Римма Серафимовна Игнатьева (Лаптева) вордӥськиз 1955-тӥ арын 27-тӥ гудырикошконэ Кез ёросысь Нюрошур гуртын. Римма семьяяз бадӟымез нылпи, со сяна куинь выныз но сузэрез вань на.

Тямысэтӥ классозь Римма Ю-Тольён удмурт школаын дышетскиз, нош йылпумъяз вӧзысь Выльгуртысь ӟуч школаез. Собере 1972-тӥ арын нылаш Удмурт кун университетлэн кылосбуръя факультетэ пыриз, 1977-тӥ арын диплом басьтӥз. Татын со ог вакытэ дышетскиз тодмо авторъёсын но тодосчиосын – Галина Шушаковаен, Тамара Пантелееваен, Владимир Алашеевен, Сергей Жилинэн но мукетъёсыныз.

1977-тӥ арын университетэз йылпумъяса, Римма Игнатьева куинь ар ӵоже удмурт кылэз но литератураез дышетӥз Дэри ёросысь Шаберды школаын. Кӧня ке дыр ортчыса дышетӥсь ужзэ куштӥз, малы ке шуоно кемалы больницае сюриз. Кыкетӥ инвалид группа сётӥзы. Озьы ке но, анаезлы, Зинаида Александровналы вынъёссэ пыд йылазы ӝутыны юрттоно луиз. 1984–1986-тӥ аръёсы Удмурт Элькунысь дышетӥсьёсты будэтон институтлэн ӧтемезъя, Римма Игнатьева удмурт школаослы учебникъёсты но учебно-методической литератураез дасямъя методист луыса ужаз [1].

1986-тӥ арысен берыктӥсь луыса тыршиз «Советской Удмуртия» газетлэн редакцияз. Кӧня ке дыр ортчыса солы «Семья» нимо полосаез нуыны сётӥзы. Нравственно-этнической но мерлыко ужпумъёс сярысь статьяос гожъяз («Дуно-а усёз сюлмаськон?», «Кин выжые мынӥз меда», «Кызьы улӥськоды егит кузпалъёс?» но мукет), авторлэн ӝутэм ужпумъёс сярысь зэмос  сюлмаськемез лыдӟиськисьёсты бордаз кыскиз.

1994–2003-тӥ аръёсы Римма Игнатьева «Инвожо» журналын публицистика ёзэтэн кивалтӥз. 2003-тӥ арысен профессиональной творческой ужен выре. Дыр ортчемъя Римма Игнатьевалэн ручкаез чиньыосызлэсь кылзӥськемысь дугдӥз. Таӵеезлы со дась ни вал, соин соку ик кылзӥськисьтэм ёзвиосаз карандаш кырмыса, соин печатланы кутскем. Литератураын но улонын нырысетӥ юрттӥсез – кузпалыз, тодмо удмурт критик, прозаик, Удмурт Элькунысь сӥё-дано журналист Александр Лаптев [1].

Римма Игнатьева одӥг кадь быгатыса нылпиослы но, мӧйыослы но трос гожъя. Озьы ке но потэм книгаосыныз ушъяськыны уг быгаты. «Инвожо» журналын ужакуз солы гожъяськыны бадӟым сюрес усьтӥськиз. Со аръёсы ик «Кенеш», «Инвожо», «Луч» журналъёсын, «Удмурт дунне» газетын огез бӧрсьы мукетыз повестьёсыз печатласькизы: «Беромем яратон» (Кенеш, 2000), «Бубыли» (Инвожо, 2001), «Сьӧлыклэн емышез» (Кенеш, 2002), «Чилекъян-ворекъян» (Удмурт дунне, 2002), «Кион котьку сютэм» (Удмурт дунне, 2005), «Анай-атайёслэн нуналзы – среда» («Быльырам синкыли» веросъёсын дэмен бичет, 1997). Произведениосыз газет-журналъёсын гинэ печатласькемен, Римма Игнатьевалэсь творчествозэ та изданиосты басьтӥсьёсгес тодо, нош со туала удмурт литератураез азинтӥсьёс пӧлысь тужгес пайдалыко ужасез луэ. Нырысетӥ книгаез лыдӟись доры вуиз 1995-тӥ арын гинэ, со нылпиослы веросъёсын «Ческыт зыно сяськаос» бичетэз вал. Мӧйыослы гожъямъёсыз — веросъёсыз, повестьёсыз, «Игнаш сайкемын» романэз — татчыозь газет-журналъёсын гинэ потӥзы вал. Но 2010-тӥ арын Римма Игнатьева «Инвожо» журнал пыр ас коньдонэныз поттӥз «Сьӧлыклэн емышез» повестьсэ удмурт но ӟуч кылъёсын. Ӟуч кылэ ачиз ик берыктӥз. Нош печатлан понна коньдон сотэк но пичи пенсиысьтыз шыръяз. 2011-тӥ арын кык книгаез потӥзы: «Кион котьку сютэм = Сколько волка ни корми» удмурт но ӟуч кылъёсын повесть но «Оксилэн сюлмаськонъёсыз» семьяен лыдӟыны веросъёсын повесть [5].

2005-тӥ арын тулыс Удмурт кун университетысь удмурт литературая кафедраын ужасьёс быдэсак одӥг кенешонзэс Римма Игнатьевалэн творчествоезлы сӥзизы но ужъёсызлы вылӥ дунъет сётӥзы [5].

Римма Игнатьевалэн рос-прос, быгатыса гожъяськыны тыршемез син шоры йӧтэ. «Ческыт зыно сяськаос» бичетэ огазеям нылпи веросъёсыз лыдӟисьёслы ӟеч мылкыд кельто. Автор нылпилэсь пуш дуннезэ шӧдыса-тодыса гожъям. Бичетэ покчи дышетскисьёслы сӥзем дас веросъёсыз люкамын. Бадӟымесь ӧвӧл соос, пичиослы лыдӟымон гинэ. Котькудӥз верос пичи муртлэн улонысьтыз кыӵе ке учыр яке кӧня ке учыръёс вылын пӧрамын: пиналлэсь эшъёсыныз но мӧйыосын кусыпъёссэ возьматэ. Котькудаз автор мӧйыослы но вазиське: малы меда асьмеос нылпиослэсь чебер но аспӧртэмлыко дуннезэс куддыръя ум валаське яке валаны но ум тыршиське, соин сэрен пинал сюлэмез вӧсь кариськом, ултӥяськом. Озьы тӥни веросчи произведениосыныз покчи нылпиосты но, соосты будэтыны сюлмаськись мӧйыосты но визьма, индылэ [7].

Нылпиослы гожъясьёс пӧлысь Римма Игнатьеваез висъя критик, литературовед Татьяна Зайцева но. Римма Игнатьева нылпи веросъёсаз ӝожез сярысь гинэ уг вера, со туж быгатыса яркытсэ пурысен, шулдырзэ мӧзмытэн, серекъянозэ бӧрдоноеныз пӧлэстэ. Та мадёсчи нылпи литератураын кылдэм огвыллемгес аресо нылпиос сярысь гожъян манерлэсь инвисъёссэ паськытатэ, веросъёсаз пӧртэм аресо геройёсты пыртэ. Иське, лыдӟись нылпиос но аресъёссыя пӧртэмгес луыны кутскизы [3].

Римма Игнатьева мӧйыос понна но гожъя. Веросъёсыз, новеллаосыз, юморескаосыз, повестьёсыз, притчаосыз печатласько «Кенеш», «Инвожо», «Луч», «Удмурт дунне» газет-журналъёсын. Веросъёсыз пыризы «Быльырам синкыли» (1997) коллективной сборнике. Гожъяськись кык повестьёсын бичет поттӥз: «Сьӧлыклэн емышез» = «Плод греха» (2010) но «Кион котьку сютэм» = «Сколько волка ни корми» (2011), ӟуч кылэ ачиз ик берыктӥз. «Кион кутьку сютэм» повесть удмурт нылкышно литератураын нырысетӥ детектив луэ [8].

Ӵемысь гожъямъёсызлэн героез луэ шудтэм, ӵем дыръя трагичной адӟонэн туала нылкышно. Озьы ке но, Римма Игнатьевалэн гожъямъёсыз лыдӟисьлэн лулпушказ чылкыт мылкыд кельто, малы ке шуоно нылкышно геройёсыз йыгмыт характерен.

2004–2008-тӥ аръёсы «Кенеш» журналын печатласькиз «Игнаш сайкемын» романэз – Нюрошур вордскем гуртэз сярысь художественно-исторической мадёс. Критик но литературовед Любовь Федорова пусъе, та удмурт литератураын нырысетӥ нылкышно роман луэ шуыса [9].

Лыдӟисьёс Римма Серафимовнаез ӟуч кылысь берыктэмъёсызъя но ӟеч тодо. Сыӵе ужъёсыз пӧлысь тужгес бадӟымез но син шоры йӧтымонэз — Александр Пушкинлэсь «Барышня-крестьянка» повестьсэ берыктэмез. «Узыр нылмурт-крестьянка» нимын со «Инвожо» журналын дано ӟуч писательлэн вордӥськемез дырысеь 200 ар тырмон азяз печатламын вал.

Аслаз но авторлэн веросъёсыз но повестьёсыз мукет кылъёсы берыктылэмын: ӟуче сяна, мордва но чуваш кылъёсы. Со гинэ ӧвӧл, Римма Игнатьева Чувашиысь Алексей Талвир нимо литература премилэн лауреатэз но луэ [7].

Сӥё-дано нимъёсыз но пусъёсыз

1992 – Удмурт Элькунысь журналистъёслэн Огазеяськонзылэн Данъян грамотаез
1995 – Алексей Талвир нимо Литературной премия (Чувашия)
2000 – Удмурт Элькунысь сӥё-дано журналист
2005 – Россиысь журналистъёслэн Огазеяськонзылэн Данъян грамотаез
2009 – Удмурт Элькунысь лулчеберетъя, печатья но иворъёсъя Министерстволэн Данъян грамотаез
2012 – Ашальчи Оки нимо Йӧскалык премия (Удмуртия)

Уже кутэм литература

1. Ар-Серги В. «Я приняла вызов судьбы...» // Известия Удмуртской Республики. – 2010. – 12 февр. – С. 3.
2. Зайцева Т. Понять ребенка: об удмуртских книгах для детей // Современная удмуртская проза (1980–2000-е гг.) / Т. Зайцева. – Ижевск, 2006. – С. 143–159.
3. Зайцева Т. Туала нылпи проза сярысь кӧня ке малпанъёс // Кенеш. – 2000. – № 8. – С. 58–61.
4. Зайцева Т. Удмуртская проза между национальным и массовым. Философия мира и человека в поздней прозе Г. Перевощикова // Удмуртская проза второй половины XX – начала XXI века : национальный мир и человек / Т. Зайцева. – Ижевск, 2009. – С. 311–344.
5. Тыршемезлэн емышъёсыз – син азьын // Кенеш. – 2005. – № 8. – С. 85–94.
6. Уваров А. Римма Игнатьева (1955) // Писатели и литературоведы Удмуртии. – Ижевск, 2006. – С. 56.
7. Фёдорова Л. Покчиос но, мӧйыос но ярато // Кенеш. – 2010. – № 8. – С. 92–94.
8. Фёдорова Л. Удмурт мисс Марпл // Удмурт дунне. – 2012. – 11 июля. – С. 3.
9. Федорова Л. Удмуртская женская проза: повествовательные стратегии и герои // Италмас. – 2009. – № 1. – С. 16–19.
10. Христолюбова Л. Лаптева (Игнатьева) Римма Серафимовна (27.08.1955) // Удмуртские женщины, ХХ век / Л. Христолюбова. – Ижевск, 2002. – С. 307–308.