Милитина Васильевна Гаврилова-Решитько вордӥськиз 1935-тӥ арын 5-тӥ куарусёнэ Дэбес ёросысь Роготнево гуртын. Семьязы бадӟым вал, одӥг коркан тямыс кузя улӥзы. Нылаш школае мынон азьынгес Быдӟым тылож кутскиз. Со вакытэ будон дырыз тупаз бере, трос секытэз чидано луиз пичи нылаш. Сизьым аресысен мӧйыосын артэ вань гурт но колхоз ужъёсты быдэсъяно луиз. Сютэм улон но солэсь палэнэтӥ ӧз ортчы. Коньдонэз адӟыны ӧз кылдылы, трудоденен ужазы [6]. Атаез Василий Михайлович Гаврилов куинь ож пыр ортчиз – империалистической, граждан но Отечественной. Быдӟым Отечественной ож бере колхозын механизатор луыса ужаз, ӝытъёсы нош дӥськут вурылӥз. Кышноез Ирина Ивановна, колхозын но шутэтскон нуналъёстэк ужаз, гуртаз но ужаны, нылпиосты но будэтыны дыр шедьтылӥз [1].

Дышетскиз Милитина Удмурт Лемысь сизьым классъем школаын. Сое быдтыса, дышетсконзэ азьланьтэмез потӥз. Дэбес педучилище матын вал. Бадӟым сузэрез сьӧры Миля но отчы кыстӥськиз. Гуртын дышетӥсьёс коньдоно, сӥлы адямиос вал. Солэн но дышетӥсь луэмез потӥз. Педучилище бере атаезлэн нылзэ Иже дышетскыны лэземез уг пот ни вал. Пырак шуиз: «Дышетскиськод, дышетскиськод, нош гуртын кин ужалоз, кин милемлы юрттоз». Со угось война бере висись, лябӟемын ни вал. Но нылаш ваменэс вылэм, лэся, ӧз кылзы, Иже кошкиз [6].

1959-тӥ арын Удмурт пединститутэз йылпумъяз, историяя но литературая дышетӥсь специальность басьтыса. Студент дыръяз 1957-тӥ арын конкурс ортчыса Удмурт радиоын диктор луыса ужаны кутскиз. Радиоын дышетӥсез луиз тодмо удмурт кылбурчи Гай Сабитов.

Милитина Васильевна быдэс улонзэ Удмурт радиоен герӟаз. Солэн жингрес, небыт куараез шаерысьтымы радио пыр чузъяськыны кутскем дырысен ӝыны даур луиз ини. Диктор но, корреспондент но вал. 1975-тӥ арысен кызь ар ӵоже литературая но драмая передачаослэн редакторзы луыса ужаз, «Арня ӵукна» радиожурналэз нуиз, «Школалы юрттэт» передача кылдытӥз [6]. Вань быгатонлыксэ, сюлэмзэ поныса тыршиз. Кӧня тодмо адямиосын пумиськылӥз! Соос сярысь очеркъёсыз Удмурт радио пыр сяна, Москва, Казань, Сыктывкар городъёсын, Литва кунын чузъяськылӥзы. Удмурт гожъяськисьёслэн ужъёссыя нош кӧня радиоспектакльёс дасямын! Элькунысьтымы ваньзылэн сямен ик писательёслэн, тодосчиослэн, крезьгурчиослэн, артистъёслэн, суредасьёслэн куараоссы Милитина Васильевна сюлмаськемен Удмурт радиолэн зарни фондаз кельтэмын. Дано адямиосты возьматэм сяна, Удмурт, Ӟуч, Мунё театръёслэсь спектакльёссэс плёнкае гожтыса кельтылӥзы [5].

1992-тӥ арысен Милитина Гаврилова пенсиын. Но тэк пукыны уг чида. Шаерзэ яратонэз, калыкен тунсыкъяськемез солы маза уг сёты. Пыриське пӧртэм общественной уже. Со ик «Удмурт кенешын» но, «Удмурт нылкышно кенешын» но, творчество удысын ужась нылкышноослэн федерациязы но [2].

Милитина Гавриловалэн творческой ужез пӧртэм пумо. Радиопередача дасян сяна, со «Удмурт дунне», «Герд», «Кенеш», «Инвожо», «Вордскем кыл», «Ашальчи» элькун газет-журналъёсын печатлаське. Публикациосыз жанрзыя пӧртэмесь: соос пӧлын кылбуръёс, новеллаос, юморескаос, сценарийёс, книгаослы но спектакльёсы рецензиос, удмурт культура но литература удысын ужасьёс сярысь очеркъёс, корреспонденциос, статьяос, культура ужрадъёсысь зарисовкаос. Очеркъёсызлэн геройёсыз – шаерысьтымы тодмо адямиос: Герман Корепанов, Григорий Титов, Николай Зубков, Людмила Христолюбова, Галина Никитина, Валей Кельмаков, Фаина Будина но мукетъёс. Михаил Лямин, Михаил Петров, Даниил Яшин, Флор Васильев но мукет гожъяськисьёс но кылбурчиос сярысь очеркъёсыз писательёс сярысь тодэ ваёнъёсы пыртэмын.

Ужъёссэ огазе люкаса, Милитина Гаврилова поттӥз лулчеберет удысын тыршисьёс сярысь очеркъёсын «Ӵыдонтэм пумиськонъёс» (1993), «Эшъяськонлэн шунытэз» (2005) бичетъёссэ. Озьы ик лыдӟисьёс доры вуизы кылбуръёсын «Кесэго-кесэго малпанъёс» (1999) но «Кузьым» (2010) сборникъёсыз. Кема аръёс ӵоже радиоын ужатозяз, кӧня калыкен сюлмысь вераськонъёс вал угось! Ваньмыз соос уно книгаос поттымон люкаськемын. Нош кылбуръёс Милитина Васильевна пиналысен гожъяны кутскем вылэм, но калыклы возьматыны кепырам. Уката одӥг классын дышетскись нылъёс ӝож кылын туж вӧсь кариллям соку гожъяськыны кутскись нылашез [5]. Но дыр ортчемъя кылбуръёс асьсэос куриськиллям лыдӟись доры [4].

Кылбуръёс – мылкыд кылдытӥсьёс. Тулыс сярысь-а тодаз вае автор, толэз-а выльысь устэ – сое кылбур пыр мукетызлы но кузьма. Милитина Васильевналэн чеберлыкезъя, пӧрмемезъя, инкуазез улӟытэмезъя устоосыз пӧлысь луэ «Тол» кылбурез. Толлэсь вуэмзэ, котыр улосэз киултэмзэ буёлъёс, образъёс пыр сётэм сяна, гожтӥсь ас кылбургуреныз ветта, ӝутэ но мылкыд сётэ, со дыре ик та тол суредэз вылӥысен адӟытэ кадь. Таӵе усто чуръёс авторлэн Инмарен сётэм вылӥ шӧдонъёсыз сярысь верало [9].

Аръёс пельпуме золгес но золгес зӥбыны ӧдъяло ке, мылкыд пуксьыны ӧдъя, шуо. Милитина Васильевналэн но котькыӵе дыръёсыз луо: куректон но тупа, тазалык лябӟон вакытъёс но вань. Но солэн уг кысы кылбур гожтон мылкыдыз. Сыӵе дыръя ик ибырвесь сярысь малпанъёсыз но лыкто, луоз [9].

Куд-ог кылбуръёсызлы Пантелей Кузнецов, Николай Постников крезьгур гожтӥзы.

Эстон кылэ берыктэм кылбуръёсыз пыртэмын «Азвесь лодка = Hõbepaat» (2005) антологие. Нылпиослы гожтэм веросъёсыз печатласькизы «Кизили», «Вордскем кыл» журналъёсын, «Ӟечбур!» газетын, озьы ик пыртэмын «Азвесь кышетэн толэзь» семьяен лыдӟон книгае.

Сӥё-дано нимъёсыз но пусъёсыз

1977 – Удмурт Элькунысь журналист ӵошатсконлэн лауреатэз
1980 – «Отличник телевидения и радио» пус
1982 – Удмурт АССР-ысь Вылӥ Кенешлэн Президиумезлэн Данъян грамотаез
1985 – «Ветеран труда» медаль
1987 – Удмурт Элькунысь лулчеберет удысысь сӥё-дано ужась
1993 – Огъя Росси радиоспектаклья конкурслэн дипломантэз, Удмурт Элькунысь театр сярысь радиоын чузъяськись материалъёс пӧлысь умоез понна диплом
2002 – Ашальчи Оки нимо Йӧскалык премилэн лауреатэз, Финляндиысь М. А. Кастрен нимо Огазеяськонлэн премиезлэн лауреатэз
2011 – Удмурт Элькунысь дано журналист

Уже кутэм литература

1. Ар-Серги В. «В златых нарядах кружит осень...» // Известия Удмуртской Республики. – 2010. – 23 сент. – С. 15.
2. Зверева Т. Милитина Гаврилова-Решитько (1935) // Писатели и литературоведы Удмуртии. – Ижевск, 2006. – С. 36–37.
3. Зуева-Измайлова А. Очарованная душа // Италмас. – 2009. – № 1. – С. 110–113.
4. Михайлов В. Чупчилэсь жингрес, мамыклэсь небыт… // Удмурт дунне. – 2005. – 6 сент. – С. 5.
5. Романова Г. Ибырвесез вите ай : Милитина Гаврилова-Решитьколы – 75 // Кенеш. – 2010. – № 8. – С. 82–91.
6. Романова Г. Малпам дунне но зэма вылэм // Удмурт кизилиос : очерки, зарисовки, интервью (2001-2007). – Ижевск, 2007. – С.
7. Христолюбова Л. Решитько (Гаврилова) Милитина Васильевна (5.09.1935) // Удмуртские женщины, XX век / Л. Христолюбова. – Ижевск, 2002. – С. 318–319.
8. Христолюбова Л. Судьба ее – радио // Удмурты. – М., 2005. – С. 528–529.
9. Чернова Т. «Зарни сӥзьыл вуиз дорам» // Удмурт дунне. – 2010. – 29 сент. – С. 8.