Алексей Арзамазов вордӥськиз 1985-тӥ арын 20-тӥ южтолэзе Нижний Новгородын. Анаез экономист, атаез военной.

Пияш пичи дырысеныз тунсыкъяськиз историен, этнографиен, пӧртэм кылъёсын. Быдэстӥз медресе школаез. Школаын дышетскыкуз ик умой вераське вал ини бигер, пор, мордва кылъёсын, ӟеч тодэ англи, француз, итальян, латыш, эсперанто кылъёсты. Кыл дышетонын выль амалъёсты утча-кылдытэ. Со ик спортэн но выре, волейболэн, баскетболэн шудэ.

Пичи дырысеныз йырсазьзэ но лул-сюлэмзэ керӟегъятыны кутскиллям юанъёс: кытысь-о мон, кытын-о мынам выжыосы? Сэрттыны-пертчыны кутскем но паймем: атаез вылэм Уни палась, анаез – Карлыган палась, кыкназы но удмурт выжыысь. Анай-атайёсыз пиенызы вордскем кылынызы вераськиллямтэ. Соин ик Алексей удмурт луэмзэ тодытэк будэм. Ас выжыосыз сярысь со бадӟым классъёсын дышетскыкуз кылэм ини. Соку ик удмурт кылэз дышетон борды басьтӥськем. Олёш кутскем ӵыжы-выжы пытьыоссэ мургес но мургес утчаны. Гожтэм «Шунды» огазеяськонэ. Сое гужем ӧтиллям «Шундыкар» лагере. Туж кельшем солы удмурт кыл, удмурт кырӟанъёс, удмурт йылолъёс. Нырысьсэ кутскем ассэ зэмос удмурт адямиен шӧдыны [5].

2002-тӥ арын Алексей Арзамазов Удмурт кун университетысь истори факультетэ дышетскыны пыре, кыкетӥ курсын нош удмурт кылосбуръя факультетлэн венгер ёзэтаз выже. 2007-тӥ арын Удмуртиысь историяя, кылъя но литературая Институтлэн (УИИЯЛ УрО РАН) кылосбур эскеронъёсъя ёзэтэ аспирантурае пыре, научной кивалтӥсез – профессор Татьяна Григорьевна Владыкина. 2010-тӥ арын дырызлэсь вазь «Феномен визуального в современной удмуртской поэзии (на анализе творчества П. М. Захарова)» темая кандидат диссертацизэ уте. Со арысен ик Удмурт кун университетлэн но УИИЯЛ УрО РАН-лэн гуманитарной технологиосъя Финн-угор научно-образовательной центрын научный сотрудник луыса ужа.

Со сяна, 2005-тӥ арысен Алексей Арзамазов «Инвожо» журналын редактор луыса тырше. 2008-тӥ арысен Удмурт ПЕН-клублэн вице-президентэз луэ. 2010-тӥ арысен – «Ижевск плюс» журналын валтӥсь редактор.

Алексей Арзамазов трос научной статья гожтӥз, «Тэ-тэ» (2005) нимын удмурт кылэз ас дышетонъя книга поттӥз, со сяна «Эскизы» (2005), «Этюды» (2006), «Феномен визуального в современной удмуртской поэзии (на анализе творчества П. М. Захарова)» (2010) но мукет книгаосты.

Сыӵе пинал мурт со лыдӟиз лекциос но стажировка ортчиз Будапештын, Парижын, Стокгольмын, Таллиннын, Амстердамын но мукет интыосын. Куд-ог научной но чеберлыко ужъёсыз берыктэмын англи, француз, венгер, фин, эстон, бигер, украин кылъёсы. Ачиз вераське англи, француз, итальян, венгер, удмурт, мордва, пор но бигер кылъёсын [10].

Очей Арзами, озьы шуэ ассэ Алексей Арзамазов, Удмуртие лыктэм беразгес ик кылбуръёс гожъян борды кутске. Произведениосыз нырысь потазы журнал-газет бамъёсын. Нош собере огез бӧрсьы мукетыз нимаз книгаосын но печатласькизы: «Инкуае» (2004), «Озьы» (2005), «Эскизы» (2005), «Этюды» (2006), «Быдэс» (2009), «Койнэ «Будинос» – общий язык финно-угров» (2009) но мукет бичетъёс но ужъёс. Эстониын финн-угор калыкъёслэсь кылзэс утёнъя кутэм программая поттӥзы ньыль кылын кӧня ке авторъёслэсь книгаоссэс. Алексейлэн но удмурт, ӟуч, эстон но англи кылын «Эн = Ära = Don’t = Не» (2007) нимо бичетэз потӥз.

Кылбуръёсыз паймыто но шумпотто: ӟеч адӟиське кылбурасьлэн мылкыдыз, малпаськон радыз но гожъяськон пӧртэмлыкез. Удмурт кыллэсь зумытсэ, чеберзэ, кужымзэ али гинэ шӧдыны-валаны кутскыса, Алексей Арзамазов кышкатэк басьтӥське улонлэсь курытсэ но ческытсэ дунъяны, дуннелэн юанъёсызлы валэктонъёс кылбур кылын утчаны. Очей Арзами пачыл мылкыдъёсын улонлэн ӧраз пырыны тырше. Солы ваньмыз тунсыко, паймымон потэ: сӥзьыл усись ӵуж куар («Усись ӵуж куар кален гинэ аслыз быръён бырье…») но лымшоре лобӟись туриос, йӧ улын нырулӥсь ошмесъёс но букосэ люкаськись лымыос («Адӟонмы со сыӵе: кошкыло,/ Лобӟыло лымшоре туриос,/ Йӧ улын ошмесъёс ныруло,/ Люкасько букосэ лымыос…»)…

Нош тужгес пыдло учкыны тырше со адямилэн лул-сюлэм пушказ. Мар отын? Кыӵе кужым адямиез шудбуро каре, мар сое жуммытэ? Малы со вордӥське, кыӵе сюлмаськонъёсын нуналъёссэ тырмытэ, кыӵе осконэн ассэ юнматэ? Юанъёс пумтэм трос, соос котькуд кылбураз сямен пумисько [8].

Алексей Арзамазовлэн гожъямъёсыз «Удмурт дунне», «Ӟечбур!», «Инвожо», «Кенеш» газет-журналъёсын, Удмурт ПЕН-клублэн альманахаз печатласько. Озьы ик «Вуюись» (2003) литературной студие ветлӥсьёслэн сборниказы пыртэмын, со сяна, «Азвесь лодка  = Hõbepaat» (Таллин, 2005, эстон кылын), Kuum ӧӧ (Таллин, 2006, эстон кылын) книгаосы но.

Дунне литератураен зол пыӵам адями – Алексей Арзамазов трос выре кылысь кылэ берыктон ужен. Удмурт кылэ берыктӥз быдэс дуннелы тодмо луись чуваш кылбурчилэсь Геннадий Айгилэсь авангардистской шӧмо кылбуръёссэ, финн-угор, француз но мукет авторъёсты. Вань ужамез, тыршемез син азе йӧтытэк уг кыльы. Алексей Арзамазов университетын дышетскыкуз ик гуманитарияя удысэз самой усто эскерись студент луиз – регионъя премия утӥз. Удмурт литератураез но культураез эскеремез понна, 2007-тӥ арын ХХI даурысь Россиысь егит тодосчиослэн лауреатсы луиз. Грамота вӧзы нимысьтыз час кузьым басьтӥз [10].

Сӥё-дано нимъёсыз но пусъёсыз

2006 – Россиысь тодосъёсъя но дышетонъя Министерстволэн Огъя Росси «Тебя оценят в XXI веке» конкурслэн лауреатэз
2007 – Россиысь XXI даурысь егит тодосчиос премилэн лауреатэз

Уже кутэм литература

1. Андреева М. Самый неугомонный и нестандартно мыслящий студент-гуманитарий УдГУ // Удмуртский университет. – 2006. – 31 янв. – С. 3.
2. Арзамазов А. Бертон : [беседа] / записала З. Рябинина // Удмурт дунне. – 2005. – 30 дек. – С. 6, 11.
3. Арзамазов А. Влюбленный в язык, или Шесть «жизней» на одном пути : [беседа] / записала М. Масленникова // Инфо-Панорама. – 2006. – 2 нояб. – С. 13.
4. Арзамазов А. Наш двигатель – конкурентоспособность : [беседа] / записал П. Баженов // Герд. – 2004. – 26 марта.
5. Владыкин В. Аслым но кузьым // Инвожо. – 2003. – № 3. – С. 28.
6. Владыкин В. Предисловие, которое, кажется, совсем не обязательно // Эскизы / А. Арзамазов. – Ижевск, 2005. – С. 5–7.
7. Владыкин В. Яратӥсь адями // Быдэс / А. Арзамазов. – Ижевск, 2009. – С. 4–6.
8. Кутянова Л. Кыллэн пӧртмась кужымезлы синмаськыса : Очей Арзамилэн кылбуръёсыз сярысь куд-ог малпанъёс //Инвожо . – 2006. – № 4–5. – С. 58–59.
9. Шибанов В. Выль егит тулкым // Кенеш. – 2004. – № 11–12. – С. 91–97.
10. Яковлева С. «Улон – со выжыкыл ӧвӧл» // Ӟечбур! – 2008. – 14 февр. – С. 6.
11. Valton A. [Послесловие] // Эн = Ära = Don't = Не / А. Арзамазов. – Tallinn, 2007. – С. 69.