Екатерина Васильевна Макарова вордӥськиз 1976-тӥ арын 18-тӥ толсуре Пичи Пурга ёросысь Кутер-Кутон гуртын. Пичи Пургаысь ик Аксакшур шор ёзо школаын дышетскиз. Начальной классъёсысен ик кутскиз ветлыны «Чингыли» литературной кружоке, кудӥныз кивалтӥз удмурт кылъя но литературая дышетӥсез Надежда Петровна Демьянова. Берлогес «Пурга гуръёс» литературной огазеяськонлэн ужаз пыриськиз.

Школазэ йылпумъяса, 1992-тӥ арын Екатерина пыриз дышетскыны Можга педучилищее. Малы гинэ ӧз дышетэ отын! Баянэн, гитараен, горнэн шудыны, чебер эктыны, фото поттаны, киноаппаратэн ужаны, суредаськыны, гожъяськыны, киужен вырыны но трос-трос мукетэзлы. Татын ик солэсь кылбурась но вошъяськись мылкыдзэ дышетӥсь Татьяна Сергеевна Иванова шӧдӥз но визь-кенешъёсын юрттылӥз. Екатерина Макарова татысь потэм тодмо нимъёслэсь лыдзэс йылэтӥз [1].

Училищеез йылпумъяса, Екатерина Макарова Пичи Пургаысь Гожня шор ёзо школаын ужаз. 1996–2002-тӥ аръёсы заочно дышетскиз Удмурт кун университетысь кылосбуръя факультетын. Диплом ужзэ гожтӥз Василий Ванюшев профессор дорын. Ӵошен соос поттӥзы «Кыл но кылбурет» (2004) студентъёслы юрттэт. 2002-тӥ арысен Екатерина Макарова Пичи Пурга ёросысь Байситово школаын ужа: ӟуч кылъя но литературая дышетӥсь, дышетон люкетъя директорлэн воштӥсез, начальной классъёсты дышетэ.

Екатерина Макарова школаын дышетскыкуз ик «Дась лу!» газетын печатласькыны кутскиз, ӵемысь газетлэн редакциез солы кузьымъёс сётъялляз. «Книгаос мон понна тужгес но дуно кузьым вал. Али ке но возисько соосты», – вера Екатерина [5]. Солэн кылбуръёсыз печатласько «Кенеш», «Инвожо», «Ашальчи» журналъёсын, «Удмурт дунне» газетын; озьы ик пыртэмын «Kuum ӧӧ» (2006, эстон кылын), Любовь Федоровалэн «Удмурт нылкышно кылбуретлэн тулкымъёсыз» (2007), «Льӧм ю = Льӧмпуа юок = Ломбо эн’ер = Zelnicemeggyes patakoska = Льӧмпу шур = Toomingajȏ gi = Tuomijoki = Tom’jogi» (2008, коми но коми-пермяк кылъёсын) книгаосы.

Екатерина Макаровалэн кылбур дуннеяз кышкыт но, шурдыт но. Шыпыт гинэ, «улонлэсь мултэс курытэк» кылбуранысь тросгес шӧдӥськом ӝож куараосты, ортчем дырын малпаськонэз. Но егит муртлэн вань ай утисьёсыз: Инмар, Яратон, Инкуазь… Инкуазен ваче син кыльыса, со лул висёнзэ буйгатэ [9]. 

Можга педучилищеын ужась дышетӥсь М. Пискунова 2003-тӥ арын Екатерина Макаровалэн творчествоезлы таӵе дунъет сётэм: «Екатерина Макарова – тужгес но вӧсь луисез, котьма понна сюлмаськисез, астэ нокинлы кулэтэмен шӧдӥсез, трос улон но кулон сярысь малпаськисез. Нош солы 30 арес но ӧвӧл ай! Улонмес адӟе ини даурзэ ортчытэм песянай сямен, нош малпаське, оло, соослы валантэм ужпумъёс, валатонъёс сярысь: зэмлык, сюлмаськон, адӟон, чидан, оскон, жалян, шудбур, яратон, мӧзмон, маке пӧрмымтэ пумысен зол-зол куректон… Кылбуръёсыз мур психологическоесь, философскоесь» [8].

"Шӧдон" – Екатерина Макаровалэн нырысетӥ книгаез, со 2006-тӥ арын потӥз. Нижний Тагилэ Россиысь егит гожъясьёслэн семинаразы ветлэмзы бӧрсьы, Люза Бадретдинаваен кыкназылэсь но бичетсэс «Удмуртия» издательствоын печатланы дэмламын вал уго. Вить ар ортчыса, Эстониысь эшъёсыз Екатерина Макровалэн «Шӧдон» книгаезлы вылӥ дунъет сётӥзы, но 2011-тӥ арын со отысь ӵыжы-выжы луись калыкъёслэн литературной премизылэн лауреатэз луиз [6].

Книгаез вить сӧзнэтлы люкемын. Кылбуръёссэ эскерисьёс одӥг ымысь кадь верало – Екатерина Макаровалэсь кылбуръёссэ лыдӟыса паймоно: ма та улонэз адӟем муртлэн малпанъёсыз-шӧдонъёсыз ук, шуыса.

Солэсь кылбуръёссэ лыдӟыса, пумен валэктон шедьтӥськод: солэн вӧзаз ӧвӧл чебер яратонэз, сое валась, гажась муртэз. Соин ик лулыз – четлыке пытсам тылобурдолэн кадь. Отысь чаляк мозмытскемез потэ. Но героиня оске: таӵе векаса улонлы пум вуоз – «Огпол ке но серекты, сюлэм…»

Но кылбур бичетлэн пумаз сюлэм тырме шумпотонэн: ӝож гуро мылкыдэз сайя сайкыт, шулдыр инкуазь [4].

Куд-ог кылбуръёсызъя крезьгурчиосмы гожтӥзы кырӟанъёс. Нырысь ик Эдуард Уразов синйылтэм «Ой, уе, тани нош пумиським…» нимо кылбурзэ. Собере Пантелей Кузнецов, Пётр Симанов, Виктор Крестьянинов басьтӥськизы мукет кылбуръёсыз борды. Нош Пуро клубын ужась Юрий Волков солэн кылъёсызъя даслэсь уно кырӟан пӧрмытӥз ини [6].

Сӥё-дано нимъёсыз но пусъёсыз

2011 – Эстониысь ӵыжы-выжы луись калыкъёслэн Программалэн литературной премиезлэн лауреатэз

Уже кутэм литература

1. Бадретдинова Л. Шӧдонэз бубыли бурдъёслэн кадь // Ӟечбур! – 2008. – 17 апр. – С. 3.
2. Ванюшев В. Бурдо лу, Катерина! // Удмурт дунне. – 2002. – 17 апр.
3. Демьянова Н. «Сыӵе улэм потэ...» // Вордскем кыл = Родное слово. – 2011. – № 8. – С. 26–28.
4. Демьянова Н. Эн ӝега дунъяны адямиез // Удмурт дунне. – 2008. –14 окт. – С. 7.
5. Ермолина А. Арган гуро, кылбур чуро Пуро, яке Кызьы милемыз шулдыртӥзы усточиос // Ӟечбур! – 2005. – 10 февр. – С. 2.
6. Макарова Е. Векчи бурд – шӧдонэд : [беседа] / записала Т. Чернова // Удмурт дунне. – 2012. – 15 февр. – С. 2.
7. Нянькина Л. Сӥзьыл шӧдонъёс // Инвожо. – 2007. – № 5/6. – С. 156–157.
8. Пискунова М. Нылкышно кылбурасьёс // Выль даур. – Можга, 2003. – 12 апр., 7, 21 июня.
9. Чернова Т. Сылмыны инбаме... // Удмурт дунне. – 2006. – 14 нояб. – С. 6.