёссы – Ульфат Бадретдинов, Пантелей Кузнецов, Надежда Уткина, Римма Шкляева.

Сӥё-дано нимъёсыз но пусъесыз

1996-тӥ ар – Удмурт Элькунысь сӥё-дано журналист, Удмурт Элькунысь лулчеберетъя, печатья но иворъёсъя Министерстволэн Данъян грамотаез
2010-тӥ ар – Эстониысь ӵыжы-выжы луись калыкъёслэн Программалэн литературной премиезлэн лауреатэз

Уже кутэм литература

1. Арзамазов А. Сюлэм пужыос  – кыл пужыос // Инвожо. – 2007. – № 9/10. – С. 55–56.
2. Бадретдинова Л. Мынам сюресэ – сюлэме / вераськиз А. Ермолина // Ӟечбур! – 2001. – 20 сент.
3. Валтон А. [Послесловие] // Minu tee viib südamesse = Мынам сюресэ – сюлэмэ = Дорога в сердце = My way is to the heart / L. Badretdinova. – Tallinn, 2008. – Lk. 61.
4.  Кабанова Н. «Кыӵе умой – тон вань» // Вордскем кыл = Родное слово. – 2011. – № 1. – С. 17.
5. Кутянова Л.   Югыт. Чылкыт. Шуныт... // Кенеш. – 2006. – № 11/12. – С. 94–98.
6. Раянова Р. Кылбуръёсы мынам шуныт тулкымъёсын вешалляса пылатэмын... // Вордскем кыл. – 2008. – № 10. – С. 24–26.