Владимир Возняков вордӥськиз 1961-тӥ арын 31-тӥ пӧсьтолэзе Пичи Пурга ёросысь Тыло (Сырьезшур) гуртын. Анаез Прасковья Александровна – Семен Самсоновлэн, Удмуртиысь калык писательлэн сузэрез, – колхозын скал кыскиз. Атаез Борис Ильич – сельской хозяйство удысысь сӥё-дано ужась, ветеран труда.

Пичи Пурга ёросысь Бобья-Уча гуртысь тямыс классъем школаез йылпумъяса Можгаысь педучилищее дышетскыны пыриз. Отын дышетскыкуз удмурт кылбурчилэн но прозаиклэн Григорий Даниловлэн литературно-творческой кружокезлэн ужаз мылысь-кыдысь пыриськиз. Училищеын крезьгур грамоталы, баянэн шудыны дышетӥзы, берлогес та быгатонлыкъёс крезьгур гожтыку кулэ луизы. Со сяна, Владимир ачиз дышетскиз арганэн но гитараен шудыны.

1980–1985-тӥ аръёсы Владимир Возняков Удмурт кун университетысь кылосбур факультетын дышетскиз. Студент дыръяз озьы ик литературной кружоке ветлӥз, отын удмурт кылбурчи но литературовед Даниил Яшин кивалтӥсез вал. Занятиосын Михаил Федотов, Владимир Котков, Владимир Алексеев кылбурчиосын тодматскиз. Владимир Возняков тодаз вайе, Владимир Алексеевен ӵош ас гожтэм кырӟанъёсты кырӟазы шуыса. Сиён пӧзьтыку, коридорын, общежитилэн комнатаязы кырӟанъёссы чузъяськизы [1]. Со сяна, студентъёслэн фольклорно-этнографической «Чипчирган» ансамбльлэн ёзчиез вал.

Университетэз быдтыса, Владмир Возняков «Дась лу!» нылпиослы газетлэн редакцияз ужаз, Приморьеын служить кариз. Армиысь бертыса, «Дась лу!» газетэ ик берытскиз, 1992-тӥ арын редакторез луиз. 1993–1997-тӥ аръёсы Удмурт кун университетын финн-угор кылтодосъя кафедраын аспирантураын заочно дышетскиз. 2001-тӥ арысен «Удмурт дунне» газетлэн редакцияз лулчеберет ёзэтэн кивалтӥз.

Владимир Возняков нырысетӥ кылбуръёссэ «Дась лу!» газетын печатлаз, собере мукет элькун газет-журналъёсын печатласькыны кутскиз. Кылбур гожъяку, бордаз крезьгур малпа но ачиз ик, гитараен шудыса, кырӟа. «Лык ми доры, Дон Кихот!» нырысетӥ кылбур но кырӟан бичетэз 1991-тӥ арын потӥз. Отчы 52 нотаен кырӟан пыриз: соос пӧлын нылпиослы сӥземъёсыз но вань, вордскем палъёсты но инкуазез шараясь, но тужгес мур пыӵасьёсыз яратонлы сӥземын («Вераса, оло, ӧй ву», «Сюлэмме шунтэ», «Тон усьтӥд укнодэ» но мукет). Удмурт литературовед Фома Ермаков пусйиз, калык кырӟанъёсын кадь ик, Владимир Возников яратон сярысь кылбуръёсаз ярятонзэ данъя; тросэз кылбур-кырӟанэз, фольклор произведениос кадь ик, ӵошатонъёсын но метафораосын узыр [3].

Кылбурчи вордскем ёрослы зэмос гимнъёс кылдытӥз: «Тон котьку мынам сюлэмам» – Вуж Монья гуртлэн чеберез сярысь; «Шундыед берга, берга» – Баграш-Бигра гурт сярысь; «Пичи Пурга» – Пичи Пурга ёрос центрлы гимн; «Востэм пичи гуртэ» – Тыло гуртлы сӥзем. Владимир Возняков гожъямъёсаз озьы ик вашкала удмурт сказаниосты мукет сямен валэктонлы вазиське («Улонысь выжыкыл», «Древняя сказка» кылбуръёс). Аслаз кылбур-кырӟанъёсыныз Владимир Возняков удмурт кылбурет дуннеез выль буёлъёсын но мотивъёсын узырмытӥз.

Нылпиослы «Кытысь потэ лысву?» (1996) кылбур бичетаз кылбуръёс сяна, «Кытысь потэ лысву?» но «Шундыпи» поэма-выжыкылъёсты пыртӥз, кудъёс калык легендаос но преданиос вылэ пыкиськыса гожтэмын.

Быдэ вуэмъёслы гожтэм кылбуръёсыз «Одӥг пол гинэ» (1992) коллективной сборнике пыризы. Куд-огъёсыз нош «Инӟарекъян» (1991), «Погыли» (1996), «Азвесь лодка» (2005) сборникъёсы.

Со сяна, Владимир Возняков удмурт кылэ ӟуч, пор но англи авторъёслэсь гожъямъёссэс берыктӥз.

Уже кутэм литература

1. Возняков В. Кылъёс куаръёс сямен бергало : [беседа] / записала Л. Тихонова // Удмурт дунне. – 2011. – 5 июля. – С. 6, 11.
2. Возняков В. «Удмуртлык омырен гадь тыр шокан аръёсы» : [беседа] / записал В. Занчаров // Ӟечбур! – 2011. – 4 авг. – С. 6–7.
3. Ермаков Ф. Владимир Возняков // Писатели и литературоведы Удмуртии. – Ижевск, 2006. – С. 33–34.
4. Сюлмы, вера тон : Владимир Возняковлы – 50  // Кенеш. – 2011. – № 7. – С. 104.