Русский | Удмурт

Ольга Ведрова (Петрова) вордӥськиз 1972-тӥ арын 8-тӥ южтолэзе Дэри ёросысь Вылӥ Женвай гуртын. Дышетскиз Женвайысь начальной но Шор Постолысь шор ёзо школаосын. Школаын дышетскыкуз, литературно-творческой кружоке ветлӥз; бадӟым классъёсын дышетскыкуз, куинь ар ӵоже соин кивалтӥз.

Соку ик Ольга Ведрова дневник нуыны кутскиз, кытчы тужгес но яркыт синмалпанъёссэ гожъяз. Кыл сярысь, 1989-тӥ арын 3-тӥ тулыспалэ ортчем тодмо удмурт кылбурчиен Владимир Романовен пумиськон сярысь. Ольга Ведрова соин ньыль пол пумиськылӥз, Владимир Романов со понна эш но дышэтӥсь вал. Со пумиськонъёс трослы дышетӥзы кутскись кылбурчилы, ас кужымезлы оскон пыӵатӥзы.

Школаез йылпумъяса, Ольга Ведрова одӥг арзэ «Дась лу!» газетын ужаз, собере Удмурт кун университетысь кылосбур факультетэ дышетскыны пыриз, удмурт ёзэтын «журналистика» специальностья дышетскиз .

1995-тӥ арысен Ольга Ведрова Удмурт радиоын литературно-драматической передачаослэн редакциязы журналист луыса ужаз. Удмуртиысь тодмо адямиос сярысь уно очерк дасяз. «Арня ӵукна», «Кылбурет удысын», «Ингур» передачаосты дасяз но нуиз. Удмуртиысь улонысь вазь кошкем тодмо адямиос сярысь «Тодад ӧд вай ни ке монэ…» передачаез кылдытӥз но нуиз. 2008-тӥ арын Ольга Ведрова «Моя Удмуртия» телерадиокомпаниын ужаз, «Данъясько тонэ, шаер!» проектлэн авторез луиз.

2009-тӥ арысен Ольга Ведрова Кузебай Герд нимо гимназиын литературно-творческой кружокен но мультимедийной центрен кивалтэ. Дышетскисьёслы спектакль возьматонъёсы, концертъёсы, художественной выставкаосы ветлон радъяське, гожъяськисьёсын пумиськонъёс но Герд лыдӟиськонъёс радъясько. Котькуд ар дышетскисьёслэн нимысьтыз яке коллективной кылбуръёсын, веросъёсын, выжыкылъёсын бичетъёс потто. 2012-тӥ арысен гимназиысь дышетӥсьёслэсь научно-методической материалъёссэс поттылыны малпамын вал.

Со сяна, Ольга Ведрова «Удмурт кенешлэн» но «Нылкышно кенешлэн» ёзчиез.

Ольга Ведровалэн кылбурет творчествоезлы лирической шӧдонъёслэн но улон сярысь, адями кусыпъёс сярысь, яратон но шуд сярысь философской малпаськонъёслэн кушето сураськемзы характерной луэ. Нырысетӥ кылбурзэ куинетӥ классын дышетскыкуз гожтӥз. Школаын дышетскыкуз ёросысь «Ленинец» но элькунысь пионеръёслэн «Дась лу!» газетъёслэн юнкорез вал. Университетэз йылпумъяку, диплом ужез интые «Мон утчасько тонэ» (1995; научной кивалтӥсез кылосбур тодосъя кандидат, кылбурчи Виктор Шибанов) кылбур сборниксэ возьматӥз.

Книгае пыризы чылказ аслаз малпам гожъямъёсыз но Омар Хайям, М. Лермонтов, А. Ахматова но мукет авторъёслэн поэзиязылэн мотивъёсъя кылдытэм произведениос. Бичетлэн валтӥсь темаез нылкышно яратонэз ке но, со сяна анай луон («Мон ӝоген луо ини анай…»), вордскем шаерез яратон («Удмурт мулэн пичи гинэ сэргаз…», «Куазь шимес тӧло ке но…»), война («Кайгуысь гожтэт») темаос усьтӥсько… [4]. Ольга Ведровалэн кылбуръёсаз ог дыре туала егит муртлэн абсурдистской мылкыдыз шӧдске, мифологической инъет, удмурт литературалэн традициосыныз герӟаськон,.. стереотипъёс… [6].

Кылбуръёслэн лирической героинязы луэ нылкышно, кудӥзлэн лулпушказ котьку яратн но синмаськон уло, вань шугадӟонъёс шоры учкытэк. Ачиз кылбурчи вера: «Одӥг адями пушкын ог дыре куинь яратон улэ. Нырысетӥез – ноку вунонтэм егит дыырысь. Кыкетӥез – бордад улӥсез, кудӥз кулэ ке шунтоз, жалялоз но тонэн ӵош шумпотоз. Куинетӥез – выжыкылысь яратон, кудӥз малпанъёсын улэ, соин ноку но ӵош уд луы» [4]. «Сборникын… «Вумуртлы пӧрмисько» («Превращаюсь в русалку») нимын нимысьтыз люкет висъямын. Удмурт фольклорысь ассоциациос бордын умой шӧдӥське Г. Гейнелэн шӧмыз:

Мон али ӝутӥсько тон доры
Туж мурысь, пеймыт ву пыдэскысь.
Дорозяд ӧй ке вуы, эн паймы
Ву пушкысь пеймыт куараелы.

Я сейчас поднимусь к тебе / С глубины, из темной воды. / Если не дойду до тебя, не удивляйся / Со дна идущему моему томному голосу» [5].

2012-тӥ арын Ольга Ведровалэн «Усьты ӧстэ» нимын кыкетӥ кылбур бичетэз потӥз. Кылбуръёсыз «Кенеш», «Инвожо», «Ашальчи», «Удмурт дунне» газет-журналъёсын печатласько; «Радиовещание Удмуртии» (1997), «Kuum ӧӧ» (2006; эстон кылын) книгаосы пыртэмын; Л. Федоровалэн «Удмурт нылкышно кылбуретлэн тулкымъёсыз» (2007) книгаяз пыртэмын. Куд-ог поэтической произведениосыз кырӟанлы пӧрмизы, крузьгур гожъязы В. Возняков но П. Кузнецов.

Сӥё-дано нимъёсыз но пусъёсыз

1999 – Финляндиысь М. А. Кастрен нимо финн культурая огазеяськонлэн дипломантэз
2000 – Удмурт Элькунысь Правительстволэн Данъян грамотаез, «ГТРК Удмуртиялэн» Данъян грамотаез
2001 – Огъя удмурт «Удмурт кенеш» ассоциацилэн Данъян грамотаез
2007 – Удмурт Элькунысь лулчеберетъя, печатья но иворъёсъя Министерстволэн Данъян грамотаез

Уже кутэм литература

  1. Ведрова О. [Кылбурчиен кенешон] : [беседа] / записала Г. Романова // Кенеш. – 2007. – № 3. – С. 6–8.
  2. Зверева Т. Ольга Ведрова (1972) // Писатели и литературоведы Удмуртии. – Ижевск, 2006. – С. 139.
  3. Малых Л. Пӧзёно ке, мед уртчоз! // Удмурт дунне. – 2007. – 28 февр. – С. 4.       
  4. Фёдорова Л. Ольга Ведрова (1972) ; «Мон – вуныл...» // Удмурт нылкышно кылбуретлэн тулкымъёсыз / Л. Фёдорова. – Ижевск, 2007. – С. 304–305, 314–321.
  5. Шибанов В. Традиции Генриха Гейне в современной удмуртской поэзии // Вордскем кыл. – 2006. – № 8. – С. 39–46.
  6. Шибанов В. «Чиньыостэ уян бурдлы мон пӧрмыто...» // Мон утчасько тонэ / О. Ведрова. – Ижкар, 1995. – С. 75–77.