Елена Васильевна Панфилова (Миннигараева) вордӥськиз 1976-тӥ арын 25-тӥ гудырикошконэ Пичи Пурга черкогуртын. Куинь нылпиё семьяын будӥз, ачиз Елена соос пӧлысь бадӟымез. Пинал дырыз Пичи Пурга ёросысь ик Сосновка гуртын ортчиз.

1991-тӥ арын Ильинск шор ёзо школаез йылпумъяса, Елена пыре дышетскыны Можга педучилищее. Татысен ик ини со оломаин но тунсыкъяське, нош тужгес но – удмурт литератураен, шаертодонэн, удмуртлыкез утёнэн, пыриське общественной уже, кивалтэ студентъёслэн «Удмурт кенеш» огазеяськонэнызы [5]. 1994-тӥ арын удмуртъёслэн съездазы Елена делегатъёс пӧлысь самой егитэз вал.

1995-тӥ арын училищеез горд дипломен йылпумъяса, нылаш Удмурт кун университетысь кылосбуръя факультетэ пыре. Студентъёслэн калыккуспо научно-практической конференциосазы мылысь-кыдысь пыриськылэ. Кылбурет удысын эскеронъёсыз «Кенеш» журналын печатласькыны кутско, со сяна пыро «История и культура финно-угорских народов» бичетэ (1998).

2000-тӥ арын университетэз вылӥ дунъетъёсын йылпумъям бере, «Удмурт дунне» газетлэн политика но экономика ёзэтаз ужаны кутске. Ужезъя ӵем гинэ кунгож сьӧрысь но Россиысь финн-угор калыкъёс доры вуылэ. Трос гожъя соослэн улонзы, культуразы сярысь. «Удмурт дунне» газетын усьтэ «Тангыра» финн-угор люкет, берлогес – асьме удмурт шаерын улӥсь калыкъёслы сӥзем «Тугоко» люкет [7].

2010-тӥ арын Елена Васильевна валтӥсь редакторлэн воштӥсез луиз. Озьы ик со Россиысь финн-угор газетлэн координаторез, парламентской журналист луэ. Сыӵе ик мыло-кыдо пыриське общественной уже. Со «Удмурт кенеш» огазеяськонлэн исполкомаз пыре, удмурт культурая «Дэмен» обществолэн но «Удмурт нылкышно кенеш» огазеяськонлэн ёзчизы луэ [2].

Елена Панфилова кылбур, такмакъёс, маскари, эшлыко маскари, веросъёс, повестьёс, юморескаос, зарисовкаос, выжыкылъёс, эссе, новеллаос гожъя. Кыкетӥ классысен эшъёсызлы лэсьтылэм аслаз гожтэм веросъёсын, выжыкылъёсын, суредъёсын пичи книгаосты. Нырысетӥ заметказэ печатлазы «Дась лу!» газетын, куке Елена ньылетӥ классын дышетске вал. Ёросысь «Пурга гуръёс» литературно-творческой огазеяськонэ ветлӥз. Нырысетӥос пӧлысь одӥгез произведениез со нимын ик потэм сборнике пыриз. Огазеяськонлэн кылдытӥсез, гожъяськись Никвлад Самсонов сое дышетскисьёс пӧлысь одӥгез умоеныз лыдъяз.

Елена Панфилова ас куаразэ утчаны кутскиз огдыре ик прозаын но, литературоведениын но, кылбурет удысын но… Литература сюрес вылэ султӥсь муртэз эскерисьёс нырысь ик учко, шӧдӥське-а солэн аслаз куараез. Елена Панфиловалэн ке – со юн шӧдӥськиз ини «Мумы» повестяз, лирикаяз но [7].

Елена Панфилова пичи гинэ повестезлы туж узыр, туж аспӧртэмлыко мадён ӧр шедьтэм, со тулкымъёс выллем радъяське. Мадись мурт (повествователь) огвакытэ ик лыдӟисеныз но, асэныз но кенеше-эчеше [9].

2010-тӥ арын «Мон – улӥсько!» кылбур бичетэз потӥз. Книгалэн аспӧртэмлыкез – пӧртэм валатонъёсты ваче пумит пуктон. Тросаз кылбуръёсаз улон тӧдьы но сьӧд буёлъёсын, сьӧлыкоен возьматэмын. Соин, дыр, мылкыдлэн воштӥськемез ӵемгес антитеза амалэн сётэмын. Трос малпаськонъёс, трос юанъёс, соослы валэктон утчан [4]. Елена Панфиловалэн кылбуръёсызлэн тематиказы – адями, улон, дыр, яратон но шуд. Ӝуась, эрикез яратӥсь, чидантэмесь кылбуръёсыз буйгато, улонлэсь возьмамтэ палъёссэ усьто [3]. ««Мон – улӥсько!» книгалэн нимыз но – лул тыр кеськем куара. Отчы пыӵамын улонлы, вордскемлы шумпотон но, ас котырдэ мылкыдыдъя воштыны тыршон но, зэмос улон понна нюръяськон но. Со озьы ик – гадь тыр шокаса яратыны быгатон, вордэм нылпиедлы шуд сётыны тыршон» [7].

Елена Панфилова – егит кылбурась. Сое сюлмаськыто улонысь астэ утчан, улонмылэн кытчы мынэмез но солэн секытэз сярысь малпаськон. «Вакытлэн нылыз» шуэ ке но ассэ лирической героиня, малы ке но солы та вакытын капчи ӧвӧл: «Уг чидаськы сылыны, пилиське лулы-сюлмы». Кызьы ке улонмы огыр-бугыр, озьы ик солэн но пушказ маиз ке но бугыръяське, ог-огзылы пумит луись макеосын шӧдылэ («Мон» кылбур) [4].

Елена Панфиловалэн гожъямъёсыз печатласько «Кенеш», «Инвожо», «Ашальчи»  элькунысь журналъёсын но «Удмурт дунне» газетын. «Азвесь лодка = Hõbepaat» (2005) нимо удмурт поэзилэн альманахаз эстон кылэ берыктэм кылбуръёсыз пыртэмын.

Сӥё-дано нимъёсыз но пусъесыз

1998 – Удмурт Элькунысь егитъёслэн ужъёссыя Кун комитетлэн Данъян грамотаез
2002 – Финляндиысь М. А. Кастрен нимо Огазеяськонлэн премиезлэн лауреатэз, журналистъёслэн «Удмуртия многонациональная» ӵошатсконзылэн I премизы
2003 – Удмурт Элькунысь Йӧскалык политикая Министерстволэн Данъян грамотаез
2007 – Удмурт Элькунысь лулчеберетъя, печатья но иворъёсъя Министерстволэн Данъян грамотаез
2009 – Финляндиысь М. А. Кастрен нимо Огазеяськонлэн журналист премиез
2010 – Удмурт Элькунысь Кун Кенешлэн Тау карон гожтэтэз, Удмурт Элькун Кивалтэтлэн Данъян грамотаез
2011 – «Этносфера» (Москва) журналэн ортчытэм конкурсын «За лучшее освещение этнической тематики» номанациын вормисез

Уже кутэм литература

1. Ванюшев В. Улыны кулэ! // Кенеш. – 2011. – № 7. – С. 94–97.
2. Москвина О. Пужымъёс пӧлысь Ленӥ но Вукогуртысь Лӧпшо Педор // Ӟечбур! – 2010. – 5 авг. – С. 5–6.
3. Панфилова Е. Мон – улӥсько! – Ижкар, 2010. – 83 с. – Примеч.: Текст переведен из аннотации.
4. Пискунова М. Нылкышно кылбурасьёс // Выль даур. – Можга, 2003. – 12 апр., 7, 21 июня.
5. Хайдаров Р. Елена Панфилова (Миннигараева) (1976) // Писатели и литературоведы Удмуртии. – Ижевск, 2006. – С. 168.
6. Ходырев Г. Аслаз шӧдонэз вань // Советской Удмуртия. – 1990. – 23 янв.
7. Чернова Т. «Лул куара, эн ни бӧрд...» // Удмурт дунне. – 2010. – 25 авг. – С. 5.
8. Шайсултанова Л. Формы повествования в повести Е. Миннигараевой (Панфиловой) «Мумы» // Г. Д. Красильников и тенденции развития прозаических жанров в национальных литературах Урало-Поволжья. – Ижевск, 2005. – С. 70–73.
9. Шайсултанова Л. Мадён ӧрлэн тулкымъёсыз : Елена Миннигараевалэн (Панфиловалэн) «Мумы» повестез пумысь малпанъёс // Кенеш. – 2006. - № 8. – С. 104-106.