Русский | Удмурт

Лия Яковлевна Малых вордӥськиз 1960-тӥ арын 14-тӥ южтолэзе Шаркан ёросысь Камышево (Малый Казес) гуртын. Атаез начальной школаын дышетӥсь вал, анаез колхозын ужаз. Семьяязы тямыс нылпи вал, Лия – сизьыметӥез.

1975-тӥ арын Лия Малых тямыс классъем школаез йылпумъяз, нош 1977-тӥ арын – Быги гуртысь шор ёзо школаез. Со арын ик Удмурт кун университетысь кылосбуръя факультетлэн удмурт ёзэтаз пыриз. Отын дышетскыкуз «Советской Удмуртия» газетлэн литературной огазеяськонэзлэн ужаз пыриськиз. 1982-тӥ арын университетэз йылпумъяса, «Советской Удмуртия» газетын корректор луыса ужаны кутскиз. Дырыз луыку газет материалъёсты гожъяса потылӥз, соин ик 1990-тӥ арын лулчеберетъя ёзэтэ корреспондент интые пуктэмын вал, берлогес мерлыко ужпумъёсъя ёзэтэ выжиз. Лия Малых выльдытӥз покчиослы «Пинал куара» бамез, кылдытӥз «Ерпечкаос» рубрика. 1997-тӥ арысен со мерлыко ужпумъёсъя ёзэтлэн редакторез луэ. Лия Малыхез сӧсыр адямиослэн, начар улӥсь муртъёслэн ужпумъёссы юн сюлмаськыто. Улонысь троссэ адӟем адямиос сярысь очеркъёс гожъя. Берлогес со «Удмурт дунне» газетын гожтэтъёсъя ёзэтэзлэн кивалтӥсез луиз.

Со сяна, Лия Малых егитъёслэн ужпумъёсынызы вырэ. Газетын пӧртэм тунсыко конкурсъёс ортчытъя, егитъёслы ас шаердэ яратон мылкыд пыӵатон бордын бадӟым уж нуэ. Со понна 2007-тӥ арын Росси Кивалтэтлэн военной историко-культурной центрез солы «Патриот России» медаль сётӥз [7]. Озьы ик Лия Малых ӵектӥз газетын поттылыны психологъёслэсь, наркологъёслэсь, сексологъёслэсь но эмъясьёслэсь дэмланъёссэс. Берлогес малпан кылдӥз лыдӟисъёслы специалистъёсын пумиськонъёс ортчытъяны. Та проект туннэ нуналлы но азинлыкоен лыдъяське [7].

Лия Малых мерлыко ужен но выре: удмурт егитъёслэн «Шунды» огазеяськонзылэн правленияз пыре, «Удмурт кенешлэн» ёзчиез, Элькунысь сӧсыр адямиослэн огазеяськонзылэн президиумезлэн ёзчиез.

Корректорын ужакуз, Лия Малых пӧртэм материалъёсты пыр-поч эскерылӥз. Янгышъёсты гинэ ӧз чакла, лӧптыса ик лыдӟылӥз тодмо но егит гожъяськисьёслэсь произведениоссэс. Берлогес ачиз но кутскиз гожъяны газет материалъёсты, юморескаосты, фельетонъёсты, веросъёсты, выжыкылъёсты, очеркъёсты, кылбуръёсты, шаржъёсты, сценкаосты но тунсыко адямиос сярысь зарисовкаосты [7].

Лия Малыхлэн литературной гожъямъёсыз элькунысь вань газет-журналъёсын печатласькизы. Куд-ог ужъёсыз пыртэмын «Инӟарекъян» сборнике, «Камсьӧр батыр но Инсьӧр нылаш» литературной выжыкыл бичетэ. 1997-тӥ арын потӥз «Эктӥсь кизили» («Танцующая звездочка») нылпи выжыкылъёсын сборникез. Лия Малыхлэн творчествояз бадӟым инты басьто нылпиослы выжыкылъёс. Нырысетӥосыз Юля нылызлы сӥземын вал, нош нунокез вордскыку, Лия Малых нош ик нылпи дуннее зымиз. Быдэс ӝытъёсы нунокезлы выжыкылъёсты мадьылӥз, ӵемгес аслаз малпамъёссэ [7].

Гожъяськисьлэн выжыкылъёсаз туж валаса пыртылэмын мифъёсысь веранъёслэн, югдуръёслэн кыӵе ке люкетъёссы, дунне шоры учкон сям-йылолъёслэн чалепъёссы но отысь персонажъёс. Гожъямъёсаз адями но Инкуазь, тапал дунне но сопал дунне, зэмос дунне но малпам дунне, таиз дунне но пичи геройлэн кыӵе ке но шекъёсыныз йырин кылдэм дунне ваче пумит вуо. Геройёсыз – пичи нылъёс но пиос. Котькудӥзлэн нимыз вань. Озьы ик син шоры йӧтэ: автор котькугес ик пичи лыдӟисеныз кенеше, соосты малпаськытэ, геройёсызлэсь ортчоно сюрессэс син шоразы пуктыны косэ. Лия Малых выжыкылъёссэ капчи, пиналъёслы валамон кылын гожъя, лыдӟисьёслы кельшымон кылсуредъёс но геройёс шедьтыны тырше. Пӧртэм чеберманъёс мадёнлы медам люкетэ, пичи муртлы соос пыртӥ пӧртмам дуннее вуыны шуг медам лу [5].

Лия Малыхлэн кык типъем выжыкылъёсыз вань: быдэсак аслаз гожъямъёсыз но фольклор вылэ пыкиськыса пӧрмытэмъёсыз. Тужгес но тодмо луиз Боко но Моко корка кузёос сярысь выжыкылэз [3]. Ачиз гожъяськись соос сярысь вера:  «”Боко но Моко” выжыкылысь геройёс ас сярысьтым потӥзы. Боко – визьнодо, пӧртэм учыръёсысь потыны быгатэ. Моко – ерпечка, олокыӵе но юмокъёсы шеде. Мон таӵе но, сыӵе но луисько. Но Боко вормегес кадь…» [6].

Лия Малыхлэсь вань гожъямъёссэ лыдӟыса валаськод: удмурт нылпи литературае туж кибашлы мадёсчи, тунсыко геройёс, яркыт суредъёс но усто малпаса сюжет гердъёс, пужыос пыр будӥсь нылпиослы ӟеч сямъёс пыӵатон сярысь сюлмаськись писатель лыктӥз [2].

2010-тӥ арын потӥз «Шудберган» книга, кытчы пыризы веросъёс, юморескаос, мӧйыослы выжыкылъёс, сценкаос.

Лия Малыхлэн гожъямъёсыз пыризы «Котырысь улон но мон», «Азвесь кышетэн толэзь», «Ӟечбур, выжыкыл» покчиослы хрестоматиосы но внеклассной лыдӟон книгаосы. Озьы ик удмурт кылъя но литературая дышетскон программае («Анай кыл», «Книга для чтения»).

Сӥё-дано нимъёсыз но пусъёсыз

1998 – Удмурт Элькунысь дано журналист, Сӧсыр адямиослэн Огъя Росси огазеяськонзылэн Данъян грамотаез, Удмурт Элькунысь егитъёслэн ужъёссыя Кун комитетлэн Данъян грамотаез
2001 – Россиысь дышетонъя Министерстволэн егитъёслэн политикая Департаментлэн Тау карон гожтэтэз
2006 – Ашальчи Оки нимо Йӧскалык премия (Удмуртия)
2007 – «Патриот России» медаль

Уже кутэм литература

  1. Зайцева Т. Понять ребенка: об удмуртских книгах для детей // Современная удмуртская проза  (1980–2000-е гг.) / Т. Зайцева. – Ижевск, 2006. – С. 143–159.
  2. Зайцева Т. Туала нылпи проза сярысь кӧня ке малпанъёс // Кенеш. – 2000. - № 8. – С. 58–61.
  3. Зайцева Т. Художественный мир авторской сказки // Удмуртская проза второй половины XX – начала XXI века: национальный мир и человек / Т. Зайцева. – Ижевск, 2009. – С. 304–310.
  4. Зверева Т. Лия Малых (1960) // Писатели и литературоведы Удмуртии. – Ижевск, 2006. – С. 161–162.
  5. Клеменьев А. Пӧртмам дуннеосаз ӧте : Лия Малыхлэн выжыкылъёсыз сярысь // Кенеш. – 2003. - № 11–12. – С. 83–86.
  6. Петрова С. Выжыкыл дунне чылкыт // Инвис. – 1998. – 29 мая. – С. 4.
  7. Рябинина З. Вань мынам выжыкыл дуннее… // Удмурт дунне. – 2010. – 12 марта. – С. 6, 11.
  8. Христолюбова Л. Малых (Широбокова) Лия Яковлевна (14.03.1960) // Удмуртские женщины, XX век / Л. Христолюбова. – Ижевск, 2002. – С. 310.
  9. Шибанов В. Л. Пӧртэмзэгес сюрес бырйид-а тон?.. // Инӟарекъян. – Ижевск, 1991. – С. 5–8.