Русский | Удмурт

Иосиф Зотович Иванов вордӥськиз 1983-тӥ арын 5-тӥ гудырикошконэ Алнаш ёросысь Улын Котныр гуртын. Анаез удмурт фольклорез яратӥз, трос мадиськонъёс, кылтэчетъёс тодӥз. Атаез мукет семьяын улӥз [2].

Кадик гуртысь тямыс классъем школаез йылпумъяса, Иосиф Иванов Ижысь медучилищее дышетскыны пыриз. Моргын практика ортчем бере, документъёссэ басьтӥз но Алнашысь шор ёзо школае дасэтӥ классэ выжиз [2]. Собере Чехословакие служить карыны кошкиз. Иосиф Иванов вордскем гуртаз клубын но библиотекаын заведующий луыса ужаз, озьы ик Кадикысь тямыс классъем школаын дышетӥз. Клубын ужакуз драмкружок усьтӥз но «Юн сямо лу, Паша!» нимо аслаз пьесаезъя спектакль пуктӥз [6].

1974-тӥ арысен Иосиф Иванов ёросысь «Алнашский колхозник» газетын корреспондент, ёзэтлэн заведующиез, валтӥсь редакторлэн воштӥсез луыса тыршиз, 1985-тӥ арысен кызь арлэсь тросгес – газетлэн валтӥсь редакторез. Ужамысь дугдытэк Удмурт кун университетысь кылосбур факультетсэ быдтӥз. Али дыре, тазалыкен герӟаськем мугъёсын сэрен кивалтӥсь ужез кельтыса, газетлэн редакцияз ужа.

1986-тӥ арын Иосиф Иванов Пицунда (Абхазия) карын ортчем егитъёслы но нылпиослы гожъясь писательёслэн Огъя Росси совещаниязы пыриськиз. Трос аръёс ӵоже Алнашысь «Ошмес син» нимо литературной огазеяськонэн кивалтӥз, отчы ас дыре Елена Виноградова, Юрий Лобанов, Николай Постников, Надежда Пчеловодова но мукет тодмо адямиос ветлӥзы [3].

Иосиф Иванов удмурт нылпи гожъяськисьёс пӧлысь одӥгез азьветлӥсез. Со сяна, публицистической но литературно-критической статьяосты, очеркъёсты, литературной пародиосты гожъя. Нырысетӥ кылбурзэ 1969-тӥ арын «Алнашский колхозник» газетын печатлаз. Пичи лыдӟисьёслы вить кылбур бичет поттӥз: «Кин вае ӟардонэз?» (1981), «Мон но, тон но, ми но тӥ» (1986), «Вуюись – чебер пукыӵ» (1988), «Кытын улэ шумпотон?» (1994), «Шунды сайка серекъяса» (1998).

Тросэзлы кылбуръёслы инъет луиз дневникез, кытчы Иосиф Иванов нылпиосыз сярысь чакламъёссэ пыртылӥз, соослэсь кылын шудэмъёссэс. Гожъямъёсыз тунсыкоесь но аспӧртэмлыкоесь. Отын нылпилэн тунсыкъяськись визьмыз, котькытын йӧспӧртэмлыкоез адӟыны быгатонлыкез возьматэмын [2].

Иосиф Иванов нылпи психологиез умой шӧдэ, солэн кылбуръёсаз нылпи синмын паймымон котыр дунне усьтӥське [4]. Пинал лыдӟиськисьёсты улон шоры поэтической амалэн учкыны дышетэ, инкуазь явлениосты адӟыны но «кылыны» [2].

Иосиф Ивановлэн кылбуръёсыз школаын удмурт литератураез дышетон программае пыризы: «Букварь» (1985), «Лыдӟон книга» (2004). Со сяна, «Вуюись» (1990), «Покчи эше» (1992), «Котырысь улон но мон» (2003), «Зарни дэремен шунды» (2006) но мукет хрестоматиосы но внеклассной лыдӟон книгаосы.

Нылпи садъёсын ужась дышетӥсьёслэн верамзыя, соос ӵемысь урокъёсазы Иосиф Ивановлэсь кылбуръёссэ уже куто, тужгес но инкуазьлы, арлэн вакытъёсызлы сӥземъёссэ. Начальной классъёсын дышетӥсьёс «Кытчы гинэ учкисько – букваен пумиськисько» кылбуръёсын азбуказэ уже куто. Озьы ик дышетӥсьёслы юртто омонимъёсын кылбуръёс [7].

Нылпи произведениос сяна, Иосиф Иванов лирической кылбуръёсты, веросъёсты гожъя. Соос печатласькизы «Удмурт дунне» газетын, «Кенеш», «Инвожо», «Вордскем кыл» журналъёсын. Кылбуръёсыз пыртэмын «Йыр вадьсын инбам» (1984), «Чипчирган» (1985), «Вордскем музъем-аныкае» (1990) коллективной сборникъёсы. Эстон кылэ берыктэм кылбуръёсыз пыртэмын «Азвесь лодка = Hõbepaat» (2005) книгае, ӟуч кылэ берыктэмъёсыз –  «Удмуртская правда», «Комсомолец Удмуртии» газетъёсын; «Луч», «Уральские нивы», «Костер», «Колобок», «Мурзилка» журналъёсын печатласькизы. Озьы ик куд-огъёсыз берыктэмын пор, коми, чуваш, калмык но мукет кылъёсы.

Иосиф Иванов удмурт кылэ берыктӥз венгер кылбурчилэсь Аттила Йожефлэсь гожъямъёссэ, ӟуч кылэ – эстон гожъяськисьлэсь Арво Валтонлэсь веросъёссэ (Надежда Пчеловодоваен ӵош). Иосиф Ивановлэн тросэз кылбуръёсыз кырӟанлы пӧрмемын. Крезьгурзэ гожъязы Пантелей Кузнецов, Николай Постников, Василий Старших но мукет крезьгурчиос.

Сӥё-дано нимъёсыз но пусъёсыз

1994 – Удмурт Элькунысь лулчеберет удысысь сӥё-дано ужась
2004 – Флор Васильев нимо литературной премилэн лауреатэз (Удмуртия)

Уже кутэм литература

  1. Ар-Серги В. Нимтэм кыльыны ӧз «удалты» // Кенеш. – 2003. – № 7. – С. 17–19.
  2. Ермолина А. Кылбуратӥсь сюрес // Ӟечбур! – 2003. – 7 авг.
  3. Иванов И. Кык «мон» но одӥг улон // Инвожо. – 2003. – № 8/9. – С. 32–34.
  4. Иосиф Иванов (1953) // Вордскем кыл = Родное слово. – 2011. – № 3. – С. 38–39.
  5. Иосиф Зотович Иванов (1953) // Алнаши – сердцу добрый свет = Шунды яркыт пиштэ Алнаш вадьсын. – Ижевск, 2004. – С. 246.
  6. Новгородцева Л. «Ӟеч кидыс шедьтэ, ӟеч емыш будэтэ» // Алнаш куара. – Алнаши, 2003. – 1 авг.
  7. Новгородцева Л. Иосиф Иванов – нылпи кылбурчи // Вордскем кыл. – 2003. – № 9. – С. 59–62.
  8. Уваров А. Иосиф Иванов (1953) // Писатели и литературоведы. – Ижевск, 2006. – С. 53–54.