Елена Петрова вордӥськиз 1987-тӥ арын 15-тӥ гудырикошконэ Ижкарын. Елена – тодмо удмурт кылбурчилэн, Татьяна Черновалэн, нылыз, Лидия Чернова нылпи кылбурчилэн нунокез.

Школаын дышетскыкуз, нылаш суредаськонэн тунсыкъяськиз. Удмурт нылпиос понна радъям «Шундыкар» гужем лагерьын Василий Морозов удмурт суредась бордын дышетскиз. Со сяна, Елена крезьгуръя школаын дышетскиз на. Ижкарысь гуманитарной лицейысь «Зорай» ансамбле ветлӥз, соин соку кивалтэ вал Удмуртиысь искусство удысысь сӥё-дано ужась Розита Анкудинова [9].

2004–2009-тӥ аръёсы Елена Петрова Удмурт кун университетысь кылосбуръя факультетлэн финн-угор ёзэтаз дышетскиз. 2007-тӥ арын венгер кылэз юнматон понна одӥг семестрлы Венгрие ветлӥз. Эшъёсыныз вуылӥз Чехие, Прагаысен Удмурт Элькунысь калык писательлэн Вячеслав Ар-Сергилэн творческой ӝытаз пыриськиз. 2010-тӥ арын Елена Петрова Будапештысь Балашши нимо институтын чеберлыко литератураез берыктонъя курсъёсын тодон-валан басьтӥз.

Алёна – творческой адями, маин гинэ уг выры! Со туж яратыса выриз ана - крезьгур утчан но шудон бордын. «Мон диджей», – шуэ со ачиз сярысь. 2008-тӥ арын Dj Darali нимын «Авиатор» клубын шудылыны кутскиз. Гуртысь вуэм егит нылъёс но пиос туж лӧптыса люкаськылӥзы со удмурт позыръяськонъёсазы. Нылаш ачиз но шумпотыса кырӟан бергатылӥз, шудылӥз удмуртъёс понна [4].

2010-тӥ арын Еленалэн ужез герӟаськиз Удмурт кун филармониен. Сентябрь толэзьысен со тыршиз эстрада кырӟанъя «Шулдыр ӝыт» театрын. Татын соос Марина Галичанинаен ӵош малпало вал выль кырӟанъёс, Женя Сундуковаен артистъёслэн выступлениосазы пыртыло выль сямъёс. 2011-тӥ арысен Дарали Лели «Удмурт дунне» газетын ужа, «Дарт» нимо егитъёслы приложениен кивалтэ.

2011-тӥ арын шаерамы ортчиз егитъёслы пуктэм «Узы-боры» кинофильмлы презентация. Кино сярысь трос пӧртэм вераськонъёс вал. Дарали Лели кинолы сценарий гожтӥз. Капчиен ӧз сётӥськы егит нылашлы та уж. «Дарали – творчество омырын улӥсь адями. Соин куддыръя ог-огмес ӧм валаллялэ, пӧртэм сямен малпаськылӥм», – вера кинолэн режиссёрез, поляк Петыр Палган. Но та уж борды кутскемзы сярысь огзы но пичи но ӧз жалялэ [10]. 2012-тӥ арын «Пузкар» нимо выль кино борды кутскизы ини, солы но Елена сценарий гожтӥз.

2011-тӥ арын «Зарни вотэс» ӵошатсконъёс ортчизы. Нациосын ужан политикая министерство юнматӥз нимысьтыз приз. Отын ужасьёс синмаськемзэс веразы но туж ӟеч кузьым – ноутбук – кузьмазы Дарали Лелилы [11].

Елена школаын дышетскыкуз ик кылбуръёсты, выжыкылъёсты гожъяны кутскиз. Берлогес веросъёсыз, новеллаосыз, выжыкылъёсыз, этюдъёсыз, статьяосыз печатласькизы «Ӟечбур!», «Удмурт дунне», «Инвожо», «Кенеш» газет-журналъёсын.

2009-тӥ арын куартолэзе Дарали Лели Удмурт театрын ортчытӥз творчествоя ӝыт: перформанс но ток-шоу. Отын «Кумышка но Клаудия» кушем нимъёсын соос Ефремова Надя эшеныз вань йӧспӧртэм малпанъёссэс кисьтӥзы. Отын ик калыке потӥз соку гинэ вордэм книгаез – «Гур сьӧрысь суредъёс» нимо аспӧртэмлыко веросъёсын нырысетӥ бичетэз [4].

Бичетлэн геройёсыз – нылъёс но кышномуртъёс. Соослэн сюлэмшугъяськонъёссы герӟаськемын синмаськонэн, яратоно муртсэс утчанэн-возьманэн. Вужмисьтэм тема выль сямен усьтэмын. Выль удмурт кылъёс пыр: «Малпанъёсме кужмогес, мылкыдъёсме шонергес возьматыны кылъёс шедьтымтэен, лэся, бичетам выль, литературае та дырозь пыӵамтэ кылъёс пыртылӥ», – сюлэмзэ усьтэ егит автор [7].

Удмурт критик, литературовед Василий Ванюшев пусъе: «Тросаз отын (веросъёсаз) нокыӵе учырез ӧвӧл кадь, сюжет чуртнаське геройлэн яке мадись муртлэн мылкыдъёсаз, малпаськон радаз. Автор эркын пылаське удмурт кыл пушкын, кылъёсын шудэ, соосыз озьы яке тызьы «позыръя», выль кылъёс кылдытэ. Со чотын но азинске сюжет, мылкыд-малпан нюжа…» [1]. Гожъямъёсаз сыӵе эпизодъёс но суредъёс возьматэмын, кудъёсыз адями улонысь тужгес но лэчыт но висись палъёсты усьто [8].

Дарали Лели «Silent Woo Goore» группалы но «Узы-боры» кинолы кӧня ке кырӟан гожтӥз.

Сӥё-дано нимъёсыз но пусъёсыз

2010 – «Удмурт блогиня-2010»
2011 – «Удмурт кенеш» Огазеяськонлэн тау карон гожтэтэз, «Зарни вотэс» интернет-ӵошатсконлэн нимысьтыз призэз (Удмуртия)
2013 – Эрик Батуев нимо литературной премилэн лауреатэз

Уже кутэм литература

1. Ванюшев В. Будон сюрес // Удмурт дунне. – 2012. – 15 февр. – С. 4.
2. Вардугина А. Удмуртский кинематограф оперяется и создает собственное «Гнездо» // Удмуртская правда. – 2012. – 24 авг. – С. 6.
3. Дарали Лели. Антигены для удмуртской музыки // Известия Удмуртской Республики. – 2011. – 14 сент. – С. 15.
4. Дарали Лели. Ваменэс дыдылэн малпанъёсыз // Удмурт дунне. – 2011. – 26 янв. – С. 7.
5. Дарали Лели. Мама мия! Таӵезэ вити-а?! // Удмурт дунне. – 2010. – 13 авг. – С. 14.
6. Дарали Лели // Кенеш. – 2009. –  № 7. – С. 70.
7. Дмитриева Л. Ческыт кылъёсты пӧрась // Удмурт дунне. – 2012. – 15 февр. – С. 5.
8. Захаров П. Дарали Лели (Елена Петрова) // Гур сьӧрысь суредъёс / Дарали Лели. – Ижкар, 2009. – 4 с. обл.
9. Никитина Е. Алёна – ӟарыт, Дарали – кужмо // Удмурт дунне. – 2008. – 9 апр. – С. 5.
10. Рябина Л. Куинь шӧмо «Узы-боры» // Удмурт дунне. – 2011. – 16 март. – С. 4
11. Рябинина З. Ми зарни вотэсын! // Удмурт дунне. – 2011. – 16 дек. – С. 14.
12.  Шихова Л. Barri Fashion уй // Удмурт дунне. – 2012. – 28 марта. – С. 2.