Петр Михайлович Захаров вордӥськиз 1961-тӥ арын 26-тӥ толсуре Татарстанысь Кукмор ёросысь Вуж Кня-Юмья гуртын. Семьяязы сизьым нылпи вал, Петр – бадӟымез. Пӧртэм вакытъёсы тунсыкъяськиз «Битлз» группалэн творчествоеныз, Высоцкийлэн творчествоеныз но совето романтикаен.

Школаез йылпумъямез бере, Петр Захаров Оренбургысь вылӥ зенитной ракетной училищее пырыны турттэ вал. Кык экзамензэ сётыса, документъёссэ басьтӥз но вордскем гуртаз бертӥз, отын тракторист луыса ужаз. Шофёр курсъёсты быдтӥз. Германиын служить кариз. Армия бере Севере, Харп каргуртэ, ужаны кошке. Но отын кема ужаса уг вутты, ӝоген отысь бертэ, кышнояське, улыны интыяське Дэрие (Завьяловое). Ог дас ар пала ужа шофёр луыса [10].

1987-тӥ арын заочно дышетскыны пыре Удмурт кун университетысь филологияя факультетлэн удмурт ёзэтаз. Собере кык арзэ ужа «Ленинец» Дэри ёрос газетын. 1990-тӥ арын Удмуртиысь Писательёслэн огазеяськонзылэн правлениез Петр Захаровез ӧтиз «Инвожо» журналэ проза ёзэтэ редакторе. 1999-тӥ арлэн толсур толэзьысен со – валтӥсь редактор [6]. Петр Захаровлэн ӵектэмезъя журнал бордын со нимын ик издательство усьтӥськиз, табере со котькуд ар куамын пала удмурт но ӟуч книга поттэ.

Пётр Захаров ПЕН-клублэн Удмуртиысь ёзэтэзлэн президентэз луэ.
Озьы ик бадӟым саклык висъя пинал гожъяськисьёсын ужанлы. Со трос аръёс ӵоже пиналъёсын «Шундыкар» лагерьын ужа. Соосты гожъяськыны дышетэ.

«Пётр Захаров школаын дышетскыкуз но, бӧрысьгес но кылбуран сярысь, малпам гинэ ӧвӧл, ӧз ик вӧталля. Школаязы литературно-творческой кружоксы ӧй вал. Удмурт кылъя но литературая урокъёсты нуыны но оскылӥзы я физкультураен, я химиен дышетӥсьёссылы. Соин ик, лэся, Петялэн сюлмысьтыз кырӟась сиез кема кӧлӥз, чалмыт улӥз», – гожтэ Пётр Захаров сярысь тодмо удмурт кылбурчи Владимир Васильевич Романов [8].

Шофёрын ужаз бере, малпаськыны трос дырыз вал, дыр. Руль сьӧрын вераськыны нокинэн, аслад малпанъёсыныд гинэ ке шат кенешод. Озьы пинал адямилэн сюлэмаз вордӥське верано малпан, со радъяське чуръёсы. Школаын удмурт кыллы саклык ӧз висъялэ бере, егит адями нырысь ик кылбураны кутскиз ӟуч кылын. Но собере шӧдӥз: со удмурт сямен малпаське [8].

1986-тӥ арын Пётр Захаров нырысь чуръёссэ «Молот» журналлэн редакцияз вуттӥз. Отын шӧдӥзы егит авторлэсь удмурт кылэз гажамзэ, кылбуръёсаз психологической суред кылдытыны, улонысьтымы туж лэчыт ужпумъёсты ӝутыны тыршемзэ. Соин ик со арын ик кык номерын поттэмын вал Петр Захаровлэн кылбуръёсыз. Собере та авторен лыдӟисьёссэ тодматӥзы «Советской Удмуртия» но «Ленинец» газетъёс. Нырысетӥ кылбуръёсыз пыризы «Инӟарекъян» (1991) но «Одӥг пол гинэ» (1992) огъя бичетъёсы [6].

Университет университетэн, но Петр Захаровлы тужгес но бадӟым школа луиз Владимир Романовен пумиськон. Диплом ужезлэн азькылаз со гожтэ: «Сыӵе узыресь нуналъёс вал со, мынам улонам сомында метаморфозаос ортчизы… Та вакытэ мон весяклы куштӥ ни «баранкаме», тодматски Миша Федотовен, Слава Сергеевен; литература улонысь самой ческыт, самой курыт, самой узыр сурсвузэ губка сямен кыскыны кутски». Университетэз Пётр Захаров йылпумъяз 1998-тӥ арын. Литератураез дышетон со понна огшоры зачёт яке экзамен гинэ ӧй вал. Куамын аресъем студентлы ваньмыз со лыдӟиськонъёс бадӟым литературае сюрес мытон вал ини. Йылпумъясь диплом ужез «Обыда» нимо постмодернизмо пьеса вал [10].

Пётр Захаров удмуртъёс пӧлын котькинлэсь азьло этнофутуризм сярысь лад-лад вераськыны кутскиз. 1994-тӥ арын куартолэзе со Тартуе калыккуспо конференцие ветлӥз. Отысь ӝуась синъёсын вуиз. «Асьмеос ваньмы этнофутуризм амалэн кемалась гожъяськиськомы ни, та сярысь малпаськыса гинэ ӧм вуттэ на», – вераз со эшъёсызлы.

1990-тӥ аръёслэн кутсконазы Пётр Захаровлэн «Эбга» трагедиез пуктэмын Йӧскалык театрлэн сцена вылаз. Собере спектакль возьматэмын вал Финляндиын (отын но вылӥ дунъет басьтӥз) [10]. Нимысьтыз книгаен 2000-тӥ арын потӥз «Эбга» пьеса.

2009-тӥ арын потӥз «Гондыр сюан» яке «Шимес уйвӧт» драмаосын книгаез. Россиысь финн-угор драматургъёслэн «Венок родной земли» (Сыктывкар, 2008) пьесаосын сборниказы пыриз удмурт фольклоръя гожтэм «Как Лопшо Педунь рыжим стал?» пьеса-выжыкылэз. «Выль Кен» пьесаез Удмурт драмтеатрын (2003) пуктэмын вал, «Италмас – душа-девица» выжыкылэз – Сарапулысь драмтеатрын (2005). Петр Захаровлэн пьесаосыз кылбуръёсыз кадь ик пӧртэм «лулчеберет куараослэн», «адями темпераментъёслэн» герӟаськемзы: секыт, «лабиринто» улонзэс улӥсь геройёссы яке «абсурд театрын» шудо, яке тужгес но зэмлыко улонын [5].

Озьы ик Петр Захаров прозаик но. Эссеосыз, новеллаосыз, романысь люкетъёс печатласько «Инвожо» журналын но Удмурт ПЕН-клублэн альманахаз. Со сяна, гожъяськись удмурт кылэ берыктылэ ӟуч, эстон, итальян, япон но мукет кылъёсысь классикъёслэсь но егит писательёслэсь гожъямъёссэс, дасяз «Француз поэзия удмурт кылын» (2008) француз кылбуретлы сӥзем книгаез.

Петр Захаровлэн гожъямъёсыз пыризы «Инӟарекъян» (1991), «Одӥг пол гинэ...» (1992) коллективной бичетъёсы, Юграысь гожъяськисьёслэн «Эринтур» альманахазы (Екатеринбург, 2004, Владимир Емельяновлэн берыктэмез), «Удмурты» (М., 2005, Владимир Емельяновлэн берыктэмез), «Зарни дэремен шунды» (2006) книгаосы. Эстон кылэ берыктэмъёсыз  нош пыртэмын «Азвесь лодка  = Hõbepaat» (Таллинн, 2005), «Neiujakaru» (Тарту, 2005), «Kuumӧӧ» (Таллинн, 2006) книгаосы. «Льӧм ю = Льӧмпуаюок = Ломбоэн’ер = Zelnicemeggyespatakoska = Льӧмпушур = Toomingajȏ gi = Tuomijoki = Tom’jogi» (Сыктывкар, 2008) книгае – эстон, коми, пор, венгер кылъёсы берыктэм ужъёсыз. Со сяна, произведениосыз берыктэмын финн, венгер, карел, англи, француз, литва, словак, датской но мукет кылъёсы.

Петр Захаровлэн куд-ог кылбуръёсыз тодмо эстрада кырӟанъёслы пӧрмизы («Мон кошкисько ӧсме ворсатэк», «Кема витем яратонэ» но мукет), крезьгурзэ гожъязы Геннадий Бекманов, Сергей Красин, Николай Постников, Надежда Уткина но мукет крезьгурчиос.

Сӥё-дано нимъёсыз но пусъёсыз

1995 – Удмурт Элькунысь Министръёслэн Кенешсылэн Данъян грамотазы
1996 – Владимир Романов нимо Премилэн лауреатэз
1999 – Эстониысь «Финно-угрия» Огазеяськонлэн премиезлэн лауреатэз
2000 – Удмурт Элькунысь Кун Кенешлэн Данъян грамотаез

Уже кутэм литература

1. Арзамазов А. Поэзия П. Захарова в пространстве удмуртского этнофутуризма: контуры идиостиля // Феномен визуального в современной удмуртской поэзии : (опыт анализа творчества П. М. Захарова) / А. Арзамазов. – Ижевск, 2010. – С. 14–18.
2. Бусыгина Л. Традиции и новаторство в творчестве [удмуртских] поэтов начала XXI века // Италмас. – 2011. –№ 1. – С. 34–36.
3. Захаров П. Петр Захаров: "Основам драматургии я учился у Пушкина...":[беседа] / записала О. Лукинская // Известия Удмуртской Республики. – 2006. –24 авг. – С. 3.
4. Захаров П. Пегась Пегас : [беседа] / записала З. Рябинина // Удмурт дунне. – 2005. – 28 окт. – С. 6, 11.
5. Петр Захаров // Венок родной земли. – Сыктывкар, 2008. – С. 386.
6. Зверева Т. Петр Захаров (1961) // Писатели и литературоведы Удмуртии. – Ижевск, 2006. – С. 51–52.
7. Зуева-Измайлова А. Архетип Мирового Древа // Инвожо. – 2009. –N 5/6. – С. 20–31.
8. Романов В. «Адямиос выллем уло шуръёс…» // Кенеш. – 1988. – № 12. – С. 33.
9. Федорова Л. Трагедия П. Захарова "Эбга": жанровая специфика // Шестая Российская университетско-академическая научно-практическая конференция. – Ижевск, 2003. – С. 198.
10.  Шибанов В. Йӧспӧртэм кылбурчи // Кенеш. – 2011. – № 1. – С. 77–85.