Генрих Ксенофонтович Перевощиков вордськиз 1937-тӥ арын 14-тӥ куарусёнэ Игра ёросысь Пирнэзь (Верх-Нязь) гуртын [1].

Чутырь черкогуртысь сӥзьым классъем школаез йылпумъяса, Ижкарысь индустриальной техникуме пырыны малпаз. Пияш ньыль арескын атайтэк кылиз. Сое ожмаськыны Ленинградэ нуизы вал, 1941-тӥ арын 1-тӥ ноябре сое гуртэ машинаен вайса кельтӥзы, улэп но, ӧвӧлгес но – сыӵеен вуттӥзы. Оже трос пыриськыса вуттымтэ, немецъёс бомба куяку, бадӟым секыт из тыбыраз усем. Кема ӧз ул ни, бертэмез берегес ик кулӥз [3]. Нош анаез пизэ кыдёке келяны пумит луиз, шуиз: «Уть ай, дӥсед но, пыдкутчанэд но городэ мыноно кадь ӧвӧл. Сиён ласянь но шугомод. Мынод ке, ас гуртмылы матэгес мын, пие. Татын картошкамы, мукет бакча сиёнъёсмы вань. Шуге-леке вуид ке, пыдын но кызьы ке бертылэмед, салазкиен но нуллэмед луоз». Озьы тӥни Геня (гуртоосыз сое озьы шуо вал) Якшур-Бодья педучилищее дышетскыны пыриз. Та дырозь кутэн ветлэм мурт, татчы анаезлэн ӝужыт кунчиё ныл дыр катаеныз мынӥз. Собере Якшур-Бодья педучилищеез ворсазы, дышетскисьёсты Дэбес педучилищее выжтӥзы, сое Генрих Перевощиков 1954-тӥ арын йылпумъяз. Со аре ик Удмурт пединститутлэн история но филология ёзэтаз дышетскыны пыриз, отысь литературной кружоке ветлӥз. Эшъёсыз сямен ик, гожъяськыны кутскиз, куд-ог веросъёссэ «Молот» журналын но печатлазы. Анаез улэп ӧй вал ни бере, дышетскыкуз ик ужаны интыяськиз: Удмурт радиоын солы кылысь кылэ берыкъян удысэз оскизы.

1960-тӥ арын пединститутэз йылпумъямез бере, Генрих Перевощиков Удмурт радиоын ужаз 1976-тӥ арозь, егитъёслы передачаосты дасянъя ёзэтын тыршиз. Солэн тросэз ужъёсыз Москваысь «Юность» радиостанцилэн тулкымъёсаз но чузъяськылӥзы, нош куд-ог гожтосъёсыз нимаз книгаосын но потылӥзы: «Омырын — Меркушев» (Ю. Кедровен ӵош гожтэм документальной повесть), «Кыдазы егитъёс» но «Куашетӥз сильтӧл» очеркъёсын бичетъёс. Та сузьетъёсыз понна писатель Удмуртиысь комсомоллэн премиеныз пусъемын [2].

Та аръёс ӵоже радиожурналистын ужатозяз Генрих Перевощиков вордскем шаерзэ, оло, ас гуртсэ кадь ик ӟеч тодыны вуиз. Зэмос улонысь сузен-кобыен кадь омыръям материалъёсыз, командировкаын дыръяз адӟылэмъёсыз, кылэмъёсыз сярысь ачиз но зэмос артист сямен мадьылӥз. Армиысь самодеятельностьын со зэмзэ ик артист вал [4]. 1976–1978-тӥ аръёсы Удмуртиысь Писательёслэн огазеяськоназы чеберлыко литератураез чаклась-эскерись но вал [1]. Генрих Перевощиковез отчы дэмлаз Флор Васильев. Со вакытэ Ф. Васильев вал Удмуртиысь писательёслэн тӧрозы но «Молот» журналлэн валтӥсь редакторез [4]. 1978–1981-тӥ аръёсы Генрих Перевощиков Удмуртиысь Писательёслэн огазеяськоназы тӧроез вал. 1981-тӥ арын быдэсак гожъяськон уже выжиз [1]. 1992-тӥ арысен «Кенеш» журналын ужа, проза удысэн кивалтэ.

Удмурт писательёс пӧлысь Генрих Перевощиков нырысьсэ кылдытӥз тетралогия, со потэмын «Йыбыртты музъемлы» нимын но со понна гожъяськись 1987-тӥ арын Удмурт шаерлэн Кун премиеныз пусъемын.
Удмурт прозаиклэсь творчествозэ кунгож сьӧрын но тодо. 2005-тӥ арын Генрих Перевощиковлы асьме писательёс пӧлысь нырысезлы «Узы сяськаян вакытэ» повестез понна Финляндиысь М. А. Кастрен огазеяськонлэн нырысетӥ премиез сётэмын.

Генрих Перевощиков — туала удмурт литератураысь одӥгез валтӥсь прозаик. Ас мытэм удыссэ со ӝыны даур пала ини «гыре» [2].

Писательлэсь быдэс творческой сюрессэ чакласа, гожъяськон манерезлэсь куд-ог воштӥськонъёссэ шӧдыса, тодосчи но критик В. Л. Шибанов гожтэ: «Син шоры тани ма йӧтэ: быдӟалазыя соос (произведениос) пумен пичиесьгес, вакчиесьгес луо. Со воштӥськонэз тазьы возьматыны луэ: «тетралогиысен — роман пыр — повесте». Со вакытэ ик эскероно ужпумъёс ялан лэчытгес но лэчытгес сэрттӥсько». Генрих Перевощиковлэсь чеберлыко дуннезэ нырысьсэ пыр-поч эскериз П. К. Поздеев. Со шуэ: «Генрих Перевощиков вань удмурт прозаикъёс пӧлысь тани маин но висъяське: улытозяз со одӥг кылбур но гожтымтэ; нырысь книгаез ик — «Тӧдьы гырлы» — нылпиослы веросъёсын повесть жанрен дасямын вал ини; «Йыбыртты музъемлы» тетралогиезлэн нырысетӥ книгаез 1977-тӥ арын печатласькем дырысен дугдылытэк ужа ас вакытысьтыз лэчыт ужпумъёсты эскерон, сэрттон-пертчон бордын...» [4].

Кыкез ик тодосчиос прозаиклэн лэчыт ужпумъёсты ӝутэмезлы саклык висъяло. Тани «Йыбыртты музъемлы» тетралогизэ («Йыбыртты музъемлы», 1977, «Югдонын» ӟардэ», 1980, «Тулкымлы пумит», 1981, «Нуназе азьын», 1986) ас вакытаз тодосчиос-дунъясьёс гуртысь ужпумъёс сярысь произведениос радэ пуктӥзы, литератураысь производственной ӧре пыртӥзы вал. Та ласянь ик ньыль романъёслэсь пуштроссэс но, сюжет гердъёссэс но, валтӥсь геройёслэсь образъёссэс но дунъязы-эскеризы. Нош дыр ортчемъя тетралогилэн ватэм пуштросэз но адӟиськыны ӧдъяз, конфликтэз но мукет сяменгес усьтӥськиз, кылдытэм характеръёс шоры учконъёс но воштӥськыны кутскизы.

Виктор Шибанов со пумысен гожтэ: «Кӧня ке дыр ортчыса, Г. Перевощиковлэсь тетралогизэ ХХ-тӥ даурлэн шорысьтыз удмурт улонлэсь энциклопедизэ сямен эскерыны кутскозы. Мукет сямен вераса, вакытлэсь тодметъёссэ валан понна, оло, история учебникъёс но. Прозаик умой возьматӥз, мар со командно-административной система но тоталитаризм [5].

Генрих Перевощиковлэсь гожъяськон манерзэ ӵемысь публицистлэн ужан амалъёсыныз ӵошато. Прозаик историын азьвыл ортчем ужпумъёс сярысь уг гожъя, со али, асьме вакытысь ужпум-югдуръёсты валаны тырше. Писательлэн котькуд гожтосаз мур гражданской позициез адӟиське. Со герӟаськемын туала вакытэ адямилыкез утён сярысь сюлмаськонэн. Солэн произведениосыз лыдӟисез мур малпаськонэ вутто, аслыксэ валаны, адямилыко луыны, улон шоры сайкыт но ӟырдыт учконзэ кыдатыны юртто. Та валатонъёсты сэрттыны-пертчыны тыршон, соослы дунъет сётон «Йӧвалег» роман-дилогиын но (1984, 1989) умой адзиськиз [2].

Удмурт прозаиклэн мукетыз ужез – «Ыш-ыш-ыш!» повесть – «Горбачёв вакытысь» «Ельцин вакытэ» выжытӥз, улонын бадӟым воштӥськонъёс ортчизы. «Ыш-ыш-ыш!» бере сокугес ик «Ӧб-ӧб-ӧб!» но «Эх-ма-а!» потӥзы, огазьын соос «Сюлэмтэм дунне» трилогия кылдытӥзы. Син шоры йӧтэ: куинезлэн ик повестьёслэн нимзы междометиоc пыр сётэмын, озьы автор туала дыре кылдэм югдурлы ас дунъетсэ вера. Огломак учконо ке, «Сюлэмтэм дуннелэн» тужгес бадӟым аспӧртэмлыкез со бордын: Генрих Перевощиков валэктыны тырше, малы туала город удмуртъёсты мурт каре. Асьмеос туала городэ интыяськыны ӧм быгатэ ке, ӵуказе нуналмы понна нюръяськыны, бадӟым вожвылъяськонын (конкуренциын) вормыны ум быгатэ ук. Но урбанизацилэн мукет кышкытлыкез но вань – со удмуртлыкмес быдтыны быгатоз [5].

Генрих Перевощиковлэн азьло произведениосаз сямен ик, «Шелеп» («Кенеш», 2000) повестяз но азьпал радэ потэ «чылкыт сюлэмо адями – шимес дунне» конфликт.

Писатель «Узы сяськаян вакытэ» повестяз но чылкак мукет ӧре ӧз кожы. Книгаысь книгае, одӥг югдурысь мукет югдуре со азьвыл ӝутэм ужпумъёссэ азинтэ [5].

Сӥё-дано нимъёсыз но пусъёсыз

1968 – Удмурт Комсомоллэн премиез
1987 – Удмурт Элькунысь Кун премиез
1994 – Удмурт Элькунысь калык писатель
1998 – Россиысь лулчеберет удысысь сӥё-дано ужась
2005 – Финляндиысь М. А. Кастрен нимо Огазеяськонлэн валтӥсь литературной премиезлэн лауреатэз
2006 – Эшъяськон орден

Уже кутэм литература

1. Ермаков Ф. Генрих Перевощиков (1937) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 90–91.
2. Пантелеева В. Генрих Перевощиков (1937) // Удмурт литература : 10–11-тӥ классъёслы учебник / С. Т. Арекеева [и др.]. – Ижевск, 2008. – С. 300-309.
3. Перевощиков Г. Генрих Ксенофонтович Перевощиков / записала Лия Малых // Удмурт кизилиос : очерки, зарисовки, интервью (2001-2007). – Ижевск, 2007. – С. 120–121.
4. Поздеев П. Сюлэмшуго дунне : Генрих Перевощиковлы – 60 // Кенеш. – 1997. – № 9. – С. 22–25.
5. Шибанов В. Капчи-а адямилыкез утьыны? : Генрих Перевощиковлы – 70 // Кенеш. - 2007. – № 8. – С. 77–87.