Русский | Удмурт

Галина Васильевна Романова вордӥськиз 1950-тӥ арын 22-тӥ гудырикошконэ Ува ёросысь Булай Починка гуртын. Семьяязы вить нылпи вал, Галя – бадӟымез.

Тямыс классэз йылпумъямез бере одӥг арзэ колхозын скал кыскиз, собере каменщике дышетскиз но кык арзэ Ижкарын улон коркаос лэсьтӥз [4]. Ӝыт ужась школаын дасэтӥ классэз быдтӥз, собере 1980-тӥ арын заочно пыриз дышетскыны Удмурт кун университетысь кылосбуръя факультетэ.

1969-тӥ арын Галина Романова «Советской Удмуртия» газетын корректор луыса ужаны кутскиз. 1979–1990-тӥ аръёсы «Молот» журналын тыршиз нырысь технической редактор луыса, собере нош быдэсъяз машинисткалэсь но корректорлэсь ужзэ. 1990-тӥ арысен «Вордскем кыл» но «Инвожо» журналъёс потыны кутскизы. Галина Романова кыказ но редакциосын кыл кутӥсь секретарь луыса ужаз. Со аръёсты тодаз вайыса, вера: «Кытӥяз вормонтэмзэ но возэз кысконо луэ. Туж ёрмон дыре, 1992-тӥ арын, бумагалы ветлон мон вылэ усиз. Кык сюрс иськем ке но – самолётэн. Калининград дорысь Неман городын бумага поттон комбинатын туж умой пумитазы. Одӥг документ понна – сокеме. Бертӥ но бӧрсям ик кык-куинь нунал ортчыса, быдэс вагон (54 тонна) вылӥ ӟечлыко бумага вуиз. Кемалы тырмиз» [11].

1998–2002-тӥ аръёсы со «Инвожо» журналлэн валтӥсь редакторлэн воштӥсез вал, 2003-тӥ арын «Удмурт дунне» газетэ ужаны выжиз, 2007-тӥ арын – «Кенеш» журналэ [4]. Пенсие потыса, кияз ноку крезь кутылымтэ адями, Галина Васильевна аслыз крезь лэсьтытэ но соин шудыны дышетске. «Мынам пель сьӧрам ялан кин ке вера вал кадь: тыныд крезен шудоно, – шуэ Галина Васильевна». Та кышномуртлэн мылкыдыз зэмзэ но вормонтэм, лэся [5].

Галина Романова удмурт журналъёсты вӧлмытыса но лыдӟиськисьёсын творческой пумиськонъёсты радъяса быдэс Удмуртиез котыртыса ветлэ. «Удмурт нылкышно кенешлэн» ёзчиез луыса, национальной движенилэсь ужпумъёссэ валэктэ.

Кылбурчилэн нырысетӥ кылбуръёсыз 1968-тӥ арын «Советской Удмуртия» газетын печатласькизы, собере – вань удмурт газет-журналъёсын, егит кылбурчиослэн «Пыд улын – музъем» бичетазы. Туннэ нуналлы авторлэн вить книгаез потэмын. Нырысетӥ кылбур книгазэ поттӥз 1982-тӥ арын – «Ӵош вамышъялом», кыкетӥзэ 1988-тӥ арын – «Шепасько юос». Нош 1991-тӥ арын лыдӟись кие вуиз веросъёсын, выжыкылъёсын, кырӟанъёсын, кылбуръёсын «Выль кен» книгаез. Тросэз кылбуръёсыз потэмын ӟуч кылын «Мир женской души» книгаын, эстон кылын – «Ньыль тылскем» бичетын. Озьы ик куд-огъёсыз берыктэмын бигер, коми, чуваш, калмык но мукет кылъёсы [8]. Ог витьтон пала кылбуръёсыз кырӟан луизы.

Галина Романова нылкышно кылбуретлэсь пӧртэмлыкъёссэ ас сяменыз азинтэ. Со ӵемысь курыт шӧмо яратонэз суреда. Та поэтессалэн лирической героиняез яратонлэсь вуэмзэ лулысь-сюлмысь возьма. Кылсуред тупатон но радъян манерезъя яратонлы сӥзем кылбуръёсыз калык кырӟанъёслы матын луо. Поэтессалэн чуръёсаз чеберлык пала кыстӥськон, чеберлыкез кылдытыны-вордыны тыршон мылкыдъёс юн шӧдӥсько [3].

Галина Романова ассэ возьматӥз проза но драматургия удысын но, 2000-тӥ арын «Ӝужыт-ӝужыт гурезе» аспӧртэмлыко автобиографической повестен книга поттӥз. Та тодэ ваёнъёслы сӥзем произведение. Повестьысь веросъёс шуныт но ӝожмыт мылкыдоесь. Веросъёс сӥземын улонысь вазь кошкем анаезлы; котьку шуг-секытъёс кылдыку, толэзь сямен сюрессэ югдытӥсь атаезлы; Волгоград палъёсысь вуэм пинал дыр эшезлы; школаын дышетскись пинал нылашлэн нырысетӥ яратонэзлы. Со юрттэ (тужгес но егит калыклы) азьвылзэ, ортчемзэ син азязы ӟечгес пуктыны. Галина Романовалэн та книгаез нылкышнолэн секыт адӟонэз сярысь маде [2].

Гожъяськисьлэн «Сьӧд ты но Улэп турын» выжыкыл-пьесаезъя пуктэмын крезьгуро радиоспектакль (1987), нош «Шунды-Мумы» легенда-пьесаезъя – Удмурт Йӧскалык театрын спектакль (2003), «Калмезъёс но Ваткаос» водевилез, «Уӵы чирдэм зэм меда но…», «Ватос» трагикомедиосыз «Кенеш» журналын но «Удмурт дунне» газетын печатламын [9]. 

«Шунды-Мумы» спектакль сярысь Милитина Гаврилова-Решитьколэн, Василий Ванюшевлэн гожъямъёссы, критической статьяоссы потӥзы удмурт газет-журналын. Соос верало Галина Романовалэсь удмурт йылолъёсты тодэмез но соосты пьесаяз кутыны быгатэмез сярысь. Авторлэн пьесаяз огазеяськон сярысь малпан шарак чузъяське… Пьеса, выжыкыл кадь, шудо йылпумъяське. Спектакльын валтӥсь малпан воштӥськемынгес… Таяз вариантын валтӥсь веран – ас калыктэ котькыӵе вакытаз яратоно [1].

2006-тӥ арын Галина Романовалэн потӥз «Лобась валъёс» нылпиослы книга. Веросъёсаз, выжыкылъёсаз автор возьматэ ӟечезлэн но уродлэн, зэмлыклэн но пӧяськонлэн, чеберлыклэн но шӧтэмлыклэн ваче пумит луэмзэс. Гожъямъёсыз пыртэмын «Вуюись» (1990), «Котырысь улон но мон» (2003), «Зарни дэремен шунды» (2006) пичиослы хрестоматиосы но внеклассной лыдӟон книгаосы. Со сяна, произведениоссэ пыртӥзы «Пыд улын музъем» (1977), «Горизонт» (1982, 1984), «Голубые дали» (Саранск, 1990), «Мир женской души» (1992), Галина Кустенколэн  «Судьбу окликая» (Киров, 2004), «Удмурты» (М., 2005), «На переломе эпох» (2006) но мукет бичетъёсы.

Галина Романова мукет удмурт писательёслэсь произведениоссэс калык доры вуттон сярысь но сюлмаське. Со люкаса но дасяса поттӥз тямыс книга: удмурт веросъёсын «Выль дунне» (1989, 1991) но «Быльырам синкылиос» (1997) антологиосты; Роман Валишинлэн веросъёсыныз, юморескаосыныз, критической ужъёсыныз но дневникеныз «Тодметъёс» (1989) но ӟуч кылын веросъёсыныз «Незамёрзшие цветы» (2004) книгоассэ; улонысь вазь кошкем гожъяськисьлэн Борис Вахрушевлэн веросъёсыныз «Шокчиз кысэм кӧрык» (1989) книгазэ; серемес веросъёсын «Чипы лым» (1993) книгаез; сценкаосын, сценарийёсын «Катанчи усьтӥське» (2001) бичетэз [4].

Сӥё-дано нимъёсыз но пусъёсыз

1986 – Удмурт АССР-ысь Вылӥ Кенешлэн Президиумезлэн Данъян грамотаез
1995 – Удмурт Элькунысь лулчеберет удысысь сӥё-дано ужась
1996 – Ашальчи Оки нимо Йӧскалык премия (Удмуртия)
2006 – Россиысь лулчеберет удысысь сӥё-дано ужась, Эрик Батуев нимо премия (Удмуртия)

Уже кутэм литература

  1. Ванюшев В. «Шунды-Мумы»: ыштонъёс но шедьтонёс : спектакль пумысен куд-ог малпанъёс // Кенеш. – 2005. – № 4. – С.98–100.
  2. Зайцева Т. Мир и человек в мемуарно-биографических жанрах // Удмуртская проза второй половины XX – начала XXI века: национальный мир и человек / Т. Зайцева. – Ижевск, 2009. – С. 222–248.
  3. Зуева А. Тунаськон-веднаськон йылолъёс – нылкышно кылбуръёсын // Кенеш. – 2001. – № 3. – С. 53–58.
  4. Пантелеева В. Г. Галина Романова (1950) : улон но ужан сюресэз // Удмурт литература : 10-11-тӥ классъёслы учебник / С. Т. Арекеева [и др.]. – Ижевск, 2008. – С. 368-377.
  5. Панфилова Е. Кин пасяз Романовалэсь чиньыоссэ? // Удмурт дунне. – 2008. – 21 март. – С. 5.
  6. Романова Г. Галина Васильевна Романова : [беседа] / записала З. Рябинина // Удмурт кизилиос. – Ижевск, 2007. – С. 218–219.
  7. Романова Галина Васильевна // Удмуртская Республика. – Ижевск, 2000. – С. 599.
  8. Фёдорова Л. Галина Романова (1950) // Удмурт нылкышно кылбуретлэн тулкымъёсыз / Л. Фёдорова. – Ижевск, 2007. – С. 214–216.
  9. Хайдаров Р. Галина Романова (1950) // Писатели и литературоведы Удмуртии. – Ижевск, 2006. – С. 101–102.
  10. Христолюбова Л. Романова Галина Васильевна (22.08.1950) // Удмуртские женщины, XX век / Л. Христолюбова. – Ижевск, 2002. – С.319–320.
  11. Чернова Т. «Шӧтэм ӵӧжпи» // Удмурт дунне. – 2000. – 5 сент.
  12. Шибанов В. Паймымон нылкышно дунне // Neli udmurditari = Ньыль тылскем. – Таллин, 2002. – С. 12–19.