Русский | Удмурт

Петр Васильевич Куликов вордӥськиз 1952-тӥ арын 16-тӥ куарусёнэ Кияса ёросысь Вылын Пичи Салья гуртын. Бадӟым удмурт крестьян семьяын тямыс нылпиоc пӧлысь со вал сизьыметӥез. Улонзы секыт вал. Колхозын коньдон туж ичи сётъязы, номырлы ик ӧз тырмылы. Атайзы, базаре мыныса, вуж дӥськут басьтыса вайылӥз. Нянь, картош вылынгес будӥзы. Гужем губияса, толлы сылалтыса дасяллязы. Озьы картош вӧзы губи но куртчон луылӥз на. Ёрмысагес улэменызы пиналъёслы но вазь анай-атайзылы юрттоно луизы. Петя нырысь-валысь парсь возьмасьын ветлӥз, бӧрысь валъёсты, отӥяз скалъёсты утиз. Озьы ужамез понна кытӥ анай-атаезлэсь тросгес но коньдон дораз вайылӥз. Со туж бадӟым юрттэт вал семьялы. Капчиен-а, секытэн-а анай-атай бурд улын будо ни вал ай. Но ӝоген соос улонысь кошкизы. Нырысь атаез сюлмыз висьыса, нош Петя тямысэтӥ классын дышетскыку, анаез но кулӥз. Соку пичиоссэ пиналъёсты дораз басьтӥз бадӟымез агайзы, пыд йылазы ӝутӥз. Со председатель вал, улӥз Ермолаево ӟуч гуртын [2].

Пияшлэн туж потэ вал геолог луэмез. Но отчы дышетскыны Свердловске мыноно луысал. Агаезлэн лэземез ӧз поты: син азям, пе, мед луоз. Озьы Петя вуиз Иже. Агрономе-а, инженере-а мыноно шуса тунаса улонъяз вуиз университетэ. Приёмной комиссиын ужасьёс удмурт отделение пырыны лӧпкытӥзы: татын дышетскемъёсмы, пе, журналист но, писатель но луо. Озьы Петя Куликов бурдъяськиз, луиз удмурт университетысь филологияя факультетысь удмурт отделенилэн студентэз. Дышетскон солы яраз. Ма, гожъяськыны но яралляз [2]. Татын дышетскыкуз литературно-творческой кружоке ветлӥз. Та огазеяськонэн соку кивалтӥз тодмо удмурт кылбурчи, удмурт литературая кафедраен кивалтӥсь Даниил Александрович Яшин. Со ик юрттӥз пинал пияшлы юнматскыны та удысын.

1974-тӥ арын Петр Куликов Ува ёросысь Удугучинысь шор ёзо школаын удмурт кылъя но литературая дышетӥсь луыса ужаз. Отын литературной кружок усьтӥз. Удмурт гожъяськись но тележурналист Георгий Грязев солэн дышетскисез вал.

1975-тӥ арысен Роман Валишинлэн ӧтемезъя Петр Куликов «Советской Удмуртия» газетын ужаны кутскиз. Татын литература но искусство отделэ аслаз дышетӥсез – Роман Валишин – вӧзы пуктӥзы. Со вакытэ газетын толэзяз кык пол «Италмас» бам потэ вал, сое но дасяно луылӥз. Бӧрысь иворъёсъя отделын тыршиз, «Шӧкыч» нимо юмористической бамез нуиз. Солы редакциын туж йӧно, сабырлы, визьмо муртъёсын ужаны шуд усиз.

1987-тӥ арын Петр Куликовез ӧтизы Удмуртиысь писательёслэн огазеяськонзылэн «Молот» журналазы. Татын нырысь валтӥсь редакторлы воштӥсе бырйизы, 1994-тӥ арын – валтӥсь редакторе. Та уж борды солы историмылэн туж секыт вакытъёсаз басьтӥськоно луиз. Но со ӧз куалекты, ас удыссэ куштыса ӧз пегӟы. Журналэз утён понна, бумага утчаса, авторъёсты ӝуткаса, уждунлы коньдон поттыны вырыса, кӧня бызьылоно луиз, дыр, солы. «Кенеш» ӧз ворсаськы, улэп кылиз [1].

Петя Куликов школаын дышетскыкуз ик «Советской Удмуртия» газетэн эшъяськиз, «Пинал куараос» сэреге кылбуръёс, иворъёс ысъялляны кутскиз, бӧрысь «Дась лу!» газетэн кусып тупатӥз. «Вунонтэм гужем» конкурсын ог ньыль пол вормисе потылӥз, кузьым но сётъяллязы. Эшъёсыз пӧлын Пети самой дано адями луылӥз соку. Гожъяськон мылкыдыз ӧз сӥя университетын дышетскыкуз но [4]. 

Петр Куликовлэн нимысьтыз книгаез кык: «Буран бере» (1982) но «Зарни чорыг» (1992) повестьёсын но веросъёсын бичетъёс [6]. Гоожъямъёсаз со тырше улонысь  учыръёсты, аслэсьтыз синйылтэмъёссэ но адӟем-чакламъёссэ уже кутыны [5]. Геройёсыз луо туала гуртын улӥсь но ужась калык. Соос чупресэсь, пуктэм ужпумъёсыз быдэстӥсесь, янгышало, но со янгышсэс валаны но тупатыны тыршисесь.

Нырысетӥ книгаез потэм бере филология тодосъя кандидат, писатель Александр Григорьевич Шкляев «Араны егит муртъёс лыктозы» статьяяз гожтэ: «Пётр Куликовлэн «Буран бере» книгаез – туала егит удмурт прозаик понна, мон сямен, одӥгез самой яркыт но синйылтымон факт. Лач-лач пуктэм предложениос, образной кылыз, оскымон суредам характеръёсыз но аслаз темаез. Лыдӟись сое соку ик шӧдӥз» [9].

Аспӧртэмлыко инты басьтэ туала удмурт литератураын Петр Куликовлэн «Зарни чорыг» повестез. Ас вакытэзлэн тодметъёсыз пӧртэм сямен пӧлэстӥськемын отчы. Но тужгес висъяське лушкаськон ужпум. Со герӟаськемын выльдӥськон югдурен но туала улонлэн уката но валантэм луэменыз [8].

«Пилиськем музъем» повестез туж ӟеч возьматэ удмурт традиционной прозалэсь туннэ нуналэ кыӵе луэмзэ, кыӵе ӧретӥ азинскемзэ. Вылтӥз учкыса, сое реализм амалэн гожтэм произведение шуыны луоз. Автор пыр-поч эскерыса-чакласа возьматэ Перевозчиковъёслэсь (произведениысь валтӥсь геройёс) семьязэс. Соос ваньзы ик котырысьтымы басьтэмын кожалод, тодмоосмы кадь суредамын, лыдӟись соосты, улэп муртъёсты кадь, син шораз пуктыны быгатэ… Таин ӵош ик произведениын чильпыра символъёсын шудон амал но [1].

Петр Куликовлэн веросъёсыз пыртэмын «Горизонт-82» (1982), «Йыр вадьсын инбам» (1984), «Быльырам синкыли» (1997), «Азвесь кышетэн толэзь» (2007) коллективной сборникъёсы; куд-ог произведениосыз коми, пор, чуваш, украин кылъёсы берыктэмын. Ачиз гожъяськись нош ӟуч, финн, пор, чуваш, итальян кылъёсысь гожъямъёсты берыктылэ.

Сӥё-дано нимъёсыз но пусъёсыз

1979 – Удмурт Элькунысь журналистъёслэн Огазеяськонзылэн премиез тужгес но ӟеч очерк понна
1996 – Удмурт Элькунысь лулчеберет удысысь сӥё-дано ужась
2009 – Россиысь лулчеберет удысысь сӥё-дано ужась

Уже кутэм литература

  1. Айтуганова Л. Дырлэсь тодметъёссэ шонер синйылтэ / Л. Айтуганова, Т. Зайцева // Кенеш. – 2002. – № 9/10. – С. 99–102.
  2. Куликов П. Зарни чорыг шедьылэ буран бере но : [беседа] / записал В. Возняков // Удмурт дунне. – 2002. – 11 сент. – С. 6, 11.
  3. Куликов П. Петыркарысь Петыр : [беседа] / записала Л. Тихонова // Удмурт дунне. – 2012. – 14 сент. – С. 5.
  4. Петрова Т. П. Куликов – прозаик, журналист, редактор // Вордскем кыл. – 2008. - № 2. – С. 25–27.
  5. Пузанова Н. Писатель писателю – редактор и правщик // На переломе эпох. – Ижевск, 2006. – С. 274–276.
  6. Уваров А. Петр Куликов (1952) // Писатели и литературоведы Удмуртии. – Ижевск, 2006. – С. 73–74.
  7. Чернов П. Петр Куликов // Горизонт-82. – Ижевск, 1982. – С. 136.
  8. Шибанов В. Толэзьлэн мышпалыз // Кенеш. – 1994. – № 10. – С. 55–60.
  9. Шкляев А. Араны егит муртъёс лыктозы // Араны егит муртъёс лыктозы / А. Шкляев. – Устинов, 1986. – С. 128–157.